ଭୁବନେଶ୍ୱର,୨୬ା୫(ବ୍ୟୁରୋ):ଦୀର୍ଘ ଦିନର ଦାବି ପୂରଣ ହେଉ ନ ଥିବାରୁ ଓଡ଼ିଶା ରାଜ୍ୟ ଅଣଗେଜେଟେଡ ପ୍ରାଣୀ ଚିକିତ୍ସା ବୈଷୟିକ କର୍ମଚାରୀ ସଂଘ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛି। ସେମାନଙ୍କ ଦାବି ପ୍ରତି ସରକାର କର୍ଣ୍ଣପାତ ନ କଲେ ଆସନ୍ତା ୨୮ରୁ ସେମାନେ ପ୍ରାଣୀ ଚିକିତ୍ସା ଜାରି ସହିତ ଡିଜିଟାଲ ଅସହଯୋଗ କରିବେ ବୋଲି ସଂଘ ପକ୍ଷରୁ କୁହାଯାଇଛି। ଗୁରୁବାର ଆୟୋଜିତ ଏକ ଖବରଦାତା ସମ୍ମିଳନୀରେ ସଂଘର ସାଧାରଣ ସମ୍ପାଦକ ବସନ୍ତ କୁମାର ସାହୁ କହିଛନ୍ତି, ରାଜ୍ୟରେ ଅଣଗେଜେଟେଡ ପ୍ରାଣୀ ଚିକିତ୍ସା ବୈଷୟିକ କର୍ମଚାରୀ ପଦବୀ ୪୭୦୦ ଥିବାବେଳେ ଏବେ ସେଥିରେ ପାଖାପାଖି ୨୪୦୦ କାର୍ଯ୍ୟରତ ଅଛନ୍ତି। ଦୀର୍ଘଦିନ ହେଲା ଏହି କର୍ମଚାରୀମାନେ ସେମାନଙ୍କ କ୍ୟାଡର ପୁନର୍ଗଠନ ପାଇଁ ଦାବି କରୁଛନ୍ତି। ଏଥିପାଇଁ ସରକାରଙ୍କ ଉପରେ କୌଣସି ଆର୍ଥିକ ବୋଝ ପଡିବାର ନାହିଁ। ଏହା କେବଳ କର୍ମଚାରୀମାନଙ୍କୁ ଏକ ମାନ୍ୟତା। ତଥାପି ସରକାରୀ ଉଦାସୀନତା ଯୋଗୁ ପ୍ରାଣୀଧନ ଚିକିସତ୍କ ଭାବେ ଚାକିରି ଆରମ୍ଭ କରୁଥିବା କର୍ମଚାରୀମାନେ ବିନା ପଦୋନ୍ନତିରେ ଅବସର ନେଇ ଯାଉଛନ୍ତି।
ସେହିଭଳି ପ୍ରାଣୀଧନ ଚିକିସତ୍କମାନେ ଅତି କମରେ ୨ ବର୍ଷର ତାଲିମ ନେବା ପରେ ଚାକିରିରେ ଭର୍ତ୍ତି ହେବା ପାଇଁ ସଂଘ ଦାବି କରୁଛି। ସଂଘର ନେତାମାନେ ସୂଚନା ଦେଇଛନ୍ତି ଯେ ବିଭାଗ ପକ୍ଷରୁ ବର୍ଷକୁ ପ୍ରାୟ ୩୫ କୋଟି ଟଙ୍କାର ୟୁଜର୍ସ ଫି’ ଆଦାୟ ହେଉଥିବା ବେଳେ ସେଥିରେ ପ୍ରାଣୀଧନ ନିରୀକ୍ଷକମାନଙ୍କ ଯୋଗଦାନ ୩୦ କୋଟିରୁ ଅଧିକ ରହୁଛିି। ଏଭଳି ସ୍ଥଳେ ବିନା ଆର୍ଥିକ ବୋଝରେ ସେମାନଙ୍କ କ୍ୟାଡର ପୁନର୍ଗଠନ ଦାବି ପୂରଣ ନ ହେବା ଅତ୍ୟନ୍ତ ଦୁର୍ଭାଗ୍ୟଜନକ। ରାଜ୍ୟ ସରକାରଙ୍କ ନିକଟରେ ବାରମ୍ବାର ଦାବି ଉପସ୍ଥାପନ ସତ୍ତ୍ୱେ ଏହା ପୂରଣ ହେଉନାହିଁ। ତେଣୁ ଚଳିତ ମାସ ୧୦ ତାରିଖରୁ ପ୍ରାଣୀଧନ ନିରୀକ୍ଷକମାନେ ପ୍ରତିକାତ୍ମକ ଆନ୍ଦେଳନ ଚଳାଇ ଆସୁଛନ୍ତି। ଏଥିରେ ରାଜ୍ୟରେ ପ୍ରାଣୀ ଚିକିତ୍ସା ଉପରେ କୌଣସି ପ୍ରଭାବ ପଡିନାହିଁ। ସଂଘର ସଭାପତି ଉପେନ୍ଦ୍ରନାଥ ରଣାଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ୩୦ ଜିଲାର ପ୍ରତିନିଧିମାନେ ଯୋଗ ଦେଇ ୨୭ ତାରିଖ ସୁଦ୍ଧା ସେମାନଙ୍କ ଦାବି ପୂରଣ ପାଇଁ ସରକାର ପଦକ୍ଷେପ ନ ନେଲେ ୨୮ ତାରିଖରୁ ଡିଜିଟାଲ ଅସହଯୋଗ କରାଯିବ ବୋଲି ଚେତାବନୀ ଦେଇଛନ୍ତି। ଏହାଦ୍ୱାରା ଗାଁ ଗହଳରେ ସରକାରଙ୍କ ଯୋଜନାଗୁଡିକ ପ୍ରଭାବିତ ହେବ। ଏହି ଖବରଦାତା ସମ୍ମିଳନୀରେ ସଂଘର ସାଧାରଣ ସମ୍ପାଦକ ବସନ୍ତ ସାହୁ, ରାମଚନ୍ଦ୍ର ନାୟକ, ପ୍ରଶାନ୍ତ ମିଶ୍ର, ଲଳିତେନ୍ଦୁ ଦଳାଇ, ଶୁଭେନ୍ଦୁ ମାଝି, ପ୍ରଶାନ୍ତ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ।
