ଭଞ୍ଜନଗର, ୩୦/୮ (ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗରସ୍ଥିତ କବିସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ସାମ୍ବାଦିକତା ଓ ଗଣଯୋଗାଯୋଗ ବିଭାଗ ପକ୍ଷରୁ ଯୁକ୍ତ ୩ର ନବାଗତ ଛାତ୍ରୀଛାତ୍ରଙ୍କୁ ଶନିବାର ସ୍ୱାଗତ କରାଯାଇଛି।ମହାବିଦ୍ୟାଳୟର ଅଧ୍ୟକ୍ଷ ଡ. ଗଗନ ବିହାରୀ ପୁରୋହିତ ସଭାରେ ଅଧ୍ୟକ୍ଷତା କରି ନବାଗତ ଛାତ୍ରୀଛାତ୍ରଙ୍କୁ ଶିକ୍ଷାଜୀବନରେ ନିଷ୍ଠା ଓ ଶୃଙ୍ଖଳାର ସହ ଆଗେଇବାକୁ ପରାମର୍ଶ ଦେଇଥିଲେ। ସାମ୍ବାଦିକତା କେବଳ ଏକ ବିଷୟ ନୁହେଁ, ଏହା ସମାଜ ପ୍ରତି ଦାୟିତ୍ୱବୋଧ ସହ ଜଡ଼ିତ ବୋଲି ସେ ମତବ୍ୟକ୍ତ କରିଥିଲେ।
ସଭାରେ ମହାବିଦ୍ୟାଳୟର ପ୍ରଶାସନିକ ଅଧିକାରୀ କୁମୁଦ ଚନ୍ଦ୍ର ମହାପାତ୍ର, ବଟନି ବିଭାଗର ବିଭାଗୀୟ ମୁଖ୍ୟ ଅଧ୍ୟାପିକା ସୁନିତା ରାଣୀ ଖଣ୍ଡୁଆଳ, ଇତିହାସ ବିଭାଗର ବିଭାଗୀୟ ମୁଖ୍ୟ ଡ. ରବୀନ୍ଦ୍ର କୁମାର ମିଶ୍ର ଓ ଅଧ୍ୟାପକ ଆର୍. ହରିଶ୍ ଅତିଥି ଭାବେ ଯୋଗଦେଇ ନବାଗତ ଛାତ୍ରୀଛାତ୍ରଙ୍କୁ ଶୁଭେଚ୍ଛା ଜଣାଇବା ସହ ନିଜ ଲକ୍ଷ୍ୟ ପ୍ରତି ଧ୍ୟାନ ଦେବାକୁ ପରାମର୍ଶ ଦେଇଥିଲେ।
ଗଣଯୋଗାଯୋଗ ବିଭାଗରେ ପୂର୍ବାପେକ୍ଷା ଅଧିକ ନିଯୁକ୍ତି ସୁଯୋଗ ରହିଛି। ତେଣୁ ଏହି ବିଭାଗରେ ପାଠ ପଢ଼ିବା ପାଇଁ ଛାତ୍ରୀଛାତ୍ରଙ୍କ ଆଗ୍ରହ ବଢ଼ୁଛି। ବିଭାଗର ଶିକ୍ଷାଦାନ, ପ୍ରାୟୋଗିକ ଶିକ୍ଷା, ସମ୍ବାଦ ଲେଖନ, ରେଡିଓ, ଟେଲିଭିଜନ ଓ ଡିଜିଟାଲ ମିଡିଆ ସମ୍ପର୍କରେ ଛାତ୍ରୀଛାତ୍ରଙ୍କୁ ଅବଗତ କରାଯାଇଥିଲା। ନବାଗତ ଛାତ୍ରୀଛାତ୍ରମାନେ ବିଭାଗର ଶିକ୍ଷକ ଓ ବରିଷ୍ଠ ଛାତ୍ରୀଛାତ୍ରଙ୍କ ସହ ମିଶି ଏକ ସୁସ୍ଥ ଶିକ୍ଷା ପରିବେଶ ଗଢ଼ି ତୋଳିବାକୁ ଅତିଥିମାନେ ଉପସ୍ଥିତ ଛାତ୍ରୀଛାତ୍ରଙ୍କୁ ଆହ୍ୱାନ କରିଥିଲେ।
ବିଭାଗୀୟ ମୁଖ୍ୟ ଅଧ୍ୟାପକ ବାବୁଲା ପ୍ରଧାନ ସଭାକୁ ସଂଯୋଜନା କରିଥିଲେ। କାର୍ଯ୍ୟକ୍ରମ ଆରମ୍ଭରେ ଛାତ୍ରୀ ରାଜଶ୍ରୀ ପରିଡ଼ା ସ୍ୱାଗତ ସଙ୍ଗୀତ ପରିବେଷଣ କରିଥିଲେ। ନବାଗତ ଛାତ୍ରୀଛାତ୍ରମାନେ ନିଜର ପରିଚୟ ପ୍ରଦାନ କରିବା ସହ ବିଭାଗରେ ନୂଆ ଶିକ୍ଷାଜୀବନ ଆରମ୍ଭ କରିଥିବାର ଅନୁଭୂତି ବ୍ୟକ୍ତ କରିଥିଲେ।
କାର୍ଯ୍ୟକ୍ରମର ସୁପରିଚାଳନାରେ ଛାତ୍ରୀ ସାକମ୍ବରୀ ଗୌଡ଼, ଅଲିଶା ବେହେରା, ତପସ୍ୱିନୀ ସ୍ୱାଇଁ, ସୁନିତା ବେହେରା, ପାୟଲ ରାଉତ, ଯାଜ୍ଞସିନୀ ଜେନା, ମନୀଷା ବରାଡ଼, ପାୟଲ ସ୍ୱାଇଁ, ସୁନୀତା ଗୌଡ଼, ପ୍ରଭାତୀ ଜେନା, ମନୀଷା ଭୂୟାଁ, ମୀରା ସ୍ୱାଇଁ, ପଲ୍ଲବୀ ନାଇକ, ସୌମ୍ୟାରାଣୀ ପ୍ରଧାନ ଓ ଝାନସୀ ରାଣୀ ପ୍ରଧାନଙ୍କ ସମେତ ଛାତ୍ର ରଞ୍ଜନ ନାୟକ, ସୁକେଶ ପାଲ, ରାକେଶ କୁମାର ଗୁରୁ, ରାଜେଶ ବେହେରା, ବଳରାମ ଗୌଡ଼, ବିଭୁ ପ୍ରଧାନ, ଅନୁରାଗ ନାଇକ, ଗଣେଶ ନାଇକ, ବିକାଶ କୁମାର ଡାଙ୍ଗୁଆ, ସୁରେଶ ପ୍ରଧାନ, ରାକେଶ ପ୍ରଧାନ, ଦୀପକ ନାଇକ, ନୀଳକଣ୍ଠ ପ୍ରଧାନ ଓ ଗୌରୀ ଶଙ୍କର ପାଣିଗ୍ରାହୀ ପ୍ରମୁଖ ସହଯୋଗ କରିଥିଲେ।