ଅମରପାଲି,୧ା୫(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ବହଳପଦର ଗ୍ରାମରେ ଥିବା ପାନୀୟ ଜଳ ଯୋଗାଣ ପ୍ରକଳ୍ପ ଗତ ୧୪ଦିନ ହେଲା ଅଚଳ ହୋଇ ପଡିଛି। ବାରମ୍ବାର ଅଭିଯୋଗ କଲେ ମଧ୍ୟ ମରାମତି କରାଯାଉ ନାହିଁ। ତେଣୁ ଏବେ ଗ୍ରାମରେ ଦେଖାଦେଇଛି ଉତ୍କଟ ପାନୀୟ ଜଳ ସମସ୍ୟା।
ଦୁଇୱାର୍ଡ ବିଶିଷ୍ଟ ବହଳପଦର ଗ୍ରାମର ଲୋକସଂଖ୍ୟା ପ୍ରାୟ ୨ ହଜାର। ଗ୍ରାମରେ ଥିବା ନଳକୂପଗୁଡିକରୁ ଆବଶ୍ୟକ ପାଣି ବାହାରୁ ନାହିଁ। ସଚଳ ଥିବା ନଳକୂପ ନିକଟରେ ପାଣି ବାଲଟିଏ ପାଇଁ ଲାଗୁଛି ଲମ୍ବା ଲାଇନ। ଯେଉଁ କେତୋଟିରୁ ପାଣି ବାହାରୁଛି ତାହା ଫ୍ଲୋରାଇଡ ଯୁକ୍ତ। ଫଳରେ ଲୋକେ ପାନୀୟ ଜଳଠୁ ଆରମ୍ଭ କରି ସ୍ନାନ ଶୌଚ ପାଇଁ ଗ୍ରାମର ପୋଖରୀ ଉପରେ ନିର୍ଭର କରୁଛନ୍ତି। ଗ୍ରାମରେ ଥିବା ଜଳଯୋଗାଣ ପ୍ରକଳ୍ପର ଟାଙ୍କି ଅଛି। ଟାଙ୍କିରୁ ପାଇପ ଯୋଗେ ଷ୍ଟାଣ୍ଡପୋଷ୍ଟକୁ ଜଳ ଯୋଗାଣ ହେଉଥିଲା। ହେଲେ ୧୪ ଦିନ ତଳେ ଗ୍ରାମର ଗଣ୍ଡ ସାହିରେ ଥିବା ସୋଲାର ପକଳ୍ପ ଅଚଳ ହେବାରୁ ପ୍ରକଳ୍ପ ଅଚଳ ହୋଇପଡିଛି। ପ୍ରକଳ୍ପ ଅଚଳ ପରେ ଗ୍ରାମବାସୀ ସ୍ଥାନୀୟ ଜନପ୍ରତିନିଧି ଏବଂ ବିଭାଗୀୟ ଅଧିକାରୀଙ୍କୁ ଜଣାଇଲେ ମଧ୍ୟ କେହି ଶୁଣୁ ନ ଥିବା ଅଭିଯୋଗ ହୋଇଛି।
ସୂଚନା ଅନୁସାରେ ପ୍ରକଳ୍ପର ସବୁ ଠିକ୍ ଥିଲେ ମଧ୍ୟ ଟ୍ରାନ୍ସଫର୍ମରରେ ଫ୍ୟୁଜ ରହୁ ନ ଥିବାରୁ ଜଳ ଯୋଗାଣ ହୋଇ ପାରୁନାହିଁ। ଗ୍ରୀଷ୍ମ ପ୍ରବାହକୁ ଦୃଷ୍ଟ ଦେଇ ଜିଲାପାଳ ଜଳ ପ୍ରକଳ୍ପଗୁଡିକୁ ତୁରନ୍ତ ମରାମତି କରି କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଥିଲେ ମଧ୍ୟ ବିଭାଗୀୟ ଅଧିକାରୀଙ୍କ ଅବହେଳା ଯୋଗୁଁ ତାହା କାର୍ଯ୍ୟକାରୀ ହୋଇପାରୁ ନାହିଁ। ତୁରନ୍ତ ପ୍ରକଳ୍ପ ମରାମତି କରା ନ ଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବାକୁ ଗ୍ରାମବାସୀ ଚେତାବନୀ ଦେଇଛନ୍ତି। ଏନେଇ ବିଡିଓ ମୋତିଲାଲ ସୁଲିଆଙ୍କୁ ପଚାରିବାରୁ ଖୁବ୍ଶୀଘ୍ର ପ୍ରକଳ୍ପ ମରାମତି କରି କାର୍ଯ୍ୟକ୍ଷମ କରାଯିବ ବୋଲି କହିଛନ୍ତି।
