ନ୍ୟୁୟର୍କ,୨୭।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଜାତିସଂଘ ସାଧାରଣ ପରିଷଦ(ୟୁଏନ୍ଜିଏ)ର ୭୫ତମ ଅଧିବେଶନରେ ଉଦ୍ବୋଧନ ଦେଇ ବିଶ୍ୱବାସୀଙ୍କୁ ଚମକାଇ ଦେଇଛନ୍ତି। ଭିଡିଓ କନ୍ଫରେନ୍ସିଂ ଜରିଆରେ ସେ ହିନ୍ଦୀରେ ଉଦ୍ବୋଧନ ଦେଇ ଜାତିସଂଘରେ କେବେ ଆଉ ଭାରତ ନିର୍ଣ୍ଣାୟକ ଭୂମିକା ଗ୍ରହଣ କରିବ ବୋଲି ପ୍ରଶ୍ନ କରିଛନ୍ତି। ୧୩୦ କୋଟି ଲୋକ ବାସ କରୁଥିବା ଭାରତ ସବୁବେଳେ ବିଶ୍ୱ ହିତ ଲାଗି କାମ କରିଆସିଛି। ଏହି ଶାନ୍ତିପ୍ରିୟ ଦେଶ ଜାତିସଂଘ ସୁରକ୍ଷା ପରିଷଦ(ୟୁଏନ୍ଏସ୍ସି)ରେ ଏବେ ସୁଦ୍ଧା ସ୍ଥାୟୀ ସଦସ୍ୟ ହୋଇପାରି ନାହିଁ। ଆମକୁ ଏଥିଲାଗି ଆଉ କେତେଦିନ ଅପେକ୍ଷା କରିବାକୁ ପଡ଼ିବ ବୋଲି ମୋଦି ଦୃଢ଼ତାର ସହ କହିଛନ୍ତି। ଜାତିସଂଘରେ ଭାରତ ବୃହତ୍ ଭୂମିକା ଗ୍ରହଣ କରିବାକୁ ସକ୍ଷମ। ଏଥିଲାଗି ଭାରତର ଅନେକ ଅବଦାନ ମଧ୍ୟ ରହିଆସିଛି। ହେଲେ ଜାତିସଂଘରେ ନିର୍ଣ୍ଣାୟକ ଭୂମିକା ନେବା ଲାଗି ଭାରତକୁ ବହୁ ବର୍ଷ ଅପେକ୍ଷା କରିବାକୁ ପଡ଼ୁଛି। ଜାତିସଂଘ ସୁରକ୍ଷା ପରିଷଦର ସଂସ୍କାର ଜରୁରୀ ବୋଲି ପ୍ରଧାନମନ୍ତ୍ରୀ ମୋଦି ପ୍ରକାଶ କରିଛନ୍ତି।
୨୨ ମିନିଟ୍ର ଉଦ୍ବୋଧନରେ ମୋଦି ମହାମାରୀ କରୋନା ଓ ଭାରତର ଔଷଧ ପ୍ରସ୍ତୁତି ସମ୍ପର୍କରେ କହିଥିଲେ। ସାରା ବିଶ୍ୱକୁ ଭାରତର ଔଷଧ ଏବେ ଉପଲବ୍ଧ ଓ ଏଥିରୁ ବିଶ୍ୱବାସୀ ଅନେକ ଲାଭ ଉଠାଇଛନ୍ତି। ଭାରତ ସର୍ବଦା ସହଯୋଗର ହାତ ବଢ଼ାଇଆସିଛି। କୋଭିଡ୍ ଟିକା ପ୍ରସ୍ତୁତି ମଧ୍ୟ ଭାରତରେ ଶେଷ ପର୍ଯ୍ୟାୟରେ ପହଞ୍ଚିଛି। କରୋନାର ଏଭଳି ବିକଳ ସ୍ଥିତିରେ ବିଭିନ୍ନ ଦେଶ ପକ୍ଷରୁ ଟିକା ପ୍ରସ୍ତୁତି ଚାଲିଥିବାବେଳେ ଜାତିସଂଘର ଭୂମିକା ସେଭଳି ନ ଥିବା ମୋଦି କହିଥିଲେ। ପରିସ୍ଥିତିରେ ପରିବର୍ତ୍ତନ ଅଣାଯିବା ଲାଗି ସେ ଦୃଢ଼ ଯୁକ୍ତି ଉପସ୍ଥାପନ କରିଥିଲେ। ଭାରତର ଲୋକମାନେ ଜାତିସଂଘରେ ସୁଧାର ଲାଗି ଅପେକ୍ଷା କରି ରହିଥିବା ମୋଦି କହିଥିଲେ।
ଜାତିସଂଘ ସାଧାରଣ ପରିଷଦରେ ମୋଦି ପାକିସ୍ତାନକୁ ତୀବ୍ର ସମାଲୋଚନା କରିବା ସହ ଏହି ଦେଶ ଆତଙ୍କବାଦକୁ ପ୍ରୋତ୍ସାହନ ଦେଇ ବିଶ୍ୱକୁ ଭ୍ରମିତ କରୁଛି ବୋଲି କହିଥିଲେ। ପାକ୍ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ମନ୍ତବ୍ୟକୁ ନେଇ ମୋଦି ବର୍ଷିଥିଲେ। ପାକ୍ ସମର୍ଥିତ ଆତଙ୍କବାଦ ବିଶ୍ୱ ସୁରକ୍ଷା ଲାଗି ବଡ଼ ବିପଦ ପାଲଟିଛି। କଶ୍ମୀରକୁ ନେଇ ପାକିସ୍ତାନ ବିଭିନ୍ନ ମିଥ୍ୟା ପ୍ରଚାର ଚଳାଇବା ସହ ଭାରତକୁ ଦୋଷ ଦେଇ ଆସୁଥିବା ସେ କହିଛନ୍ତି। ଭାରତ ଏକ ଶାନ୍ତିପ୍ରିୟ ଦେଶ ଓ ଜାତିସଂଘ ଶାନ୍ତି ମିଶନରେ ଭାରତର ସର୍ବାଧିକ ଯବାନ ପ୍ରାଣବଳି ଦେଇଥିବା ମୋଦି ପ୍ରକାଶ କରିଛନ୍ତି।
ମାନବବାଦର ବିରୁଦ୍ଧାଚରଣ କରୁଥିବା ଆତଙ୍କବାଦ, ନିଶା କାରବାର, ବେଆଇନ ଅସ୍ତ୍ରଶସ୍ତ୍ର ଚାଲାଣ, ମନିଲଣ୍ଡରିଂ ମାମଲା ଆଦିକୁ ଭାରତ ପୂର୍ବଭଳି ବିରୋଧ କରିଆସୁଛି। ବିଶ୍ୱରେ ଶାନ୍ତିରକ୍ଷା ଲାଗି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ତେବେ ଏଥିଲାଗି ଜାତିସଂଘରେ ସଂସ୍କାର ଅଣାଯିବା ଗୁରୁତ୍ୱପୂର୍ଣ୍ଣ ବୋଲି ମୋଦି ଉଦ୍ବୋଧନରେ କହିଛନ୍ତି।
