ରାଉରକେଲା ଅଫିସ,୧୪।୬
(ବିପ୍ଳବ ରଞ୍ଜନ ଦାଶ)
ରାଉରକେଲା ଛେଣ୍ଡ୍ରେ ଥିବା ଭିଏସ୍ଏସ୍ ମାର୍କେଟରେ ବସିବା ସ୍ଥାନ, ଷ୍ଟ୍ରିଟ୍ ଲାଇଟ୍, ପାର୍କିଂ, ପାନୀୟ ଜଳ ସମସ୍ୟା ଦେଖାଦେଇଛି। ଫଳରେ ବ୍ୟବସାୟୀ ଓ ଗ୍ରାହକମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏ ଦିଗରେ ଆର୍ଏମ୍ସି କର୍ତ୍ତୃପକ୍ଷ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।
ରାଉରକେଲା ସହରର ଛେଣ୍ଡ୍ ଭିଏସ୍ଏସ୍ ମାର୍କେଟ ହେଉଛି ସହରର ବହୁ ପୁରୁଣା ମାର୍କେଟ। ଏହା ଉପରେ ଛେଣ୍ଡ, ସିଭିଲ ଟାଉନଶିପ୍, ବାସନ୍ତୀ କଲୋନୀ ଓ କଳିଙ୍ଗ ବିହାର ଅଞ୍ଚଳର ଲୋକମାନେ ନିର୍ଭର କରିଥାନ୍ତି। ସୋମବାର ଏବଂ ବୁଧବାର ସକାଳ ୭ଟାରୁ ରାତ୍ରି ୯ଟା ୧୫ ଯାଏ ମାର୍କେଟ ଚାଲେ। ସହର ଆଖପାଖ ଅଞ୍ଚଳରୁ ପରିବା, ରାଶନ, କପଡା ସମେତ ନିତ୍ୟ ବ୍ୟବହାର୍ଯ୍ୟ ଜିନିଷ ଆଣି ବ୍ୟବସାୟୀମାନେ ଏଠାରେ ବିକ୍ରିବଟା କରନ୍ତି। ଗ୍ରାହକ ଓ ବ୍ୟବସାୟୀମାନଙ୍କ ସୁବିଧା ଲାଗି ଆର୍ଏମ୍ସି ପକ୍ଷରୁ ମାର୍କେଟରେ ବିଭିନ୍ନ ସୁବିଧା ରହିଛି। ଯାନବାହନ ରଖିବା ପାଇଁ ୨ଟି ବୃହତ ପାର୍କିଂ ପ୍ଲେସ ଏବଂ ବ୍ୟବସାୟୀମାନଙ୍କ ବସିବା ପାଇଁ ୫୦ଟି ପିଣ୍ଡି ନିର୍ମାଣ ହୋଇଛି। ସବୁଆଡେ ଷ୍ଟିଟ୍ ଲାଇଟ୍ ଲଗାଯାଇଛି। ମାର୍କେଟ ପରିସରରେ ମୃଦୁ ପାନୀୟ ଜଳ ପ୍ରକଳ୍ପ ମଧ୍ୟ ସ୍ଥାପନ ହୋଇଛି। ଏତେସବୁ ବ୍ୟବସ୍ଥା ସତ୍ତ୍ୱେ ବର୍ତ୍ତମାନ ସେସବୁ ଗ୍ରାହକ ଓ ବ୍ୟବସାୟୀମାନଙ୍କ କାମରେ ଆସୁନାହିଁ ବୋଲି ଜୟଦେବ କର, ସୁଶୀଳା ମହନ୍ତ, ରମାକାନ୍ତ ବିନ୍ଦ ଓ ଗଣେଶ ଓରାମ ପ୍ରମୁଖ ଅଭିଯୋଗ କରିଛନ୍ତି। ମାର୍କେଟରେ ଲାଗିଥିବା ଷ୍ଟ୍ରିଟ୍ ଲାଇଟ ଗୁଡିକ ଜଳୁନାହିଁ। ପାର୍କିଂ ପ୍ଲେସ ପରିବର୍ତ୍ତେ ବଜାର ମୁଖ୍ୟରାସ୍ତାରେ ଯାନବାହନ ରହୁଥିବାରୁ ଟ୍ରାଫିକ ସମସ୍ୟା ସୃଷ୍ଟି ହୋଇଛି। ପିଣ୍ଡିରେ କୁଢ କୁଢ ଅଳିଆ ରହୁଥିବା ବେଳେ ସଫେଇ ହେଉନାହିଁ। ଫଳରେ ବ୍ୟବସାୟୀମାନେ ପିଣ୍ଡି ବଦଳରେ ରାସ୍ତା ଉପରେ ବସି ବିକ୍ରିବଟା କରୁଛନ୍ତି। ସେହିପରି ପାନୀୟ ଜଳ ପ୍ରକଳ୍ପର ୨ଟି ଟ୍ୟାପ୍ ଅଚଳ ଯୋଗୁ ଗ୍ରାହକ ଓ ବ୍ୟବସାୟୀ ପାଣି ମୁନ୍ଦେ ପାଇବାକୁ ଅସୁବିଧା ଭୋଗୁଛନ୍ତି। ଏ ନେଇ ଆର୍ଏମ୍ସି ଡେପୁଟି କମିଶନର ସୁଧାଂଶୁ ଭୋଇଙ୍କୁ ପଚାରିବାରୁ ମାର୍କେଟରେ ଯେଉଁ ସମସ୍ୟା ରହିଛି ତଦନ୍ତ କରି ସମାଧାନ କରାଯିବ ବୋଲି ସେ କହିଥିଲେ।
