ନୂଆଦିଲ୍ଲୀ, ୧୮ା୫: ସୋସିଆଲ ମେସେଜିଂ ଆପ୍ଲିକେଶନ ହ୍ବାଟ୍ସଆପ୍ର ନୂଆ ପଲିସି ଭାରତର ସୂଚନା ପ୍ରଯୁକ୍ତି (ଆଇଟି) ଆଇନକୁ ଉଲ୍ଲଂଘନ କରୁଛି ବୋଲି ଦିଲ୍ଲୀ ହାଇକୋର୍ଟରେ କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି। ଏହି ଆପ୍ର ନୂଆ ପ୍ରାଇଭେସି ପଲିସି ବିରୋଧରେ ଦାଖଲ ହୋଇଥିବା ବିଭିନ୍ନ ପିଟିଶନର ଶୁଣାଣି ସମୟରେ କେନ୍ଦ୍ର ଏହା କହିଛି। ହାଇକୋର୍ଟର ମୁଖ୍ୟ ବିଚାରପତି ଡି.ଏନ୍. ପଟେଲ ଏବଂ ଜଷ୍ଟିସ୍ ଜ୍ୟୋତି ସିଂଙ୍କୁ ନେଇ ଗଠିତ ଏକ ଖଣ୍ଡପୀଠ ମାମଲାର ଶୁଣାଣି କରିଥିଲେ। କୋର୍ଟରେ ହ୍ବାଟ୍ସଆପ ପକ୍ଷରୁ କୁହାଯାଇଥିଲା ଯେ, ମେ ୧୫ରୁ ଏହାର ନୂଆ ପ୍ରାଇଭେସି ପଲିସି ଲାଗୁ କରାଯାଇଛି। କିନ୍ତୁ ଏହି ନୀତିକୁ ଅସ୍ବୀକାର କରିଥିବା ବ୍ୟବହାରକାରୀଙ୍କ ଆକାଉଣ୍ଟକୁ ଡିଲିଟ୍ କରାଯାଇନାହିଁ। ଏହି ପଲିସିକୁ ସ୍ବୀକାର କରିବାକୁ ନିଜ ଗ୍ରାହକଙ୍କୁ ପ୍ରୋତ୍ସାହିତ କରାଯିବ। କିନ୍ତୁ ଯେଉଁମାନେ ଏହି ପ୍ରାଇଭେସି ନୀତିକୁ ଗ୍ରହଣ କରିନାହାନ୍ତି ସେମାନଙ୍କ ଆକାଉଣ୍ଟ ହଟାଇବା ପାଇଁ କୌଣସି ନିର୍ଦ୍ଦିଷ୍ଟ ସମୟସୀମା ଧାର୍ଯ୍ୟ କରାଯାଇନାହିଁ ବୋଲି ହ୍ବାଟ୍ସ୍ ଆପ୍ କହିଛି। ହ୍ବାଟ୍ସଆପ୍ ନୂଆ ନୀତି ଆଣି ଉପଭୋକ୍ତାଙ୍କ ଗୋପନୀୟତା ଅଧିକାର ଉଲ୍ଲଂଘନ କରୁଥିବା ନେଇ ଦିଲ୍ଲୀ ହାଇକୋର୍ଟରେ ପିଟିଶନ ଦାଖଲ କରାଯାଇଥିଲା। ଦିଲ୍ଲୀ ହାଇକୋର୍ଟ କେନ୍ଦ୍ର ସରକାର, ହ୍ବାଟ୍ସଆପ୍ ଏବଂ ଏହାର ମୂଳ କମ୍ପାନୀ ଫେସ୍ବୁକ୍ଠାରୁ ଏ ନେଇ ଜବାବ ମାଗିଥିଲେ। ମାମଲାର ପରବର୍ତ୍ତୀ ଶୁଣାଣି ଜୁନ୍ ୩ରେ ହେବ। ହ୍ବାଟ୍ସଆପ୍ ବ୍ୟବହାରକାରୀଙ୍କ ତଥ୍ୟ ଏହାର ମୂଳ କମ୍ପାନୀ ଫେସ୍ବୁକ୍ ସହ ଶେୟାର ହେବା ସହ ତାହାକୁ ବ୍ୟବହାର କରିପାରିବ ବୋଲି ନୂଆ ପଲିସିରେ ରହିଛି। ଯଦି ଉପଭୋକ୍ତା ଏହି ନୀତିରେ ରାଜି ନ ହୁଅନ୍ତି ତେବେ ସେମାନେ ତାଙ୍କ ଆକାଉଣ୍ଟକୁ ବ୍ୟବହାର କରିପାରିବେନି। ତେବେ କମ୍ପାନୀ ପରେ ଏହି ନୀତିକୁ ପ୍ରତ୍ୟାହାର କରିନେଇଥିଲା। ୟୁରୋପୀୟ ଦେଶର ହ୍ବାଟ୍ସଆପ୍ ବ୍ୟବହାରକାରୀଙ୍କ ପାଇଁ ଏହି ପଲିସି ବାଧ୍ୟତାମୂଳକ ନ ଥିବାବେଳେ ଭାରତୀୟ ଗ୍ରାହକଙ୍କ ନିମନ୍ତେ ଅଣାଯିବା ଚିନ୍ତାର ବିଷୟ ବୋଲି କେନ୍ଦ୍ର କହିଛି।
