ପରଜଙ୍ଗ, ୧୭।୭(ନିଗମାନନ୍ଦ ଦଳବେହେରା): ଆଷାଢ଼ ଆସିଲେ ଚିନ୍ତା ବଢ଼େ। ବର୍ଷାପାଣି ଯେପରି ଘରେ ନ ପଶିବ, ସେଥିଲାଗି ସଜାଗ ହୋଇଯାଆନ୍ତି ଗାଁ ଲୋକେ। ଏଥିଲାଗି ଘର ସମ୍ମୁଖ ଦାଣ୍ଡରେ ମାଟିରେ ହୁଡ଼ା ବାନ୍ଧନ୍ତି। ପଞ୍ଚାୟତ ପ୍ରତିନିଧି ଏବଂ ପ୍ରଶାସନିକ ଅଧିକାରୀଙ୍କ ଅବହେଳା ଯୋଗୁ ବର୍ଷ ବର୍ଷ ଧରି ଏଭଳି ଜଳବନ୍ଦୀ ସମସ୍ୟା ଭୋଗୁଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ କଲଦା ପଞ୍ଚାୟତ ଅନ୍ତର୍ଗତ ବ୍ରାହ୍ମଣବେଡ଼ିଆ ଗ୍ରାମର ୩୦ରୁ ଊର୍ଦ୍ଧ୍ୱ ପରିବାର।
ଅଭିଯୋଗ ଅନୁଯାୟୀ, ଗ୍ରାମରେ ୭୦ରୁ ଊଦ୍ଧର୍ବ ପରିବାର ବାସ କରନ୍ତି। ତେବେ ଗାଁ ଚୌପାଢ଼ିରେ ରହୁଥିବା ୩୦ ପରିବାରର ବର୍ଷା ଆସିଲେ ଦୁଃଖ ବଢ଼ିଯାଉଛି। ଗତ ଦୁଇଦିନ ହେଲା ଗ୍ରାମବାସୀଙ୍କ ଉପରେ ଦାଉସାଧୁଛି ଲଘୁଚାପଜନିତ ଲଗାଣବର୍ଷା। ଜଳ ନିଷ୍କାସନ ହୋଇପାରୁ ନ ଥିବାରୁ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଗାଁଦାଣ୍ଡ ସମ୍ପୂର୍ଣ୍ଣ ଜଳମଗ୍ନ ହୋଇଯାଇଛି। କାଳେ ଘରେ ପାଣି ପଶିଯିବ, ସେଥିଲାଗି ସମ୍ପୃକ୍ତ ପରିବାର ଘର ଆଗରେ ହୁଡ଼ା ବାନ୍ଧିଛନ୍ତି। ବିଭିନ୍ନ ସରକାରୀ ଯୋଜନାରେ ଅଜସ୍ର ଅର୍ଥ ବ୍ୟୟ କରାଯାଉଥିବାବେଳେ ଅଦ୍ୟାବଧି ଗାଁକୁ ସବୁଦିନିଆ ରାସ୍ତା ହୋଇପାରିନାହିଁ। ଅପେକ୍ଷାକୃତ ଖାଲୁଆ ଅଞ୍ଚଳରେ ରହୁଥିବା ସମ୍ପୃକ୍ତ ପରିବାର ପାଇଁ ଡ୍ରେନ୍ ସ୍ବପ୍ନ ପାଲଟିଛି। ଫଳରେ ପାଣି ଜମି ରହି ସଂକ୍ରାମକ ରୋଗ ବ୍ୟାପିବା ଆଶଙ୍କା ଦେଖାଦେଇଛି। ପୂର୍ବରୁ କୁଆଳୋ ପଞ୍ଚାୟତରେ ଥିବା ବ୍ରାହ୍ମଣବେଡିଆକୁ କଲଦା ପଞ୍ଚାୟତରେ ଅନ୍ତର୍ଭୁକ୍ତ କରାଯାଇଛି। ବାରମ୍ବାର ପଞ୍ଚାୟତ ଠିକଣା ବଦଳୁଥିଲେ ମଧ୍ୟ ଗ୍ରାମବାସୀଙ୍କ ଭାଗ୍ୟ ବଦଳି ନ ପାରିବା ପରିତାପର ବିଷୟ ବୋଲି ସେମାନେ ଅଭିଯୋଗ କରିଛନ୍ତି। ଗ୍ରାମରେ ସ୍ଥାୟୀ ଭାବେ ଜଳ ନିଷ୍କାସନ ବ୍ୟବସ୍ଥା କରିବାକୁ ସାଧାରଣରେ ଦାବି ହୋଇଛି।
ସମସ୍ୟା ସମ୍ପର୍କରେ ସରପଞ୍ଚ ପ୍ରକାଶ ଚନ୍ଦ୍ର ବେହେରା କୁହନ୍ତି, ପଞ୍ଚାୟତରେ ପାଣ୍ଠି ନ ଥିବାରୁ ରାସ୍ତା ମରାମତି କରାଯାଇପାରୁନାହିଁ। ଫଳରେ ବର୍ଷା ହେବା ମାତ୍ରେ ପାଣି ଜମି ରହୁଛି। ଏ ବିଷୟରେ ସେ ବିଡିଓଙ୍କ ସହ ଆଲୋଚନା କରିବେ ବୋଲି କହିଛନ୍ତି।
