ସମ୍ବଲପୁର,୬ା୧୨(ବ୍ୟୁରୋ): ପଶ୍ଚିମ ଓଡିଶା କୃଷକ ସଙ୍ଗଠନ ଆହ୍ବାନରେ ଶନିବାର ବିଭିନ୍ନ ଜିଲାର ଚାଷୀ ସଙ୍ଗଠନ ରାସ୍ତାକୁ ଓହ୍ଳାଇଛନ୍ତି। ନୂଆପଡ଼ା ଓ କଳାହାଣ୍ଡି ବ୍ୟତୀତ ପ୍ରାୟ ସମସ୍ତ ଜିଲାରେ ଚାଷୀମାନେ ଆନ୍ଦୋଳନରେ ସାମିଲ ହୋଇଛନ୍ତି। ସମ୍ବଲପୁର ଜିଲା ଜାତୀୟ ରାଜପଥ- ୫୩ ସିନ୍ଦୁରପଙ୍କ ଚୌଧୂରୀଛକରେ ରାସ୍ତାରୋକୋ ହୋଇଥିଲା। କେନ୍ଦ୍ର ସରକାରଙ୍କ ନୂତନ କୃଷି ଆଇନ, ଟୋକନ ସମସ୍ୟା, ଏକର ପିଛା ଧାନର ବିକ୍ରି ପରିମାଣ ବୃଦ୍ଧି କରିବା ଭଳି ବିଭିନ୍ନ ଦାବି ନେଇ ଚାଷୀମାନେ ରାଜରାସ୍ତାକୁ ଓହ୍ଳାଇଥିଲେ। ଚାଷୀମାନେ ରାଜ୍ୟ ସରକାରଙ୍କ ଧାନ ସଂଗ୍ରହ ନୀତି ଓ କେନ୍ଦ୍ର ସରକାରଙ୍କ ଆଇନ ବିରୋଧରେ ବର୍ଷିଥିଲେ। ମହାନଗର ନିଗମ କମିଶନର ଅନିରୁଦ୍ଧ ପ୍ରଧାନ ପହଞ୍ଚତ୍ ଚାଷୀମାନଙ୍କ ସହ ଆଲୋଚନା କରିବାକୁ ଡାକିଥିଲେ। ହେଲେ ଅନ୍ୟ ଜିଲାରେ ଚାଷୀମାନଙ୍କୁ ଗିରଫ କରାଯାଇଥିବା ଜାଣି ଆଲୋଚନାରେ ଭାଗ ନେବେ ନାହିଁ ବୋଲି କହିଥିଲେ। ରାଜ୍ୟଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ଆନ୍ଦୋଳନକୁ ନେଇ ଦେଇଥିବା ବୟାନକୁ ଚାଷୀମାନେ ନିନ୍ଦା କରିଥିଲେ। ସନ୍ଧ୍ୟା ୬ଟାରେ ପୋଲିସ ୧୫ ଜଣ ଚାଷୀଙ୍କୁ ଗିରଫ କରିବା ପରେ ପରିସ୍ଥିତି ସ୍ବାଭାବିକ ହୋଇଥିଲା।
ସମ୍ବଲପୁର ସମେତ ବରଗଡ ଜିଲାରେ ଜାତୀୟ ରାଜପଥ-୫୩ ଅତାବିରା ଓ ବରଗଡ ସହ ଦୁଇଟି ସ୍ଥାନରେ ରାସ୍ତାରୋକୋ ହୋଇଥିଲା। ଅତାବିରାଠାରେ ପୋଲିସ ଚାଷୀମାନଙ୍କୁ ଗିରଫ କରି ରାସ୍ତା ଅବରୋଧ ହଟାଇଥିଲା। ସେହିପରି ବଲାଙ୍ଗୀର ଜିଲା ବେଲପଡା ବ୍ଲକ କମ୍ପାଣୀ ଛକରେ ଚାଷୀମାନେ ଆନ୍ଦୋଳନ କରିଥିଲେ। ସୋନପୁର ଜିଲା ବୀରମହାରାଜପୁର ବ୍ଲକ୍ ଉଫୁଲା-କାନପୁର ଛକରେ ରାସ୍ତାରୋକୋ ହୋଇଥିଲା। ସୁନ୍ଦରଗଡ଼ ଜିଲାରେ ସବଡେଗା ବ୍ଲକ କରମଡିହି ଛକରେ ଆନ୍ଦୋଳନ ହୋଇଥିଲା। ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଭରତ ଚନ୍ଦ୍ର ସ୍ବାଇଁ, ତିବର ବେହେରା, ବାସନ୍ତ ମହାକୁଡ ପ୍ରମୁଖ ସାମିଲ ଥିଲେ। ସେହିପରି ଦେବଗଡ଼ ଜିଲା ପୁରୁଣାଗଡ଼ ପେଟ୍ରୋଲ ପମ୍ପ ନିକଟରେ ରାସ୍ତାରୋକୋ ହୋଇଥିଲା।
