ଲଣ୍ଡନ,୧୫।୧: ନିଜ ସମୟର ଶ୍ରେଷ୍ଠ ଇଂଲିଶ ଖେଳାଳି ବିବେଚିତ ହେଉଥିବା ଓ୍ବେନ ରୁନି ନିଜ ଜାଜ୍ଜୁଲ୍ୟମୟ କ୍ୟାରିୟରରେ ଟାଣିଛନ୍ତି ପୂର୍ଣ୍ଣଛେଦ। ଦ୍ୱିତୀୟ ସ୍ତରର କ୍ଲବ ଡର୍ବି କାଉଣ୍ଟି ମ୍ୟାନେଜର ପଦରେ ନିଯୁକ୍ତ ହେବା ପରେ ଶନିବାର ଏହି ଘୋଷଣା କରିଛନ୍ତି ପୂର୍ବତନ ମାଞ୍ଚେଷ୍ଟର ୟୁନାଇଟେଡ୍ ଖେଳାଳି। ସଂଘର୍ଷ କରୁଥିବା ଚାମ୍ପିୟନଶିପ୍ କ୍ଲବ ୩୫ ବର୍ଷୀୟ ରୁନିଙ୍କ ସହ ଅଢ଼େଇ ବର୍ଷ ଲାଗି ଚୁକ୍ତି କରିଛି।
ଅନ୍ତର୍ଜାତୀୟ ସ୍ତରରେ ରୁନି ୫୩ଟି ଗୋଲ ସ୍କୋର କରିଛନ୍ତି, ଯାହାକି ଇଂଲଣ୍ଡ ଖେଳାଳିଙ୍କ ମଧ୍ୟରେ ସର୍ବାଧିକ। ଆଉ ତାଙ୍କ ନାମରେ ରହିଛି ମାଞ୍ଚେଷ୍ଟର ୟୁନାଇଟେଡ୍ କ୍ଲବ ପାଇଁ ସର୍ବାଧିକ ଗୋଲ ସ୍କୋର କରବାର ରେକର୍ଡ। ଏକ ବର୍ଷ ତଳେ ଖେଳାଳି କମ୍ ଅନ୍ତରୀଣ କୋଚ୍ ଭାବେ ଏମ୍ଏଲ୍ଏସ୍ କ୍ଲବ ଡିସି ଛାଡ଼ି ଡର୍ବି କ୍ଲବରେ ଯୋଗ ଦେଇଥିଲେ ରୁନି। ନେଦରଲାଣ୍ଡର ଫିଲିପ କୋକୁଙ୍କ ସହ ଗତ ନଭେମ୍ବରରେ ସମ୍ପର୍କ ଛିନ୍ନ କରିବା ପରେ ରୁନି ଡର୍ବି ଦଳର ଅନ୍ତରୀଣ ମ୍ୟାନେଜର ଭାବେ କାର୍ଯ୍ୟ କରୁଛନ୍ତି।
ଅନ୍ତର୍ଜାତୀୟ ସ୍ତରରେ ଇଂଲଣ୍ଡର ସର୍ବକନିଷ୍ଠ ଖେଳାଳି ଭାବେ ଗୋଲ ସ୍କୋର କରିବାର ରେକର୍ଡ ରୁନିଙ୍କ ନାମରେ ରହିଛି। ୨୦୦୩ରେ ୧୭ ବର୍ଷ ବୟସରେ କ୍ୟାରିୟର ଆରମ୍ଭ କରିଥିବା ଫରଓ୍ବାର୍ଡ ଖେଳାଳି ୨୦୧୮ରେ ଇଂଲଣ୍ଡ ପକ୍ଷରୁ ଅନ୍ତିମ ଥର ପ୍ରତିନିଧିତ୍ୱ କରିଥିଲେ। ମାଞ୍ଚେଷ୍ଟର ୟୁନାଇଟେଡ୍ ପାଇଁ ରୁନି ୨୫୩ ଗୋଲ ସ୍କୋର କରିଥିଲେ, ଯାହାକି କ୍ଲବ ପାଇଁ ଆଜି ମଧ୍ୟ ଏକ ରେକର୍ଡ ହୋଇ ରହିଛି। ତାଙ୍କ ପ୍ରତିନିଧିତ୍ୱରେ ଏହି ଦଳ ହାତେଇ ଥିଲା ୫ ଥର ଲିଗ୍ ଟାଇଟଲ ଓ ଚାମ୍ପିୟନ୍ସ ଲିଗ୍ ଟ୍ରଫି। ଆଉ ଇଂଲଣ୍ଡ ପାଇଁ ସର୍ବାଧିକ ୧୨୦ ଅନ୍ତର୍ଜାତୀୟ ମ୍ୟାଚ୍ ଖେଳିବାର ରେକର୍ଡ ମଧ୍ୟ ତାଙ୍କ ନାମରେ ରହିଛି। ଏହା ଥିଲା ରୁନିଙ୍କ କ୍ୟାରିୟରର ଉଲ୍ଲେଖନୀୟ ବିଷୟ ଥିଲା।
