କିଭ୍, ୨୪ା୫: ୟୁକ୍ରେନ୍ରେ ନିରୀହ ଜନସାଧାରଣଙ୍କୁ ହତ୍ୟା ଭଳି ଯୁଦ୍ଧ ଅପରାଧ ଘଟାଇଥିବା ଜଣେ ୨୧ ବର୍ଷୀୟ ରୁଷୀୟ ସୈନ୍ୟ ଭାଦିମ୍ ଶିଶିମାରିନଙ୍କୁ କିଭ୍ କୋର୍ଟ ସୋମବାର ଆଜୀବନ ଜେଲ ଦଣ୍ଡାଦେଶ ଶୁଣାଇଛନ୍ତି। ଗତ ଫେବୃୟାରୀ ୨୪ରେ ପଡ଼ୋଶୀ ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ପରଠୁ ଏହା ହେଉଛି କୌଣସି ରୁଷୀୟ ସୈନ୍ୟଙ୍କ ବିରୋଧରେ ପ୍ରଥମ ଦଣ୍ଡବିଧାନ। ୟୁକ୍ରେନ୍ ଜଜ୍ ସେର୍ହି ଆଗାଫୋନୋଭ୍ ରାୟ ଶୁଣାଇବାବେଳେ କହିଥିଲେ, ଫେବୃୟାରୀ ୨୮ରେ ଉଚ୍ଚ ଅଧିକାରୀଙ୍କଠାରୁ ନିର୍ଦ୍ଦେଶ ପାଇ ଭାଦିମ୍ ଉତ୍ତରପୂର୍ବ ୟୁକ୍ରେନ୍ର ଚୁପାଖିଭା ଗ୍ରାମରେ ଜଣେ ୬୨ ବର୍ଷୀୟ ନିରସ୍ତ୍ର ବୃଦ୍ଧଙ୍କ ମୁଣ୍ଡକୁ ଗୁଳି ଚଳାଇଥିଲେ। ଫଳରେ ତାଙ୍କର ମୃତ୍ୟୁ ଘଟିଥିଲା। ଗତ ୧୯ ତାରିଖରେ କୋର୍ଟରେ ଶୁଣାଣିବେଳେ ଭାଦିମ୍ ନିଜ ଦୋଷ ସ୍ବୀକାର କରିଥିଲେ। ଦଣ୍ଡବିଧାନବେଳେ ମୃତକଙ୍କ ସ୍ତ୍ରୀ ଉପସ୍ଥିତ ଥିଲେ। ଟ୍ରାଏଲ ବେଳେ ଭାଦିମ୍ ମୃତକଙ୍କ ସ୍ତ୍ରୀଙ୍କୁ କ୍ଷମା ମଧ୍ୟ ମାଗିଥିଲେ। ସେ ପ୍ରଥମେ ତାଙ୍କ ଉଚ୍ଚ ଅଧିକାରୀଙ୍କ କଥା ମାନି ନ ଥିଲେ। ହେଲେ ଏପରି କରିବାକୁ ତାଙ୍କୁ ପୁଣି ନିର୍ଦ୍ଦେଶ ଦିଆଯାଇଥିଲା ବୋଲି ଭାଦିମ୍ କହିଥିଲେ। ରୁଷିଆ ୟୁକ୍ରେନ୍ରେ ଅଦ୍ୟାବଧି ୧୦ ହଜାରରୁ ଊର୍ଦ୍ଧ୍ୱ ଯୁଦ୍ଧ ଅପରାଧ ଘଟାଇଥିବା କିଭ୍ ପକ୍ଷରୁ ଚିହ୍ନଟ କରାଯାଇଛି। ରୁଷିଆ ଆକ୍ରମଣରେ ଅନୂ୍ୟନ ୩,୮୩୮ ଜଣଙ୍କ ଜୀବନ ଯାଇଥିବା ଜାତିସଂଘ ସ୍ପଷ୍ଟ କରିଛି। ବୁଚା ଗଣହତ୍ୟା ପରେ ରୁଷିଆ ଜାତିସଂଘ ମାନବାଧିକାର ପରିଷଦ (ୟୁଏନ୍ଏଚ୍ଆର୍ସି) ସଦସ୍ୟତା ହରାଇଛି।
ଓ୍ବାର୍ କ୍ରାଇମ୍ ବା ଯୁଦ୍ଧ ଅପରାଧ ହେଉଛି ଯୁଦ୍ଧର ନିୟମ ଭଙ୍ଗ କରି ଉଦ୍ଦେଶ୍ୟ ପ୍ରଣୋଦିତ ଭାବେ ନିରସ୍ତ୍ର ନିରୀହ ନାଗରିକଙ୍କୁ ହତ୍ୟା କରିବା। ଯୁଦ୍ଧ ବନ୍ଦୀଙ୍କୁ ହତ୍ୟା କରିବା, ନିର୍ଯାତନା ଦେବା, ବନ୍ଧକ ରଖିବା ଏବଂ ଅନାବଶ୍ୟକ ଭାବେ ସାଧାରଣ ଜନତାଙ୍କ ସମ୍ପତ୍ତି ନଷ୍ଟ କରିବା ଏହି ଅପରାଧ ଅନ୍ତର୍ଭୁକ୍ତ। ଯୁଦ୍ଧ ସମୟରେ ଶତ୍ରୁପକ୍ଷ ରାଷ୍ଟ୍ରର ମହିଳାଙ୍କୁ ବଳାତ୍କାର କରିବା, ଶିଶୁଙ୍କୁ ମାରିବା, ଆମତ୍ସମର୍ପଣ ପରେ ମଧ୍ୟ ବଞ୍ଚତ୍ବା ସୁଯୋଗ ନ ଦେବା ଆଦି ଅଭିଯୋଗରେ ଧରାପଡ଼ିଥିବା ସୈନ୍ୟଙ୍କୁ ଯୁଦ୍ଧ ଅପରାଧୀ କୁହାଯାଏ। ସାର୍ବଭୌମ ରାଷ୍ଟ୍ରଗୁଡ଼ିକ ମଧ୍ୟରେ ଯୁଦ୍ଧ ଚାଲିଲେ ପ୍ରଚଳିତ ଅନ୍ତର୍ଜାତୀୟ ଆଇନକୁ ଉଲ୍ଲଂଘନ କରୁଥିବା ସୈନ୍ୟଙ୍କୁ ଏହି ଅପରାଧରେ ଦଣ୍ଡିତ କରାଯାଇଥାଏ।
