ଭୋପାଳ,୨୩।୧୧: ରାହୁଲ ଗାନ୍ଧୀଙ୍କ ନେତୃତ୍ୱରେ କଂଗ୍ରେସର ଭାରତ ଯୋଡୋ ଯାତ୍ରା ଆଜିକାଲି ମଧ୍ୟପ୍ରଦେଶରେ ଅଛି। ଏଠାରେ ସେ ବୁରହାନପୁରରେ ଏକ ରାଲିରେ ସମ୍ବୋଧିତ କରି ଭାଜପାକୁ ଟାର୍ଗେଟ୍ କରିଛନ୍ତି। ସେ କହିଛନ୍ତି, ମଧ୍ୟପ୍ରଦେଶରେ ଆମେ ନିର୍ବାଚନରେ ଜିତିଥିଲୁ, ଆମର ସରକାର ଥିଲା, କିନ୍ତୁ ୨୦-୨୫ ଦୁର୍ନୀତିଗ୍ରସ୍ତ ବିଧାୟକଙ୍କୁ କୋଟି କୋଟି ଟଙ୍କା ଦେଇ କିଣି ଭାଜପା ସରକାର ଗଠନ କରିଥିଲା। ଆମେ ବିରୋଧ କରିବାର ସମସ୍ତ ବାଟ ବନ୍ଦ ହୋଇଯାଇଥିଲା। ସଂସଦରେ କହିବାକୁ ଅନୁମତି ମିଳିଲା ନାହିଁ। ଗଣାମଧ୍ୟମକୁ ସେମାନେ କିଣିନେଲେ। ସରକାର ବିରୋଧୀଙ୍କ ସ୍ବରକୁ ଦମନ କରୁଛନ୍ତି। ସମସ୍ତ ଗଣତାନ୍ତ୍ରିକ ମାର୍ଗ ବନ୍ଦ ଯାଇଥିବାରୁ ଆମେ ଭାରତ ଯୋଡୋ ଯାତ୍ରା ଆରମ୍ଭ କରିଥିଲୁ। କଂଗ୍ରେସକୁ ସ୍ବର ଉତ୍ତୋଳନ କରିବାକୁ ଏହି ଯାତ୍ରା ଆରମ୍ଭ କରିବା ନିହାତି ଜରୁରୀ ଥିଲା। ଆମେ କନ୍ୟାକୁମାରୀରୁ ଦୁଇ ମାସ ପୂର୍ବରୁ ଏହି ଯାତ୍ରା ଆରମ୍ଭ କରିଛୁ। ଏପର୍ଯ୍ୟନ୍ତ ୩ ହଜାର କିଲୋମିଟର ଯାତ୍ରା କରିଛୁ ଏବଂ ଲକ୍ଷ ଲକ୍ଷ ଲୋକ ଏହି ଯାତ୍ରାରେ ସାମିଲ ହୋଇଛନ୍ତି। ଆଗକୁ ମଧ୍ୟ ଆମେ ଆହୁରି ଅନେକ ବାଟ ପଦଯାତ୍ରା କରିବୁ।
