ନୂଆଦିଲ୍ଲୀ,୧୧।୨: ୱେଷ୍ଟଇଣ୍ଡିଜ୍ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିବା ହାଇ-ଭୋଲଟେଜ୍ ମ୍ୟାଚ୍ରେ ୱେଷ୍ଟଇଣ୍ଡିଜ୍ ୩୦ ରନ୍ରେ ଚମତ୍କାର ବିଜୟ ହାସଲ କରିଛି। ୨୦୧୬ ଟି-୨୦ ବିଶ୍ୱକପ୍ ଫାଇନାଲ୍ ପରେ ବିଶ୍ୱକପ୍ ମଞ୍ଚରେ ଇଂଲଣ୍ଡ ବିପକ୍ଷରେ ଏହା ୱେଷ୍ଟଇଣ୍ଡିଜ୍ର ପ୍ରଥମ ବିଜୟ।
ଇଂଲଣ୍ଡ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ୱେଷ୍ଟଇଣ୍ଡିଜ୍ ମାତ୍ର ୭ଟି ବଲ୍ରେ ୨ଟି ୱିକେଟ୍ ହରାଇ ସଙ୍କଟରେ ପଡ଼ିଥିଲେ ମଧ୍ୟ ଶରଫେନ୍ ରଦରଫୋର୍ଡଙ୍କ ଅପରାଜିତ ୭୬ ରନ୍, ଜେସନ୍ ହୋଲ୍ଡରଙ୍କ ୩୩ ରନ୍ ଏବଂ ରଷ୍ଟନ ଚେଜ୍ଙ୍କ ୩୪ ରନ୍ ବଳରେ ଦଳ ୧୯୬ ରନ୍ର ଏକ ବିଶାଳ ସ୍କୋର ଛିଡ଼ା କରିଥିଲା। ଶେଷ ୫ ଓଭରରେ ଦଳ ୬୬ ରନ୍ ସଂଗ୍ରହ କରିଥିଲା।
୧୯୭ ରନ୍ର ଲକ୍ଷ୍ୟ ପିଛା କରି ଇଂଲଣ୍ଡ ନିୟମିତ ବ୍ୟବଧାନରେ ୱିକେଟ୍ ହରାଇଥିଲା। ଜାକବ୍ ବେଥେଲ୍ (୩୩), ସାମ୍ କରନ (ଅପରାଜିତ ୪୩) ଏବଂ ଅଧିନାୟକ ଜୋସ୍ ବଟଲର୍ (୨୧) ଚେଷ୍ଟା କରିଥିଲେ ହେଁ ଦଳକୁ ବିଜୟୀ କରାଇପାରିନଥିଲେ। ପୂର୍ବ ମ୍ୟାଚ୍ରେ ନେପାଳଠାରୁ ଅଳ୍ପକେ ବର୍ତ୍ତି ଯାଇଥିବା ଇଂଲଣ୍ଡ ପାଇଁ ଏହି ବିଶ୍ୱକପ୍ ଏପର୍ଯ୍ୟନ୍ତ ନୈରାଶ୍ୟଜନକ ରହିଛି। ଏହି ବିଜୟ ସହ ୱେଷ୍ଟଇଣ୍ଡିଜ୍ ପଏଣ୍ଟ ଟେବୁଲ୍ରେ ନିଜର ସ୍ଥିତି ମଜଭୁତ କରିଛି।
