ଅଷ୍ଟ୍ରେଲିଆର କୁଇନ୍ସଲ୍ୟାଣ୍ଡ ଉପକୂଳରେ ଥିବା ହ୍ବିଟ୍ସଣ୍ଡେ ଦ୍ୱୀପରେ ରହିଛି ହ୍ବାଇଟ୍ ବିଚ୍ ହେଭେନ୍ । ୭ କି.ମି. ପର୍ଯ୍ୟନ୍ତ ପରିବ୍ୟାପ୍ତ ଏହି ବେଳାଭୂମିରେ ପ୍ରାୟ ୯୮ ପ୍ରତିଶତ ସିଲିକା ଥିବାରୁ ଏହାର ରଙ୍ଗ ଧଳା, ଯାହାକି ଦେଖିବାକୁ ଖୁବ୍ ସୁନ୍ଦର ଓ ମନଲୋଭା। ଆଉ ଏଥିପାଇଁ ୨୦୨୧ ମସିହାରେ ଏହାକୁ ଆଓ୍ବାର୍ଡ଼ ମିଳିଥିଲା। ତେବେ ଜାଣିବା ଏହା ସମ୍ପର୍କରେ ଆଉ କିଛି ରୋଚକ ତଥ୍ୟ…
୧୮୭୯ ମସିହାରେ ଷ୍ଟାଫ୍ କମାଣ୍ଡର ଇପି ବେଡ୍ଓ୍ବେଲ୍ ଏହି ବିଚ୍କୁ ଆବିଷ୍କାର କରିବା ସହ ଏହାର ନାମକରଣ ମଧ୍ୟ କରିଥିଲେ। ଏହାର ସୌନ୍ଦର୍ଯ୍ୟ ତଥା ଏଠାରେ ଥିବା ହ୍ବିଟ୍ସଣ୍ଡେ ପାଇଁ ଏପରି ନାମ ଦିଆଯାଇଛି।
ବିଚ୍ଟି ସିଲିକାରେ ପରିପୂର୍ଣ୍ଣ ଥିବାରୁ ବାଲି ବହୁତ ସଫ୍ଟ ଏବଂ ଫାଇନ୍ ଥାଏ। ସେଥିପାଇଁ ଖରାଦିନେ ଅନ୍ୟ ବିଚ୍ଗୁଡ଼ିକ ପରି ଏହା ଗରମ ଲାଗେନି। ଆପଣ ଚାହିଁଲେ ଖାଲିପାଦରେ ମଧ୍ୟ ଏଠାରେ ଆରାମରେ ଚାଲିପାରିବେ।
ସ୍ମୋକିଂ ବା ସିଗାରେଟ୍ ଟାଣିବା ଏଠାରେ ସମ୍ପୂର୍ଣ୍ଣ ନିଷେଧ। ତେଣୁ ଏହାର ଆଖପାଖ ପରିବେଶ ସବୁବେଳେ ପ୍ରଦୂଷଣମୁକ୍ତ ଥାଏ। ଏମିତିକି ଏଠାରେ ଜୀବଜନ୍ତୁ ଯଥା କୁକୁରଙ୍କୁ ବି ପ୍ରବେଶ କରିବାକୁ ଦିଆଯାଇ ନ ଥାଏ। ଏହା ଅଷ୍ଟ୍ରେଲିଆ ମହାଦେଶର ଏକ ପ୍ରମୁଖ ପର୍ଯ୍ୟଟନ ସ୍ଥଳ, ଯାହାର ପରିଚ୍ଛନ୍ନତା ପାଇଁ ନା କେବଳ ଏହାକୁ ୨୦୦୮ ମସିହାରେ ”କୁଇନ୍ସଲ୍ୟାଣ୍ଡସ୍ କ୍ଲିନେଷ୍ଟ ବିଚ୍“ ଭାବେ ପୁରସ୍କାର ମିଳିଛି ବରଂ ଏଥିପାଇଁ ବିଶ୍ୱରେ ଏକ ସ୍ବତନ୍ତ୍ର ସ୍ଥାନ ମଧ୍ୟ ଅଧିକାର କରିଛି। ଖାଲି ସେତିକି ନୁହେଁ, ୨୦୧୦ ମସିହାରେ ପୃଥିବୀର ପ୍ରଥମ ”ଇକୋ ଫ୍ରେଣ୍ଡ୍ଲି“ ବିଚ୍ ଭାବେ ମଧ୍ୟ ଏହା ପରିଗଣିତ ହୋଇଥିଲା।
ପରିବେଶକୁ ସୁରକ୍ଷା ପ୍ରଦାନ କରୁଥିବାରୁ କୁଇନ୍ସଲ୍ୟାଣ୍ଡ ସରକାର ହ୍ବାଇଟ୍ ସଣ୍ଡେ ଦ୍ୱୀପ ଏବଂ ତା’ର ଆଖପାଖ ଅଞ୍ଚଳକୁ ‘ନ୍ୟାଶନାଲ୍ ପାର୍କ’ର ମାନ୍ୟତା ଦେଇଛନ୍ତି ଏବଂ ଏଥିସହ ‘ଓ୍ବାଲର୍ଡ ହେରିଟେଜ’୍ରେ ମଧ୍ୟ ଏହା ସ୍ଥାନ ପାଇଛି।
ଏଠାରେ ପହଁରିବାର ବି ସୁବିଧା ରହିଛି। ୨୦୦୯ ମସିହାଠାରୁ ପ୍ରତିବର୍ଷ ନଭେମ୍ବର ୧୨ ତାରିଖରେ ଏଠାରେ ପ୍ରାୟ ୨ କି.ମି. ପର୍ଯ୍ୟନ୍ତ ସନ୍ତରଣ ପ୍ରତିଯୋଗିତା ଅନୁଷ୍ଠିତ ହୋଇଆସୁଛି। ସିଲିକା ସ୍ୟାଣ୍ଡରେ ଜୁଏଲେରିଗୁଡ଼ିକ ଭଲ ଭାବେ ପଲିସ୍ ହେଉ ଥିବାରୁ ଏଠାକୁ ଯିଏ ବି ବୁଲିବାକୁ ଗଲେ ନିଜର ଜୁଏଲେରି ନେବାକୁ ଭୁଲି ନ ଥା’ନ୍ତି।
