ଚେନ୍ନାଇ, ୮।୧୧ : ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହୋଇଥିବାରୁ ତାମିଲନାଡୁ ଉତ୍ତର ଉପକୂଳ ଅଞ୍ଚଳରେ ଶନିବାର ରାତିରୁ ପ୍ରବଳ ବର୍ଷା ଜାରି ରହିଛି। ଫଳରେ ବହୁ ଅଞ୍ଚଳ ଜଳମଗ୍ନ ହେବା ସହ ଲୋକଙ୍କ ଘରେ ବର୍ଷାପାଣି ପଶିଯାଇଛି। ଲଗାଣ ବର୍ଷା ଯୋଗୁ ଚେନ୍ନାଇ ଜଳାର୍ଣ୍ଣବ ହୋଇଥିବାବେଳେ ସାଧାରଣ ଜୀବନଯାତ୍ରା ବ୍ୟାହତ ହୋଇଛି। ରବିବାର ପ୍ରଶାସନ ପକ୍ଷରୁ ପ୍ରାରମ୍ଭିକ ବନ୍ୟା ସତର୍କ ସୂଚନା ଜାରି କରାଯାଇଛି। ୨୦୧୫ ପରେ ଚେନ୍ନାଇ ଓ ଏହାର ଆଖପାଖ ଅଞ୍ଚଳରେ ଏହା ସର୍ବାଧିକ ବର୍ଷା ବୋଲି କୁହାଯାଉଛି। ଚେନ୍ନାଇ ଓ ଅନ୍ୟ ୩ଟି ଜିଲାରେ ପ୍ରବଳ ବର୍ଷା ଯୋଗୁ ଆଗାମୀ ଦୁଇଦିନ ପାଇଁ ସ୍କୁଲ୍ କଲେଜ ବନ୍ଦ କରିଦିଆଯାଇଛି। ବିଭିନ୍ନ ଅଞ୍ଚଳ ଜଳାର୍ଣ୍ଣବ ହୋଇଥିବାରୁ ଏହା ୨୦୧୫ ଚେନ୍ନାଇ ବନ୍ୟାର ଭୟାବହତାକୁ ମନେ ପକାଇଦେଉଛି। ରବିବାର ଦିନ ତମାମ ପ୍ରବଳରୁ ଅତି ପ୍ରବଳ ବର୍ଷା ଲାଗି ରହିଛି। ୧୦ ଘଣ୍ଟା ମଧ୍ୟରେ ଚେନ୍ନାଇରେ ୧୪ ସେଣ୍ଟିମିଟର ବର୍ଷା ରେକର୍ଡ କରାଯାଇଛି। ଆନ୍ନା ନଗର ଓ ସତ୍ୟ ନଗରରୁ ଲୋକଙ୍କୁ ସ୍ଥାନାନ୍ତର କରାଯାଇଛି। ମ୍ୟୁନିସିପାଲ ଅଧିକାରୀମାନେ କୋଲାଥୁର ଅଞ୍ଚଳକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି।
ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ ରବିବାର ଅନ୍ୟ ମନ୍ତ୍ରୀ ଓ ଅଫିସରମାନଙ୍କ ସହ ଚେନ୍ନାଇର ବନ୍ୟା ପ୍ରଭାବିତ ଅଞ୍ଚଳ ପରିଦର୍ଶନ କରିଛନ୍ତି। ଯେଉଁମାନେ ଦୀପାବଳି ପାଳନ ଲାଗି ନିଜ ଜନ୍ମସ୍ଥାନକୁ ଯାଇଥିଲେ, ସେମାନେ କିଛିଦିନ ପାଇଁ ଚେନ୍ନାଇ ନ ଫେରିବା ଲାଗି ଷ୍ଟାଲିନ ଅନୁରୋଧ କରିଛନ୍ତି। ରବିବାର ସକାଳେ ସେ ଚେନ୍ନାଇର ଏଗ୍ମୋର, ଡଟନ, କେଏନ୍ ଗାର୍ଡେନ, ପଡାଲମ, ନ୍ୟୁ ପ୍ୟାଲେସ୍ ରୋଡ, ଅଟ୍ଟେରି, କାନପୁର ହାଇରୋଡ ଆଦି ଅଞ୍ଚଳକୁ ଗସ୍ତ କରିଥିଲେ। ତୁରନ୍ତ ଜଳ ନିଷ୍କାସନ ବ୍ୟବସ୍ଥା କରିବା ସହ ଲୋକଙ୍କ ସମସ୍ୟାର ସମାଧାନ ଲାଗି ସେ ପ୍ରଶାସନକୁ ନର୍ଦ୍ଦେଶ ଦେଇଛନ୍ତି। ପାଣି ଘେରରେ ଥିବା ଲୋକମାନଙ୍କ ପାଖକୁ ୫୦ ହଜାର ଖାଦ୍ୟ ପୁଡ଼ିଆ ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ପଠାଯାଇଛି। ଜଳ ନିଷ୍କାସନ ଲାଗି ବିଭିନ୍ନ ଅଞ୍ଚଳରେ ୫୦୦ ବୃହତ୍ ମୋଟର ପମ୍ପ୍ ଲଗାଯାଇଛି। ଉଦ୍ଧାର କାର୍ଯ୍ୟରେ ଏନ୍ଡିଆର୍ଏଫ୍, ଅଗ୍ନିଶମ ଏବଂ ପୋଲିସକୁ ନିୟୋଜିତ କରାଯାଇଛି। ଇତିମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚେନ୍ନାଇ ବନ୍ୟା ସ୍ଥିତି ସମ୍ପର୍କରେ ଷ୍ଟାଲିନ୍ଙ୍କ ସହ କଥା ହୋଇଥିବା ଜଣାପଡ଼ିଛି।
