ଜାମଟିକ୍ରା,୨୨।୩: ନାଁ ତାଙ୍କର ପରମାନନ୍ଦ ନାୟକ । ବୟସ ପାଖାପାଖି ୬୦ ହେବ। ସେ ବଲାଙ୍ଗୀର ଜିଲା ଟିଟିଲାଗଡ ଘୁଡାର ଗାଁର ମୂଳବାସିନ୍ଦା। ପରମାନନ୍ଦ ଅତାବିରା ସହରରେ ପ୍ରାୟ ୪୦ ବର୍ଷ ହେବ ରହିଆସୁଛନ୍ତି। ସହରରେ ଥିବା ଏକାଧିକ ଜଳଖିଆ ଦୋକାନକୁ ପାନୀୟ ଜଳ ଯୋଗାଇବା ତାଙ୍କ କାମ । ସେହି କାମ ହିଁ ତାଙ୍କୁ ପରିଚୟ ଦେଇଛି ବୋଲି ପରମାନନ୍ଦ କୁହନ୍ତି। ତାଙ୍କ ପରିବାର କହିଲେ ସ୍ତ୍ରୀ ଅହଲ୍ୟା ଓ ଗୋଟିଏ ଝିଅ। ଝିଅକୁ ସେ ବିବାହ ଦେଇ ସାରିଛନ୍ତି। ପରମାନନ୍ଦ ୨୦ବର୍ଷ ବୟସରୁ ଟିଟିଲାଗଡରୁ ଅତାବିରାକୁ ଆସିଥିଲେ କାମଧନ୍ଦା ଉଦ୍ଦେଶ୍ୟରେ। ସେହି ଦିନଠାରୁ ସେ ଅତାବିରାରେ ରହିଆସୁଛନ୍ତି। ତାଙ୍କ ସ୍ତ୍ରୀ ମଧ୍ୟ ଅନ୍ୟ ଲୋକଙ୍କ ଘରେ କାମ କରନ୍ତି। ସେଥିରୁ ମିଳୁଥିବା ପାରିଶ୍ରମିକରେ ଉକ୍ତ ଦମ୍ପତି ଚଳୁଥିଲେ। କିନ୍ତୁ କିଛି ଦିନ ତଳେ ସ୍ତ୍ରୀ ଅହଲ୍ୟାଙ୍କ ଗୋଡରେ ପଥର ପଡିଯିବାରୁ ସେ ଆଉ କାମ କରିପାରୁ ନାହାନ୍ତି। ଏବେ ପରମାନନ୍ଦ ସହରର ୧୦ଟି ଦୋକାନରେ ପାନୀୟ ଜଳ ଯୋଗାଇ ପାଉଥିବା ପାରିଶ୍ରମିକରେ ଉକ୍ତ ଦମ୍ପତି ଚଳୁଛନ୍ତି। ପରମାନନ୍ଦ ପ୍ରତିଦିନ ଭୋରସମୟରେ ଭାରରେ ପାଣି ବୋହି ବିଭିନ୍ନ ଦୋକାନକୁ ଯୋଗାନ୍ତି । ଏମିତି ଦିନ ୧୧ଟା ପର୍ଯ୍ୟନ୍ତ ଚାଲେ। ଉପର ବେଳା ବି ସାଢ଼େ ୩ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ପାଣି ଯୋଗାଇଥାନ୍ତି। ଗୋଟିଏ ଭାର ପାଣିରେ ତାଙ୍କୁ ମାତ୍ର ୧୦ ଟଙ୍କା ମିଳେ। ପାନୀୟ ଜଳ ଯୋଗାଇ ଦିନକୁ ୨ଶହରୁ ୩ ଶହ ଟଙ୍କା ରୋଜଗାର କରୁଥିବା ପରମାନନ୍ଦ କୁହନ୍ତି। ଅର୍ଥାଭାବରୁ ସେ ଘରଟିଏ ତିଆରି କରି ପାରିନାହାନ୍ତି। ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଖଣ୍ଡିଏ ମିଳିଲେ ଭଲ ହୁଅନ୍ତା ବୋଲି ପରମାନନ୍ଦ କହିଛନ୍ତି।
