ବଡ଼ଗାଁ,୩୦ା୭( ଅଶୋକ ଷଢ଼ଙ୍ଗୀ)ସୁନ୍ଦରଗଡ ଜିଲା ବଡ଼ଗାଁ ବ୍ଲକ ଅଞ୍ଚଳର ସର୍ବାଧିକ ପରିବାର କୃଷି ଉପରେ ନିର୍ଭର କରନ୍ତି। ବିଶେଷକରି ବର୍ଷା ଜଳ ଉପରେ ନିର୍ଭର କରୁଥିବା ଚାଷୀ ବିଗତ କିଛିବର୍ଷ ହେଲା ଅନିୟମିତ କିମ୍ବା ସ୍ବଳ୍ପ ବର୍ଷା ଯୋଗୁ କ୍ଷତିଗ୍ରସ୍ତ ହୋଇଆସୁଛନ୍ତି। ଜଳବାୟୁ ପରିବର୍ତ୍ତନ ଓ ବିଶ୍ୱ ତାପନର ପ୍ରଭାବରେ ଚାଷ ଉଜୁଡି ଯାଉଛି। ପ୍ରତି ୨-୩ ବର୍ଷରେ ଧାନ ଚାଷ ପାଇଁ ପାଗ ପ୍ରତିକୂଳ ହେଉଥିବାରୁ ଅଞ୍ଚଳର ଚାଷୀମାନେ ସଫେଇ ନଦୀରେ ବ୍ୟାରେଜ ନିର୍ମାଣ କରି ଜମିକୁ ଜଳସେଚିତ କରିବାକୁ ବାରମ୍ବାର ଦାବି କରିଥିଲେ। ଏହାପରେ ନଦୀରେ ମେଗା ଜଳସେଚନ ପ୍ରକଳ୍ପ ନିର୍ମାଣ କରାଗଲା। କୋଟି କୋଟି ଟଙ୍କାରେ ପ୍ରକଳ୍ପ ନିର୍ମାଣ ହୋଇଥିଲେ ମଧ୍ୟ ଚାଷୀ ଉପକୃତ ହୋଇପାରୁନାହାନ୍ତି। ଚାଷୀମାନେ ଶନିବାର ମେଗା ପ୍ରକଳ୍ପ କାର୍ଯ୍ୟାଳୟକୁ ଯାଇ ଧାନ ତଳି ମରିବାକୁ ବସିଲାଣି, ଶୀଘ୍ର ପାଣି ଛାଡ଼ିବାକୁ ଦାବି କରିଥିଲେ ମଧ୍ୟ କେହି ଶୁଣି ନ ଥିଲେ। ସୂଚନାଯୋଗ୍ୟ ଯେ, ଚଳିତ ବର୍ଷ ଜୁନ ୨୪ରେ ପ୍ରଥମ ମୌସୁମୀ ବର୍ଷା ଅସରାଏ ହୋଇଥିଲା। ଜୁନ ୨୫ ଓ ୨୬ରେ ସାମାନ୍ୟ ବର୍ଷା ପରେ ଜୁଲାଇ ୧୬ ଓ ୧୭ରେ ମାତ୍ର କିଛି ସମୟ ପାଇଁ ଝିପିଝିପି ବର୍ଷା ହୋଇଥିଲା। ୨୨ ଓ ୨୩ ରାତିରେ ଭଲ ଅସରାଏ ବର୍ଷା ହୋଇଥିଲା। ଏହା ପରଠାରୁ ଆଉ ବର୍ଷା ହୋଇନାହିଁ। ପ୍ରଚଣ୍ଡ ଖରା ଯୋଗୁ ଜମି ଶୁଖି ଆଁ କରିଛି। ଫଳରେ ଚାଷ କାମ ଆଗେଇ ପାରୁନାହିଁ। ଏଭଳି ପରିସ୍ଥିତିରେ ମେଗା ଉଠା ଜଳ ସେଚନ ପ୍ରକଳ୍ପ ଉପରେ ନିର୍ଭର କରୁଥିବା ଚାଷୀଙ୍କ ବିଲକୁ ପାଣି ଛଡା ଯାଉନଥିବାରୁ ଚାଷୀଙ୍କ ଆଶା ମଉଳି ଯାଇଛି। ତେବେ ସଫେଇ ନଦୀ ଏକ ପ୍ରକାର ମୃତ୍ୟୁ ମୁହଁରେ ଥିବାବେଳେ ଏହାର ସୁରକ୍ଷା ପ୍ରତି ସରକାର ଦୃଷ୍ଟି ଦେଉନାହାନ୍ତି। ଏହି ନଦୀରେ ବ୍ୟାରେଜ୍ ନିର୍ମାଣ ପାଇଁ ଦାବି ହୋଇ ଆସୁଥିଲେ ମଧ୍ୟ ଏଥିପ୍ରତି କାହାର ନଜର ପଡୁନାହିଁ। ମେଗା ପ୍ରକଳ୍ପରୁ ବିଲକୁ ପାଣି ଯୋଗାଇଦେବା ପାଇଁ ବିଭିନ୍ନ ସ୍ଥାନରେ ୨୭୫ଟି ପଏଣ୍ଟ କରାଯାଇଛି। କିନ୍ତୁ ଚୋରମାନେ ଏହି ପଏଣ୍ଟରେ ଲାଗିଥିବା ସୋଲାର ପ୍ୟାନେଲ, ବ୍ୟାଟେର ଓ ଅନ୍ୟାନ୍ୟ ଯନ୍ତ୍ରାଂଶ ଚୋରି କରି ନେଉଥିବାରୁ ପ୍ରକଳ୍ପ ଠିକ୍ଭାବେ କାର୍ଯ୍ୟ କରୁନାହିଁ। ପ୍ରକଳ୍ପର ଅଧିକାରୀ ଓ କର୍ମଚାରୀ ଗାଁଗୁଡ଼ିକୁ ଯାଇ ଲୋକଙ୍କୁ ବୁଝାଇଥିଲେ ମଧ୍ୟ ଚୋରି ବନ୍ଦ ହୋଇପାରିନାହିଁ।
