ବାରିପଦା ଅଫିସ,୯।୨: ମୟୂରଭଞ୍ଜ ଜିଲା ବାଙ୍ଗରିପୋଷି ବ୍ଲକ କୁସୁମବନ୍ଧ ପଞ୍ଚାୟତ ଅନ୍ତର୍ଗତ ୩ ଗଁାର ଲୋକେ ପାଣି ସମସ୍ୟା ନେଇ ଭୋଟ ବର୍ଜନ କରିବେ ବୋଲି ଜିଲାପାଳଙ୍କୁ ଦାବିପତ୍ର ପ୍ରଦାନ କରିଛନ୍ତି। ଉକ୍ତ ଗ୍ରାମରେ ପାନୀୟ ଜଳର ଘୋର ସଙ୍କଟ ରହିଥିବା ବେଳେ ନେତାମନ୍ତ୍ରୀଙ୍କୁ ଗଁାରେ ପୁରାଇ ଦେବୁ ନାହିଁ ବୋଲି ଗ୍ରାମବାସୀ କହିଛନ୍ତି। ପ୍ରଥମେ ଆମକୁ ପିଇବାକୁ ପାଣି ଦିଅ ପରେ ଭୋଟ ନେବ ନଚେତ୍ ଭୋଟ ବର୍ଜନ କରିବୁ ବୋଲି କଡ଼ା ଚେତାବନୀ ଦେଇଛନ୍ତି।
ଅନୁଯାୟୀ ଶିମିଳିପାଳ ପାଦଦେଶରେ ଅବସ୍ଥିତ କୁସୁମବନ୍ଧ ପଞ୍ଚାୟତର ଜେଡାସାହି, କୁରୁକୁଟିଆ ଓ ଅସନଶିଖର ଗ୍ରାମରେ ପାନୀୟ ଜଳର ସଙ୍କଟ ଦୀର୍ଘ ଦିନ ଧରି ରହିଆସୁଛି। ଏହି ୩ ଗ୍ରାମରେ ପାଖାପାଖି ୪ହଜାରରୁ ଊର୍ଦ୍ଧ୍ୱ ଲୋକ ବସବାସ କରନ୍ତି। ପଥୁରିଆ ଅଞ୍ଚଳ ପାଇଁ ନଳକୂଅରୁ ପାଣି ଶୁଖିଯିବା ଫଳରେ ପାନୀୟ ଜଳ ପାଇଁ ସେମାନେ ପରିତ୍ୟକ୍ତ କୂଅ ଉପରେ ନିର୍ଭର କରି ଚଳିଆସୁଛନ୍ତି। ସେହିପରି ଫ୍ଲୋରାଇଡ ଅଞ୍ଚଳ ହୋଇଥିବାରୁ ପିଇବା ଅନୁପଯୋଗୀ ପାଣି ପାଇଁ ଗ୍ରାମର ଶିଶୁ ଓ ବୃଦ୍ଧାବୃଦ୍ଧମାନେ ବିଭିନ୍ନ ରୋଗରେ ଆକ୍ରାନ୍ତ ହେଉଛନ୍ତି। ନିର୍ବାଚନ ପାଖେଇ ଆସିଲେ ମାଳ ମାଳ ନେତା ଆସି ପ୍ରମୁଖ ସମସ୍ୟା ପାନୀୟ ଜଳ ଯୋଗାଇ ଦେବେ ବୋଲି କହି ମିଥ୍ୟା ପ୍ରତିଶ୍ରୁତି ଦେଇଥାନ୍ତି। ଭୋଟ ପାଇ ନିର୍ବାଚିତ ହେବା ପରେ କୌଣସି ନେତାଙ୍କ ମୁହଁ ଦର୍ଶନ କରିବାକୁ ମିଳୁ ନ ଥିବା ବେଳେ ସରକାରୀ ଯୋଜନା ଗୁଡିକ ଅପହଞ୍ଚ ସାଜିଛି। ଫଳରେ ଅଞ୍ଚଳବାସୀଙ୍କ ମୌଳିକ ସମସ୍ୟା ପ୍ରତି କାହାରି ଦୃଷ୍ଟି ପଡୁ ନ ଥିବାରୁ ଅଞ୍ଚଳବାସୀ ଭୋଟ ବର୍ଜନ କରିବାକୁ ନିଷ୍ପତ୍ତି ଗ୍ରହଣ କରିଥିବା ନେଇ ରଘୁନାଥ ମାରାଣ୍ଡି, ବନମାଳୀ ହାଁସଦା ପ୍ରକାଶ କରିଛନ୍ତି ା ଦୀର୍ଘ ବର୍ଷ ଧରି ଗ୍ରାମବାସୀ ପାନୀୟ ଜଳ ସମସ୍ୟାରେ ପଡ଼ି ହନ୍ତସନ୍ତ ହେଉଥିବା ବେଳେ ବିଭାଗ ପକ୍ଷରୁ ପାନୀୟ ଜଳଯୋଗାଣ ପାଇଁ ବ୍ୟବସ୍ଥା କରାଯାଇଥିଲା। ଜିଲା ଗ୍ରାମୀଣ ପାନୀୟ ଜଳ ଯୋଗାଣ ଆନୁକୂଲ୍ୟରେ ଓଭର ହେଡ୍ ଟାଙ୍କି ମାଧ୍ୟମରେ ଜଳ ଯୋଗାଣ ହେଉଥିବା ବେଳେ ପାଣି ପାଇପ୍ ଗୁଡ଼ିକ ଫାଟି ଯିବାରୁ ଲୋକଙ୍କ ନିକଟରେ ପାଣି ଅପହଞ୍ଚ ହୋଇପଡ଼ିଛି। ବାରମ୍ବାର ବିଡିଓ, ସରପଞ୍ଚ, ସମିତିସଭ୍ୟଙ୍କ ନିକଟରେ ଅଭିଯୋଗ କରିବା ପରେ ମଧ୍ୟ ପାଇପ୍ ଗୁଡିକ ମରାମତି କରାଯାଉ ନ ଥିବାରୁ ଗ୍ରାମରେ ଅସନ୍ତୋଷ ବୃଦ୍ଧି ପାଇଛି। ା
