ଭବାନୀପାଟଣା,୨୩।୨(ସ୍ବ.ପ୍ର.): କେନ୍ଦ୍ର ଓ ରାଜ୍ୟ ସରକାର ଦୁର୍ଗମ ଅଞ୍ଚଳରେ ସ୍ବାସ୍ଥ୍ୟ ସେବା ଯୋଗାଇ ଦେବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ବାସ୍ତବରେ ଫେଲ ମାରୁଥିବା ଦେଖିବାକୁ ମିଳୁଛି। ଏବେ ବି ଅନେକ ଡାକ୍ତରଖାନାରେ ଡାକ୍ତର ପଦବୀ ଖାଲି ପଡ଼ିଛି। ଏଭଳି ଏକ ଚିତ୍ର ଦେଖିବାକୁ ମିଳିଛି କଳାହାଣ୍ଡି ଜିଲା ଫରଙ୍ଗ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ। ଏହି ସାସ୍ଥ୍ୟକେନ୍ଦ୍ର ଚକାଚକ ଥିବା ବେଳେ ଡାକ୍ତର ନ ଥିବା ଯୋଗୁ ଏହି ସୁନ୍ଦରତା କୌଣସି କାମରେ ଆସୁନି। ମନ୍ଦିର ଅଛି ହେଲେ, ମନ୍ଦିର ଭିତରେ ଦେବତା ନ ଥିବା ଯୋଗୁଁ ତାହା କୌଣସି କାମରେ ନୁହେଁ, ସେଭଳି ଦୃଶ୍ୟ ଦେଖିବାକୁ ମିଳିଛି। ଅନେକ ଦିନରୁ ଡାକ୍ତର ପଦବୀ ଖାଲି ପଡିଥିବା ବେଳେ କେବଳ ଫାର୍ମାସିଷ୍ଟ ହିଁ ଅଞ୍ଚଳବାସୀଙ୍କ ଭରସା ସାଜିଛନ୍ତି।
ପ୍ରକାଶ ଯେ, ଗୋଲାମୁଣ୍ଡା ବ୍ଲକ ଫରଙ୍ଗଠାରେ ଥିବା ସ୍ବାସ୍ଥ୍ୟକେନ୍ଦ୍ର ଗୋଟିଏ ପାର୍କଠାରୁ ମଧ୍ୟ କୌଣସି ଗୁଣରେ କମ ନାହିଁ। ଦେଖିବାକୁ ଚକାଚକ, ହେଲେ ବିନା ଡାକ୍ତରରେ ରୋଗୀ ସେବା ଚାଲିଛି। ଏହି ସ୍ବାସ୍ଥ୍ୟକେନ୍ଦ୍ରରେ ଆୟୁଷ ଏବଂ ଏମବିବିଏସ ଡାକ୍ତର ପଦବୀ ଖାଲି ପଡ଼ିଛି। ସେହିଭଳି ୪ଜଣ ଆଟେଣ୍ଡାଣ୍ଟ ପଦବୀରୁ ୨ଜଣ ଅଛନ୍ତି। ସୁଇପର ମଧ୍ୟ ନାହାନ୍ତି। ଫଳରେ ଅନେକ ସମୟରେ ରୋଗୀସେବା ବାଧାପ୍ରାପ୍ତ ହେଉଛି। ଗୋଟିଏ ଫାର୍ମାସିଷ୍ଟ, ଗୋଟିଏ ଷ୍ଟାଫନର୍ସ, ଗୋଟିଏ ଏନଏମ, ୨ଟି ଆଟେଣ୍ଡାଣ୍ଟ ଓ ଗୋଟିଏ ସିକ୍ୟୁରିଟି ଗାର୍ଡରେ ଚାଲୁଛି ଏହି ଡାକ୍ତରଖାନା। ଏହି ସ୍ବାସ୍ଥ୍ୟକେନ୍ଦ୍ର ଉପରେ ପ୍ରାୟ ୧୨ଟି ପଞ୍ଚାୟତ ଲୋକେ ନିର୍ଭର କରନ୍ତି। ଅନେକ ଲୋକ ଗରିବ ଶ୍ରେଣୀର ଅଟନ୍ତି। କିନ୍ତୁ ସ୍ବାସ୍ଥ୍ୟ ବିଭାଗ ଏହି ଏଠାରେ ଡାକ୍ତର ନିଯୁକ୍ତି କରିନାହାନ୍ତି। ଫଳରେ ଲୋକେ ବାଧ୍ୟ ହୋଇ ଧର୍ମଗଡ଼, ଜୁନାଗଡ଼ କିମ୍ବା ଭବାନୀପାଟଣା ଡାକ୍ତରଖାନାକୁ ଯାଇ ଖର୍ଚ୍ଚନ୍ତ ହୋଇଥାନ୍ତି। ଏହି ଡାକ୍ତରଖାନା ମଧ୍ୟ ଠିକ ସମୟରେ ଖୋଲେ ନାହିଁ। ସମୟ ସାରଣୀ ବୋର୍ଡରେ ଲେଖା ଅନୁଯାୟୀ ଏପ୍ରିଲରୁ ସେପ୍ଟେମ୍ବର ମାସ ପର୍ଯ୍ୟନ୍ତ ସକାଳ ୭ରୁ ୧୧ ଓ ଅପରାହ୍ନ ୪ରୁ ୬ ଘଣ୍ଟା ପର୍ଯ୍ୟନ୍ତ ଖୋଲା ରହିବ। ସେହିଭଳି ଅକ୍ଟୋବରରୁ ମାର୍ଚ୍ଚ ପର୍ଯ୍ୟନ୍ତ ସକାଳ ୮ରୁ ୧୨ ଓ ଅପରାହ୍ନ ୩ରୁ ୫ଟା ପର୍ଯ୍ୟନ୍ତ ଖୋଲା ରହିବ। ସରକାରୀ ଛୁଟି ସମୟରେ କେବଳ ସକାଳେ ଖୋଲା ରହିବ, ଅନ୍ୟ ସମୟରେ ବନ୍ଦ ରହିବ ବୋଲି ଉଲ୍ଲେଖ ଅଛି। ଏହି ସମୟ ବାହାରେ କୌଣସି ରୋଗୀ ଆସିଲେ ତାହା ଭଗବାନ ଭରସାରେ। ଏହି ଡାକ୍ତରଖାନାକୁ ଅପଗ୍ରେଡ ଡାକ୍ତରଖାନାର ମାନ୍ୟତା ଦେବା ସହିତ ୨୪ ଘଣ୍ଟା ଡାକ୍ତରଖାନା ଖୋଲା ରଖିବା ପାଇଁ ଜନସାଧାରଣ ଦାବି କରୁଛନ୍ତି।
