କଟକ ଅଫିସ,୨୫ା୫: ଓଡ଼ିଆ ଫିଲ୍ମ ଷ୍ଟାର୍ ଦମ୍ପତି ଅନୁଭବ ମହାନ୍ତି ଓ ବର୍ଷା ପ୍ରିୟଦର୍ଶିନୀଙ୍କ ପାରିବାରିକ ବିବାଦ ମାମଲା ଉପରେ ମଙ୍ଗଳବାର କଟକ ଏସ୍ଡିଜେଏମ୍ କୋର୍ଟରେ ଶୁଣାଣି ହୋଇଛି। ଅନୁଭବଙ୍କ ପକ୍ଷରୁ ଦାଏର ହୋଇଥିବା ୨ ପିଟିଶନର ଶୁଣାଣି ଶେଷ କରି କୋର୍ଟ ତାଙ୍କ ରାୟ ସଂରକ୍ଷିତ ରଖିଛନ୍ତି। ନିଜ ପିଟିଶନରେ ଅନୁଭବ ଉଲ୍ଲେଖ କରିଛନ୍ତି ଯେ, ସେ ବର୍ଷାଙ୍କ ବିକଳ୍ପ ରହିଣି ପାଇଁ ଭଲ ବ୍ୟବସ୍ଥା କରିବେ ଏବଂ ସେ ବାବଦ ଖର୍ଚ୍ଚକୁ ଭରଣା କରିବେ। ନନ୍ଦିସାହି ସ୍ଥିତ ତାଙ୍କ ପୈତୃକ ବାସଭବନକୁ ବର୍ଷା ଛାଡ଼ନ୍ତୁ। ଯେହେତୁ ବର୍ଷା ତାଙ୍କ ମୂଳ ଆବେଦନରେ ବିକଳ୍ପ ରହଣି ବ୍ୟବସ୍ଥା ଚାହିଁଥିଲେ, ସେଥିରେ ସେ ରାଜି ଥିବା ଅନୁଭବ ପିଟିଶନରେ ଦର୍ଶାଇଛନ୍ତି। ନନ୍ଦିସାହିସ୍ଥିତ ବାସଭବନ ଏକ ଜଏଣ୍ଟ ପ୍ରପର୍ଟି। ସେଥିରେ ଅନୁଭବଙ୍କ ମା’ବାପା, ଭାଉଜ, ଭାଇ ସମସ୍ତଙ୍କ ଅଧିକାର ରହିଛି। ତେଣୁ ସେମାନଙ୍କୁ ସେହି ଘରେ ରହିବାକୁ ଦିଆଯାଉ। ଦାମ୍ପତ୍ୟ କଳିରେ ପରିବାରର ଅନ୍ୟ ସଦସ୍ୟଙ୍କୁ ହଇରାଣ କରାଯାଇପାରିବ ନାହିଁ ବୋଲି ଅନୁଭବଙ୍କ ଓକିଲ ସୁପ୍ରିମ୍କୋର୍ଟ ରାୟର ଉଦାହରଣ ଦେଇ କୋର୍ଟଙ୍କ ଦୃଷ୍ଟି ଆକର୍ଷଣ କରିଛନ୍ତି। ସେହିପରି ଅନ୍ୟ ଏକ ପିଟିଶନରେ ବର୍ଷାଙ୍କ ଭରଣପୋଷଣ ପାଇଁ ତାଙ୍କ ବାର୍ଷିକ ଆୟର ତଥ୍ୟ ମଗାଯାଇଛି।
ଅନ୍ୟପକ୍ଷରେ ବର୍ଷାଙ୍କ ଓକିଲ କୋର୍ଟଙ୍କୁ କହିଥିଲେ ଯେ, ଯେହେତୁ ବର୍ଷା ଏବେ ଏକୁଟିଆ, ତେଣୁ ସେ ବାହାରେ ରହିବା ଅସୁରକ୍ଷିତ। ସେ ବିନା ସୁରକ୍ଷାରେ ଏକାକୀ ଅନ୍ୟ ଘରେ ରହିପାରିବେ ନାହିଁ। କୋର୍ଟ ଉଭୟ ପକ୍ଷଙ୍କ ଯୁକ୍ତି ଶୁଣିବା ପରେ ରାୟକୁ ସଂରକ୍ଷିତ ରଖିଛନ୍ତି। ସୂଚନାଥାଉ କି, ଅନୁଭବ ତାଙ୍କ ବାପା ଓ ମା’ଙ୍କ ସହ ଅନ୍ୟତ୍ର ରହୁଥିବା ବେଳେ ତାଙ୍କ ନନ୍ଦିସାହିସ୍ଥିତ ବାସଭବନରେ ବର୍ଷା ରହୁଛନ୍ତି। ତେବେ ଅନୁଭବ ସୋସିଆଲ ମିଡିଆରେ ଅନେକ ଆପତ୍ତିଜନକ କଥା ଉଠାଇଛନ୍ତି, ଯାହା ତାଙ୍କର ଚରିତ୍ର ସଂହାର କରୁଛି ଏବଂ ସେ ମାନସିକ ନିର୍ଯାତନାର ଶିକାର ହେଉଛନ୍ତି ବୋଲି ଅଭିଯୋଗ କରି ମଙ୍ଗଳବାର ବର୍ଷାଙ୍କ ତରଫରୁ ଏସ୍ଡିଜେଏମ୍ କୋର୍ଟରେ ସାନି ପିଟିଶନ ଦାଏର ହୋଇଛି।
