ବାସୁଦେବପୁର,୨୩ା୫, (ନାରାୟଣ ପ୍ରସାଦ ବାରିକ୍): ଭଦ୍ରକ ଜିଲା ବାସୁଦେବପୁର ଅଞ୍ଚଳ ବଙ୍ଗୋପସାଗର ତଟବର୍ତ୍ତୀ ସଂଲଗ୍ନ ନିର୍ବାଚନ ମଣ୍ଡଳୀ ଅଟେ। ଗତ ୧୯୯୯ ମହାବାତ୍ୟା ବେଳେ ଏହି ନିର୍ବାଚନ ମଣ୍ଡଳୀର ବ୍ୟାପକ କ୍ଷୟକ୍ଷତି ହୋଇଥିଲା। ପରବର୍ତ୍ତୀ ସମୟରେ ବାତ୍ୟା ଓ ପ୍ରାକୃତିକ ବିପର୍ଯ୍ୟୟ ଓ ଭୟଙ୍କର ବନ୍ୟା, ବାତ୍ୟାରୁ ଜନଜୀବନକୁ ସୁରକ୍ଷିତ କରିବା ପାଇଁ ଓଡ଼ିଶା ରାଜ୍ୟ ବିପର୍ଯ୍ୟୟ ପ୍ରଶମନ କର୍ତ୍ତୃପକ୍ଷ ବିଭାଗ ଆନୁକୂଲ୍ୟରେ ବହୁମୁଖୀ ବାତ୍ୟା ଆଶ୍ରୟସ୍ଥଳ ନିର୍ମାଣ କରିବାର ଯୋଜନା ହୋଇଥିଲା। ରାଜ୍ୟ ସରକାରଙ୍କର ଏହି ଯୋଜନା ପରବର୍ତ୍ତୀ ସମୟରେ ଧନଜୀବନ ରକ୍ଷା କ୍ଷେତ୍ରରେ ରକ୍ଷା କବଚ ସାଜିିଥିଲା। ତକତ୍ାଳୀନ ସମୟର ବାସୁଦେବପୁର ବିଧାୟକ ତଥା ପୂର୍ବତନ ମନ୍ତ୍ରୀ ସ୍ବର୍ଗତ ବିଜୟଶ୍ରୀ ରାଉତରାୟଙ୍କ ଉଦ୍ୟମରେ ବାସୁଦେବପୁର ଅଞ୍ଚଳରେ ପ୍ରାୟ ୩୯ଟି ବାତ୍ୟା ଆଶ୍ରୟସ୍ଥଳ ନିର୍ମାଣ କରିବାରେ ସଫଳ ହୋଇଥିଲେ। ବ୍ଲକର ୩୬ ପଞ୍ଚାୟତରେ ୩୮ଟି ଓ ପୌରପାଳିକାରେ ଗୋଟିଏକୁ ମିଶାଇ ମୋଟ ୩୯ଟି ବାତ୍ୟା ଆଶ୍ରୟସ୍ଥଳ ନିର୍ମାଣ କରାଯାଇଛି। ରାଜ୍ୟ ବିପର୍ଯ୍ୟୟ ପ୍ରଶମନ କର୍ତ୍ତୃପକ୍ଷଙ୍କ ସହଯୋଗରେ ୨୦୦୨ ମସିହାଠାରୁ ୪ଟି ପର୍ଯ୍ୟାୟକ୍ରମେ ରାଜ୍ୟ ସରକାରଙ୍କ ଉଦ୍ୟମରେ ଏହି ବାତ୍ୟା ଆଶ୍ରୟସ୍ଥଳ ନିର୍ମିତ ହୋଇଛି। ଏଥିମଧ୍ୟରୁ ୩୮ଟି ବାତ୍ୟାଶ୍ରୟସ୍ଥଳକୁ ଜରୁରୀ ଯନ୍ତ୍ରପାତି ଯୋଗାଣ ହୋଇଥିବା ବେଳେ ବାଲିମେଦରେ ନୂତନ କରି ନିର୍ମିତ ବାତ୍ୟା ଆଶ୍ରୟସ୍ଥଳକୁ ଉପକରଣ ଯୋଗାଣ ହୋଇନାହିଁ। ତେବେ ଏହି ୩୮ଟି ବାତ୍ୟାଶ୍ରୟସ୍ଥଳକୁ ଯୋଗାଇ ଦିଆଯାଇଥିବା ଜେନେରେଟର୍, ଆସ୍କା ଲାଇଟି ସମେତ ବିଭିନ୍ନ ଆବଶ୍ୟକ ଉପକରଣ ୨୯ଟି ବାତ୍ୟାଶ୍ରୟସ୍ଥଳରେ ଅଚଳ ଓ ନଷ୍ଟ ହୋଇଗଲାଣି।
ବ୍ୟବହାର ଓ ରକ୍ଷଣାବେକ୍ଷଣ ଅଭାବରୁ ସମସ୍ତ ଉପକରଣ ଆଉ କାମରେ ଆସୁନାହିଁ। ସେହିପରି ପ୍ରତିବର୍ଷ ଜୁନ୍ ୧୯ ତାରିଖରେ ବାତ୍ୟା ଆଶ୍ରୟସ୍ଥଳଗୁଡ଼ିକରେ ଗଚ୍ଛିତ ଥିବା ଉପକରଣ ଯାଞ୍ଚ କେବଳ କାଗଜ କଲମରେ ସୀମିତ ରହୁଛି। ବିଭିନ୍ନ ବାତ୍ୟାଶ୍ରୟ ସ୍ଥଳରେ ଯନ୍ତ୍ରପାତି ଖରାପ ଓ ନଷ୍ଟ ହୋଇଯାଇଥିବା ବେଳେ ନୂତନ ଉପକରଣ ବାତ୍ୟା ଆଶ୍ରୟସ୍ଥଳକୁ ଯୋଗାଇ ଦିଆଯାଉନାହିଁ କି ଏହାର ତଦାରଖ ମଧ୍ୟ ଠିକ୍ ଭାବେ କରାଯାଉନାହିଁ। ସେହିପରି ବିଭିନ୍ନ ବାତ୍ୟାଶ୍ରୟସ୍ଥଳ ଦୀର୍ଘ ଦିନ ଧରି ମରାମତି ହୋଇ ନ ଥିବାରୁ ଏହା ଅସୁରକ୍ଷିତ ହୋଇପଡ଼ିଲାଣି। ଅନ୍ୟ କେତେକରେ କବାଟ ଝରକା ନଷ୍ଟ ହୋଇଥିବା ବେଳେ କାନ୍ଥ ଫାଟିବା ସହ ଲାଇଟ୍ ଓ ପାଣିରେ ଅବ୍ୟବସ୍ଥା ଯୋଗୁ ନଷ୍ଟ ହେବାକୁ ବସିଲାଣି। ବନ୍ୟା, ବାତ୍ୟା ପ୍ରାକୃତିକ ବିପର୍ଯ୍ୟୟ ବେଳେ ଅଞ୍ଚଳବାସୀ ଆଶ୍ରୟ ନେବାକୁ ବାତ୍ୟାଶ୍ରୟସ୍ଥଳ ଉପରେ ଭରସା କରିପାରୁନାହାନ୍ତି। ଅଚଳ ଯନ୍ତ୍ରପାତିକୁ ସଚଳ କରିବା ଦିଗରେ ମଧ୍ୟ ପଦକ୍ଷେପ ନିଆଯାଉନାହିଁ। ଏଦିଗରେ ରାଜ୍ୟ ବିପର୍ଯ୍ୟୟ ପ୍ରଶମନ କର୍ତ୍ତୃପକ୍ଷ ଦୃଷ୍ଟି ଦେଇ ବାତ୍ୟା ଆଶ୍ରୟସ୍ଥଳର ରକ୍ଷଣାବେକ୍ଷଣ ଦିଗରେ ଗୁରୁତ୍ୱ ଦେବାକୁ ଅଞ୍ଚଳବାସୀଙ୍କ ପକ୍ଷରୁ ଦାବି କରାଯାଇଛି।
