ରାୟଗଡା ଅଫିସ, ୩।୮: ଏବେ ରାୟଗଡ଼ାରେ ବ୍ୟାପୁଛି ଝାଡ଼ାବାନ୍ତି। ଅସ୍ବାସ୍ଥ୍ୟକର ପରିବେଶ ଓ ଅପରିସ୍କାର ପାଣି ପିଇବା ଦ୍ୱାରା ଏହା ବ୍ୟାପୁଛି। ଏହା ମଧ୍ୟରେ ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ସଦରରେ ସପ୍ତାହେ ହେବ ଲୋକଙ୍କୁ ପାଇପ୍ ପାଣି ମିଳୁନି। ଫଳରେ ଲୋକେ ନଈ ନାଳର ପାଣି ପିଇବାକୁ ବାଧ୍ୟ ହେଉଛନ୍ତି। ଏହାକୁ ନେଇ ଲୋକଙ୍କ ମଧ୍ୟରେ ବ୍ୟାପକ ଅସନ୍ତୋଷ ଦେଖାଦେଇଛି।
ରାୟଗଡା ଜିଲା କଲ୍ୟାଣସିଂହପୁର ବ୍ଲକ ସଦର ମହକୁମାରେ ସପ୍ତାହ ଧରି ବିଶୁଦ୍ଧ ପାନୀୟ ଜଳ ସମସ୍ୟା ଦେଖାଦେଇଛି। ସଦର ଥାନାରୁ ଆରମ୍ଭ କରି ମୁଖ୍ୟ ସଡକ, ମୁଖ୍ୟ ବଜାର, କାମ୍ପସାହି, ବେହେରା ସାହି, ଗୌଡ଼ସାହି ଓ ପୁରୁଣା ବସଷ୍ଟାଣ୍ଡ ଦାନୁସାହି, କଦମ୍ବ ଦ୍ୱାରସାହି, କୁମ୍ଭାର ସାହିରେ ପ୍ରାୟ ୫୦୦ ଘର ଅଧିବାସୀ ମୋଟ ୧୫ଶହଜନସଂଖ୍ୟା ରହିଛନ୍ତି। ଆଜକୁ ପ୍ରାୟ ସପ୍ତାହ ହେବ ଲୋକେ ସପ୍ଲାଇ ପାଣି ପାଉନାହାନ୍ତି। ମୁଖ୍ୟ ରାସ୍ତାର ଉଭୟ ପାର୍ଶ୍ୱରେ କେନାଲ ଖୋଲା ହେବା ଯୋଗୁ ପୁରୁଣା ପାଇପ କାଚରାସାହି ଓ ଥାନା ପାଖରେ ଫାଟି ଯାଇ ଛିଦ୍ର ହୋଇ ପାଣି ବେକାର ନଷ୍ଟ ହୋଇ ବୋହିଯାଉଛି। ବର୍ତ୍ତମାନ ସ୍ଥାନୀୟ ବାସିନ୍ଦା ବାଧ୍ୟ ହୋଇ ନଦୀର ଅପରିଷ୍କାର ଗୋଳିଆ ପାଣି ବ୍ୟବହାର କରିବା ଦ୍ୱାରା ପତଳା ଝାଡା, କାଚୁକୁଣ୍ଡିଆ ଭଳି ହଇଜା ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିବା ଦେଖିବାକୁ ମିଳିଛି। ପୂର୍ବରୁ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ ବିଶୁଦ୍ଧ ପାନୀୟ ଜଳ ଯୋଗାଣ ହେଉଥିଲା। ବର୍ତ୍ତମାନ ରାସ୍ତା ନିର୍ମାଣ କାର୍ଯ୍ୟ ଚାଲୁଥିବା ଯୋଗୁ ଉକ୍ତ ପୁରୁଣା ପାଇପ ଲାଇନକୁ ବନ୍ଦ କରି ଦେଇ ନୂତନ ପାଇପ ଲାଇନ ବିଛାଉଛନ୍ତି। ଅନେକ ସାହିକୁ ନୂତନ ପାଇପ ଲାଇନ ସଂଯୋଗ କରାଯାଇଛି। ଏହି କାମ ପାଇଁ ସପ୍ତାହ ହେବ ବିଶୁଦ୍ଧ ପାନୀୟ ଜଳରୁ ବଞ୍ଚିତ ଅଛନ୍ତି ଲୋକେ। ଜଳ ଯୋଗାଣ ବିଭାଗ କାର୍ଯ୍ୟରେ ବିଳମ୍ବ କରୁଥିବା ଯୋଗୁ ଏହା ଶେଷ ହେବାକୁ କିଛିଦିନ ଲାଗିବ। ତାହା ଭିତରେ ଝାଡ଼ା ବାନ୍ତ ଆକ୍ରାନ୍ତଙ୍କ ସଂଖ୍ୟା ବଢ଼ିବାର ଆଶଙ୍କା ରହିଛି। ଉକ୍ତ ବ୍ଲକରେ କିଛିଦିନ ହେବ ହଇଜା ଓ କଲେରାରେ ଜଣଙ୍କର ମୃତ୍ୟୁ ହୋଇଥିବାବେଳେ ୨୨ରୁ ଊର୍ଦ୍ଧ୍ୱ ଆକ୍ରାନ୍ତ ହୋଇ ସାରିଛନ୍ତି। ତେଣୁ ଏ ଦିଗରେ ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କହିଛନ୍ତି। ତୁରନ୍ତ ପଦକ୍ଷେପ ଗ୍ରହଣ ନକଲେ ଆଗାମୀ ଦିନରେ ଆନ୍ଦୋଳନ କରିବୁ ବୋଲି ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ଏ ବିଷୟରେ ସରପଞ୍ଚ ଗୌତମ ବାର୍ଲିଙ୍କୁ ପଚାରିବାର ବର୍ତ୍ତମାନ ବଡ ଟ୍ୟାଙ୍କର ଯୋଗେ ପାଣି ଯୋଗାଯାଉଛି। ଜଳ ଯୋଗାଣ କନିଷ୍ଠ ଯନ୍ତ୍ରୀଙ୍କୁ କହି ତୁରନ୍ତ ସମସ୍ୟାର ସମାଧାନ କରାଯିବ ବୋଲି ସେ କହିଛନ୍ତି।
