ଢେଙ୍କାନାଳ ଅଫିସ,୧୮।୫ – ପ୍ରତିଭାବାନ୍ ଖେଳାଳିଙ୍କୁ ଉତ୍ତମ ପ୍ରଶିକ୍ଷଣ ଦେବା, ସେମାନେ ଯେପରି ରାଜ୍ୟ ଓ ଜାତୀୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରି ସଫଳତା ଆଣିବେ ସେଥିଲାଗି ୨୦୧୯ରୁ ଢେଙ୍କାନାଳ ଜିଲା ନରେନ୍ଦ୍ରପୁରସ୍ଥିତ ଟାଟାଷ୍ଟିଲ୍ ମେରାମଣ୍ଡଳୀ ପକ୍ଷରୁ ଆରମ୍ଭ ହୋଇଥିଲା ଉଦ୍ୟମ। କମ୍ପାନୀ ପକ୍ଷରୁ ନିୟୋଜିତ ପ୍ରଶିକ୍ଷକ, କ୍ରୀଡ଼ା ଭିତ୍ତିଭୂମିର ବିକାଶ ଏବଂ ଉତ୍ସାହୀ ଖେଳାଳିଙ୍କୁ ଆବଶ୍ୟକ ସମସ୍ତ ସହଯୋଗ ଯୋଗାଇ ଦେବା ପରେ ଗ୍ରାମାଞ୍ଚଳରେ ଭଲିବଲକୁ ନେଇ ସୃଷ୍ଟି ହୋଇଛି କ୍ରେଜ୍। ଜାତୀୟସ୍ତରୀୟ ଭଲିବଲ୍ କୋଚ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କମ୍ପାନୀ ପାର୍ଶ୍ୱବର୍ତ୍ତୀ ୧୫ ଗ୍ରାମର ୫୮୦ରୁ ଊର୍ଦ୍ଧ୍ୱ ପୁରୁଷ ଏବଂ ୭୦ ମହିଳା କ୍ରୀଡ଼ାବିତ୍ଙ୍କୁ ସ୍ବତନ୍ତ୍ର ତାଲିମ ଦିଆଯାଇ ଦକ୍ଷତା ବୃଦ୍ଧି କରାଯାଉଛି। ଜିଲାରେ ଭଲିବଲ୍ ଟ୍ରାକ୍କୁ ଫେରିଥିବାବେଳେ ଏହି ଲୋକପ୍ରିୟ ଖେଳକୁ ଆଗକୁ ନେବା ଲାଗି କମ୍ପାନୀ ପକ୍ଷରୁ କରାଯାଉଥିବା ଉଦ୍ୟମକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
କୋଚ୍ ଆଶୁତୋଷ ପାତ୍ରଙ୍କ କହିବା କଥା, କ୍ରୀଡ଼ା ଓ କ୍ରୀଡ଼ାବିତ୍ଙ୍କୁ ପ୍ରୋତ୍ସାହନ ଦେବା ଟାଟାଷ୍ଟିଲ୍ର ସୁଦୀର୍ଘ ପରମ୍ପରା ରହିଆସିଛି। କମ୍ପାନୀ ନିଜସ୍ବ ଏକାଡେମୀ ମାଧ୍ୟମରେ ହକି, ଫୁଟ୍ବଲ, ତୀରନ୍ଦାଜ ଭଳି କ୍ରୀଡ଼ାବିତ୍ଙ୍କ ଦକ୍ଷତାର ବିକାଶ କରାଯାଉଛି। ହିନ୍ଦୋଳ ବ୍ଲକ ରଘୁନାଥପୁର ଗ୍ରାମର ଭଲିବଲ ଖେଳାଳି ଆକାଶ ପାତ୍ର ଏବଂ ଖଲିବେରେଣା ଗ୍ରାମର ସୁବ୍ରତ ବେହେରା ଓଡ଼ିଶା ଭଲିବଲ ଦଳ ପାଇଁ ମନୋନୀତ ହୋଇଛନ୍ତି। ମେ’ ୧୦ରୁ ୧୫ ଯାଏ ମହାରାଷ୍ଟ୍ରର ଇସ୍ଲାମପୁରରେ ଆୟୋଜିତ ୨୪ତମ ଜାତୀୟ ଯୁବ ଭଲିବଲ ଚାମ୍ପିୟନଶିପ୍ରେ ଉଭୟେ ରାଜ୍ୟକୁ ପ୍ରତିନିଧିତ୍ୱ କରିଥିଲେ। ପ୍ରତିଭାବାନ ଗ୍ରାମୀଣ ଯୁବ ଖେଳାଳିଙ୍କୁ ପ୍ରଶିକ୍ଷଣ ଦେଇ ଆଗକୁ ନେବା ଆହ୍ବାନମୂଳକ ଥିଲା। ୨୦୧୯ରେ କମ୍ପାନୀ ପକ୍ଷରୁ ପଦକ୍ଷେପ ନିଆଯିବା ପରେ ଯୁବ କ୍ରୀଡ଼ାବିତ୍ମାନେ ଖେଳ ଏବଂ ଫିଟ୍ନେସ୍ ଉପରେ ଗୁରୁତ୍ୱ ଦେଇଥିଲେ। ପ୍ରଶିକ୍ଷଣ ନେଇଥିବା ଖେଳାଳିଙ୍କ ଭବିଷ୍ୟତ ଉଜ୍ଜ୍ୱଳ ବୋଲି କୋଚ୍ ଆଶୁତୋଷ କହିଛନ୍ତି। ରାଜ୍ୟ ଦଳରେ ସ୍ଥାନ ପାଇଥିବାରୁ ସୁବ୍ରତ କମ୍ପାନୀକୁ ଧନ୍ୟବାଦ ଜଣାଇଛନ୍ତି। କଠିନ ପରିଶ୍ରମ ଏବଂ କୋଚ୍ଙ୍କ ମାର୍ଗଦର୍ଶନରୁ ଏହି ସଫଳତା ମିଳିଛି। ଜାତୀୟସ୍ତରରେ ଓଡ଼ିଶାରୁ ପ୍ରତିନିଧିତ୍ୱ କରିବା ଚମତ୍କାର ଅନୁଭୂତି ଥିଲା ବୋଲି ସେ କହିଛନ୍ତି। ସେହିପରି କୋଚ୍ ଆଶୁତୋଷଙ୍କ ଦ୍ୱାରା ପ୍ରଶିକ୍ଷିତ ଖେଳାଳି ଆଶିଷ ଭୂତିଆ ମଧ୍ୟ ଜାତୀୟ ଭଲିବଲ ଚାମ୍ପିୟନଶିପ୍ରେ ଓଡ଼ିଶାରୁ ପ୍ରତିନିଧିତ୍ୱ କରି ଛାପ ଛାଡ଼ିଛନ୍ତି। ଓଡ଼ିଶା ସରକାରଙ୍କ କ୍ରୀଡ଼ା ଓ ଯୁବ ବ୍ୟାପାର ବିଭାଗ ପକ୍ଷରୁ ମେ’ ୧୬ରେ ଶେଷ ହୋଇଥିବା ଭୁବନେଶ୍ୱର ଜୋନ୍ ସପ୍ତାହାନ୍ତ ଭଲିବଲ କ୍ରୀଡ଼ା ପ୍ରତିଯୋଗିତାରେ ଟାଟାଷ୍ଟିଲ୍ ପ୍ରଶିକ୍ଷଣରେ ଖେଳୁଥିବା ୧୪ବର୍ଷରୁ କମ୍ ବାଳକ ଟିମ୍ ଚାମ୍ପିୟନ ହୋଇଥିଲା। ସେହିପରି ବହୁ ପ୍ରଶିକ୍ଷିତ ଖେଳାଳି ଜିଲା ଓ ରାଜ୍ୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରି ସଫଳତା ସାଉଁଟୁଛନ୍ତି।
୨୦୧୯ ଜୁନ୍ରୁ କମ୍ପାନୀ ନିକଟବର୍ତ୍ତୀ ମଙ୍ଗଳପୁର, ନୂଆହାଟ, ନୂଆଗଁା, ଶିବପୁର, ପାଇକ ପୁରୁଣାକୋଟ ଏବଂ କୁସୁପଙ୍ଗା ଆଦି ପଞ୍ଚାୟତ ଅନ୍ତର୍ଗତ ୧୫ ଗ୍ରାମର ୬୫୦ ମହିଳାପୁରୁଷ ଖେଳାଳି ଟାଟାଷ୍ଟିଲ୍ ସହାୟତାରେ ପ୍ରଶିକ୍ଷଣ ନେଉଛନ୍ତି। କମ୍ପାନୀ ପକ୍ଷରୁ ଆବଶ୍ୟକ ଭିତ୍ତିଭୂମିର ଉନ୍ନତି କରାଯାଇଛି। କ୍ରୀଡ଼ା ଉପକରଣ ମଧ୍ୟ ପ୍ରଦାନ କରାଯାଉଛି। ଖେଳାଳିଙ୍କୁ ଜୁନିୟର, ସବ୍ ଜୁନିୟର ଓ ସିନିୟର ବର୍ଗରେ ବିଭକ୍ତ କରି ପ୍ରଶିକ୍ଷଣ ଦିଆଯାଉଛି। ଖଲିବେରେଣା ଏବଂ ମଙ୍ଗଳପୁର ଗ୍ରାମରେ ସୌର ଲାଇଟ୍ ବ୍ୟବସ୍ଥା ଥିବା ଭଲିବଲ୍ କୋର୍ଟରେ ସନ୍ଧ୍ୟାରେ କ୍ରୀଡ଼ା ଅଭ୍ୟାସ କରାଯାଉଥିବା କମ୍ପାନୀ ପକ୍ଷରୁ ସୂଚନା ଦିଆଯାଇଛି।
