ନୂଆଦିଲ୍ଲୀ, ୧୬।୪:୨୦୪୭ ସୁଦ୍ଧା ଭାରତକୁ ବିଶ୍ୱର ତୃତୀୟ ସର୍ବବୃହତ ଅର୍ଥନୀତିରେ ପରିଣତ କରିବା ଦିଗରେ କେନ୍ଦ୍ରର ଭାଜପା ସରକାର କାର୍ଯ୍ୟ କରିଚାଲିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଏକ ସାକ୍ଷାତ୍କାରରେ କହିଛନ୍ତି। ଆଗାମୀ ୫ ବର୍ଷରେ ଭାରତର ଅର୍ଥନୀତି ୫ ଟ୍ରିଲିୟନ ଡଲାରରେ ପହଞ୍ଚିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ତେବେ କେନ୍ଦ୍ରରେ ଭାଜପା ତୃତୀୟ ଥର ପାଇଁ କ୍ଷମତାକୁ ଆସିଲେ ସମ୍ବିଧାନ ବଦଳାଇବାକୁ ଚେଷ୍ଟା କରିବ ବୋଲି ବିରୋଧୀ ଅପ ପ୍ରଚାର କରୁଥିବା ମୋଦି କହିଛନ୍ତି। ମୋଦି ସରକାରଙ୍କ ନିକଟରେ ନିଶ୍ଚିତ ଭାବେ ଦେଶବାସୀଙ୍କ ପାଇଁ ବଡ଼ ଯୋଜନା ରହିଛି, ତେବେ ଏଥିରେ କାହାରିକୁ ଡରିବାର ଆବଶ୍ୟକତା ନ ଥିବା ପ୍ରଧାନମନ୍ତ୍ରୀ କହିଛନ୍ତି। କେନ୍ଦ୍ର ଭାଜପା ସରକାର ଦେଶର ବିକାଶ ପାଇଁ ଠିକ୍ ସମୟରେ ଉଚିତ ନିଷ୍ପତ୍ତି ନେବେ ବୋଲି ସେ କହିଛନ୍ତି। ‘୨୦୪୭ ବିକଶିତ ଭାରତ’ ଦିଗରେ ଗତ ୨ ବର୍ଷ ହେଲା କେନ୍ଦ୍ର ସରକାର କାର୍ଯ୍ୟ କରୁଛନ୍ତି। ଆଗାମୀ ୨୩ ବର୍ଷ ମଧ୍ୟରେ ଭାରତକୁ କିପରି ଭାବେ ଦେଖିବାକୁ ଚାହୁଁଛନ୍ତି, ସେନେଇ ୧୫ ଲକ୍ଷ ଦେଶବାସୀ ବିଭିନ୍ନ ପ୍ରସ୍ତାବ ଦେଇଥିବା ମୋଦି କହିଛନ୍ତି। ସେହିପରି ଅଧିକାଂଶ ରାଜ୍ୟରେ ବିଧାନସଭା ନିର୍ବାଚନ ଅଲଗା ଅଲଗା ସମୟରେ ହେଉଥିବାରୁ ବିକାଶ ବାଧାପ୍ରାପ୍ତ ହେଉଛି। ସେଥିପାଇଁ ‘ଗୋଟିଏ ଦେଶ ଏକ ନିର୍ବାଚନ’କୁ ଆପଣାଇବାର ଆବଶ୍ୟକତା ରହିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଚଳିତ ଲୋକ ସଭା ନିର୍ବାଚନରେ ମତଦାତାଙ୍କ ନିକଟରେ ୨ଟି ବିକଳ୍ପ ରହିଛି। କଂଗ୍ରେସର ବିଫଳ ମଡେଲ ସହ କେନ୍ଦ୍ର ଭାଜପା ସରକାରଙ୍କ ୧୦ ବର୍ଷର ବିକାଶ ମଡେଲ ସହ ତୁଳନା କରି ଲୋକେ ଭୋଟ ଦେବେ ବୋଲି ପ୍ରଧାନମନ୍ତ୍ରୀ କହିଛନ୍ତି।
