କୋଲକାତା,୫।୩: ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ରାଜ୍ୟ ରାଜନୀତିରେ ଏକ ବଡ଼ ହଲଚଲ ଦେଖିବାକୁ ମିଳିଛି। ପଶ୍ଚିମବଙ୍ଗ ରାଜ୍ୟପାଳ ସି ଭି ଆନନ୍ଦ ବୋଷ ଗୁରୁବାର ନିଜ ପଦରୁ ଇସ୍ତଫା ଦେଇଛନ୍ତି। ଦିଲ୍ଲୀ ଗସ୍ତରେ ଥିବା ସମୟରେ ସେ ନିଜର ଇସ୍ତଫା ପତ୍ର ରାଷ୍ଟ୍ରପତିଙ୍କ ନିକଟକୁ ପଠାଇ ଦେଇଛନ୍ତି। ରିପୋର୍ଟ ମୁତାବକ ତାମିଲନାଡୁ ରାଜ୍ୟପାଳ ଆର.ଏନ. ରବିଙ୍କୁ ବର୍ତ୍ତମାନ ପଶ୍ଚିମବଙ୍ଗର ଅସ୍ଥାୟୀ ରାଜ୍ୟପାଳ ଭାବେ ଦାୟିତ୍ୱ ପ୍ରଦାନ କରାଯାଇଛି।
ଜଗଦୀପ ଧନଖଡ଼ ଉପରାଷ୍ଟ୍ରପତି ହେବା ପରେ, ୨୩ ନଭେମ୍ବର ୨୦୨୨ରେ ସି ଭି ଆନନ୍ଦ ବୋଷଙ୍କୁ ପଶ୍ଚିମବଙ୍ଗର ରାଜ୍ୟପାଳ ଭାବେ ନିଯୁକ୍ତି ମିଳିଥିଲା। ସେ ପ୍ରାୟ ୩ ବର୍ଷ ୫ ମାସ ଏହି ପଦରେ ରହିଥିଲେ। ନିଜ କାର୍ଯ୍ୟକାଳ ମଧ୍ୟରେ ସେ ମମତା ବାନାର୍ଜୀଙ୍କ ସରକାରର ନୀତିକୁ ନେଇ ବେଶ ମୁଖର ଥିଲେ, ଯାହାଫଳରେ ରାଜ୍ୟ ସରକାର ଓ ରାଜଭବନ ମଧ୍ୟରେ ଅନେକ ସମୟରେ ତିକ୍ତତା ଦେଖାଦେଇଥିଲା।
ଅପରପକ୍ଷେ ରାଜ୍ୟପାଳଙ୍କ ହଠାତ ଇସ୍ତଫା ଖବର ଶୁଣି ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ସେ କହିଛନ୍ତି, “ଏହି ଇସ୍ତଫା ପଛର କାରଣ ମୁଁ ଜାଣିନାହିଁ, କିନ୍ତୁ ନିର୍ବାଚନ ପୂର୍ବରୁ କେନ୍ଦ୍ର ଗୃହମନ୍ତ୍ରୀ କୌଣସି ରାଜନୈତିକ ଫାଇଦା ପାଇଁ ରାଜ୍ୟପାଳଙ୍କ ଉପରେ ଚାପ ପକାଇଥାଇ ପାରନ୍ତି।” ଏଥିସହ ଆର୍.ଏନ୍. ରବିଙ୍କ ନିଯୁକ୍ତି ପୂର୍ବରୁ ତାଙ୍କ ସହ କୌଣସି ପରାମର୍ଶ କରାଯାଇ ନ ଥିବାରୁ ସେ କେନ୍ଦ୍ର ସରକାରଙ୍କୁ ସମାଲୋଚନା କରିଛନ୍ତି। ଏହା ସଂଘୀୟ ବ୍ୟବସ୍ଥା ଉପରେ ଆକ୍ରମଣ ବୋଲି ସେ ଅଭିହିତ କରିଛନ୍ତି।
I am shocked and deeply concerned by the sudden news of the resignation of Shri C. V. Ananda Bose, the Governor of West Bengal.
The reasons behind his resignation are not known to me at this moment. However, given the prevailing circumstances, I would not be surprised if the…
— Mamata Banerjee (@MamataOfficial) March 5, 2026
ଅସ୍ଥାୟୀ ରାଜ୍ୟପାଳ ଭାବେ ନିଯୁକ୍ତ ହୋଇଥିବା ଆର.ଏନ. ରବି ଜଣେ ପୂର୍ବତନ ଆଇପିଏସ୍ ଅଫିସର ଏବଂ ସେ ସିବିଆଇ (CBI) ଓ ଆଇବି (IB) ରେ କାର୍ଯ୍ୟ କରିସାରିଛନ୍ତି। ତାମିଲନାଡୁରେ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନଙ୍କ ସହ ତାଙ୍କର ବିବାଦ ସାରା ଦେଶରେ ଜଣାଶୁଣା। ପଶ୍ଚିମବଙ୍ଗ ନିର୍ବାଚନ ପୂର୍ବରୁ ଜଣେ ପୂର୍ବତନ ପୋଲିସ ଅଫିସରଙ୍କୁ ରାଜ୍ୟପାଳ ଦାୟିତ୍ୱ ମିଳିବା ରାଜନୈତିକ ଦୃଷ୍ଟିକୋଣରୁ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି।
