ଚଣ୍ଡିଖୋଲ,୧୩ା୩(ଡି.ଏନ୍.ଏ.):ବନ୍ୟା ଦାଉରୁ ରକ୍ଷା ପାଇଁ ନଦୀବନ୍ଧ ନିର୍ମାଣ କରାଯାଇଥାଏ। ଏହି ନଦୀବନ୍ଧର ସୁରକ୍ଷା ଦାୟିତ୍ୱ ଜଳସମ୍ପଦ ବିଭାଗ ହାତରେ ହିଁ ରହିଥାଏ। ମାତ୍ର ବିରୂପା ନଦୀର ଦକ୍ଷିଣ ପାର୍ଶ୍ୱ ବନ୍ଧ ପ୍ରତି ବିପଦ ଦେଖାଦେଇଛି। ଏବେ ଉକ୍ତ ନଦୀବନ୍ଧର ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ବଡ଼ଚଣା ବ୍ଲକ ଅଧୀନ ବାଲିଚନ୍ଦ୍ରପୁରଠାରୁ ବେଣୀପୁର ପର୍ଯ୍ୟନ୍ତ ଯାଇଥିବା ଉକ୍ତ ନଦୀବନ୍ଧର ରାସ୍ତା ନିର୍ମାଣ ପାଇଁ ଏହାକୁ ପୂର୍ତ୍ତ ବିଭାଗକୁ ହସ୍ତାନ୍ତର କରାଗଲା ପରେ ପୂର୍ତ୍ତ ବିଭାଗ ତରଫରୁ ରାସ୍ତା ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। କିନ୍ତୁ ରାସ୍ତା ପ୍ରଶସ୍ତୀକରଣ ଆଳରେ ନଦୀବନ୍ଧର ସୁରକ୍ଷା ପାଇଁ ଯେଉଁ ପଥର ପ୍ୟାକିଂ କରାଯାଇଥିଲା ତାହାକୁ ଠିକାସଂସ୍ଥା କାଢ଼ିଦେଇଛି। ତେଣୁ ବନ୍ୟା ଆସିଲେ ସେଠାରେ ପଡ଼ିଥିବା ନୂଆମାଟି ବନ୍ୟାଜଳ ରୋକିବାରେ ସହାୟକ ହୋଇପାରିବ ନାହିଁ। ପୂର୍ବରୁ ଏହି ନଦୀବନ୍ଧର କଳାଶ୍ରୀଠାରେ ୪ଥର ଘାଇ ସୃଷ୍ଟି ହୋଇଛି। ପତରାଜପୁରଠାରେ ଥରେ ଘାଇ ସୃଷ୍ଟି ହୋଇଛି। ସେଥିପାଇଁ ଘାଇ ବନ୍ଧାଇବା ସମୟରେ ଜଳସମ୍ପଦ ବିଭାଗ ତରଫରୁ ଏହାକୁ ପଥର ପ୍ୟାକିଂ କରାଯାଇଥିଲା। ପୂର୍ତ୍ତ ବିଭାଗର କାମ ନେଇଥିବା ଠିକାସଂସ୍ଥା ଏହି ପଥରଗୁଡ଼ିକ କାଢ଼ି ଦେଇଥିବା ବେଳେ ପୁନର୍ବାର ଘାଇ ହେବା ନେଇ ଆଶଙ୍କା ସୃଷ୍ଟି ହୋଇଛି।
ସୂଚନାଥାଉ କି, କେନ୍ଦ୍ରାପଡ଼ା ଜଳସମ୍ପଦ ବିଭାଗ ଅଧୀନରେ ରହିଥିବା ଏହି ନଦୀବନ୍ଧକୁ ୨୦୧୯ ଡିସେମ୍ବର ୨୩ରେ ଚାରବାଟିଆ ପୂର୍ତ୍ତ ବିଭାଗ ଡିଭିଜନକୁ ରାସ୍ତା ନିର୍ମାଣ ନିମନ୍ତେ ହସ୍ତାନ୍ତର କରାଯାଇଥିଲା। ପୂର୍ତ୍ତ ବିଭାଗ ତରଫରୁ ୨୨କୋଟି ଟଙ୍କା ବ୍ୟୟରେ ରାସ୍ତା କାର୍ଯ୍ୟ ଜାରି ରହିଛି। ୧୦ କିଲୋମିଟର ୨ଶହ ମିଟର ଲମ୍ବ ସମ୍ପୃକ୍ତ ନଦୀବନ୍ଧର କଳାଶ୍ରୀଠାରେ ପୂର୍ବରୁ ୪ଥର ଘାଇ ହୋଇଛି। ୧୯୫୫, ୧୯୭୨, ୧୯୮୨ ଓ ୨୦୦୧ରେ ଏଠାରେ ଘାଇ ସୃଷ୍ଟି ହୋଇ ୫ ପଞ୍ଚାୟତ ପାଇଁ ବିପଦ ସୃଷ୍ଟି କରିଥିଲା। ସେହିଭଳି ଏହି ବନ୍ଧର ପତରାଜପୁରଠାରେ ୨୦୦୧ରେ ଘାଇ ସୃଷ୍ଟି ହୋଇଥିଲା। ଏଠାରେ ଘାଇ ସୃଷ୍ଟିହେଲେ କେନ୍ଦ୍ରାପଡ଼ା ଜିଲା ପାଇଁ ବିପଦ। ଯେତେବେଳେ ବଡ଼ ବନ୍ୟା ହୋଇଛି ସେତେବେଳେ ଏଠାରେ ଘାଇ ହୋଇଛି। ପୂର୍ତ୍ତ ବିଭାଗ ତରଫରୁ ଟେଣ୍ଡର ସମୟରେ ଏହି ଘାଇ ସ୍ଥାନରେ ପଥର ପ୍ୟାକିଂ କରିବାକୁ ନିର୍ଦ୍ଦେଶନାମା ରହିଥିବାବେଳେ ଠିକାସଂସ୍ଥା ଏହାକୁ ନ ମାନି ସମ୍ପୃକ୍ତ ଚିହ୍ନଟ ଘାଇ ସ୍ଥାନରୁ ପଥରଗୁଡ଼ିକୁ ଅନ୍ୟତ୍ର ନେଇ ଯାଉଛି, ଯାହାଦ୍ୱାରା ବିପଦ ସୃଷ୍ଟି ହୋଇଛି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ପ୍ରଫୁଲ୍ଲ ବେହେରାଙ୍କୁ ପଚାରିବାରେ ସେ କହିଛନ୍ତି, ଯଦି ସେଠାରେ ପଥର ପ୍ୟାକିଂ ପୂର୍ବରୁ ଥିବ ତେବେ ନିଶ୍ଚିତ କରାଯିବ। ଜଳ ସମ୍ପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ପ୍ରମୋଦ ରାୟଙ୍କୁ ପଚାରିବାରେ ସେ କୁହନ୍ତି, ଯଦି ପୂର୍ତ୍ତ ବିଭାଗ ସେଠାରୁ ପଥର କାଢ଼ି ଦେଇଥାଏ ଆମେ ତାକୁ ପୁଣି ତୁରନ୍ତ ପଥର ପ୍ୟାକିଂ ପାଇଁ ନିର୍ଦ୍ଦେଶ ଦେବୁ।
