ନୂଆଦିଲ୍ଲୀ,୧।୧: ନୂଆ ବର୍ଷରେ ନୂଆ ଆରମ୍ଭ କରିବାକୁ ଭାରତୀୟ ଟିମ୍ ପ୍ରସ୍ତୁତ। ବିସିସିଆଇ ଶୁକ୍ରବାର ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ପାଇଁ ଦଳ ଘୋଷଣା କରିଛି। ନବନିଯୁକ୍ତ ଅଧିନାୟକ ରୋହିତ ଶର୍ମା ଆହତ ସମସ୍ୟାରୁ ସୁସ୍ଥ ହୋଇ ନ ଥିବା ହେତୁ ଦିନିକିଆ ଦଳର ନେତୃତ୍ୱ କେ.ଏଲ୍. ରାହୁଲଙ୍କୁ ଦିଆଯାଇଛି। ସେହିଭଳି ଦ୍ରୁତ ବୋଲର ଜସପ୍ରିତ ବୁମ୍ରା ସିରିଜରେ ଉପଅଧିନାୟକ ଭୂମିକା ତୁଲାଇବେ। ଏହାଛଡ଼ା ଦଳର ପୂର୍ବ ଅଧିନାୟକ ବିରାଟ କୋହଲି ଜଣେ ପ୍ରମୁଖ ବ୍ୟାଟ୍ସମ୍ୟାନ୍ ଭାବେ ନଜର ଆସିବେ।
କୋହଲି ୨୦୧୭ରୁ ସୀମିତ ଓଭର ଦଳର ଅଧିନାୟକ ଭାବେ ଦାୟିତ୍ୱ ନିର୍ବାହ କରୁଥିଲେ। ହେଲେ ଏହି ସିରିଜ ପୂର୍ବରୁ ତାଙ୍କ ହାତରୁ ନେତୃତ୍ୱ ଚାଲିଯିବ ବୋଲି ସେ କଳ୍ପନା କରି ନ ଥିଲେ। ବିଗତ ୪ ବର୍ଷ ମଧ୍ୟରେ ପ୍ରଥମ ଥର ଲାଗି ନୂଆ ଅଧିନାୟକଙ୍କ ଅଧୀନରେ ଖେଳୁଥିବା ନଜର ଆସିବେ ସେ।
ଜଣେ ଭଲ ଅଧିନାୟକ ହେଲେ ହେଁ କୋହଲିଙ୍କ ନେତୃତ୍ୱରେ କୌଣସି ଆଇସିସି ଟ୍ରଫି ଜିତିପାରି ନ ଥିଲା ଭାରତୀୟ ଦଳ। ଏହା ତାଙ୍କୁ ଅଧିନାୟକତ୍ୱରୁ ହଟାଇବାର ପ୍ରମୁଖ କାରଣ ପାଲଟିଲା। ଏବେ ଚାରି ବର୍ଷ ପରେ ନୂଆ ଅଧିନାୟକଙ୍କ ନେତୃତ୍ୱରେ ଖେଳିବାକୁ ଯାଉଥିବାରୁ ତାଙ୍କ ଉପରେ ସମସ୍ତଙ୍କ ନଜର ରହିବ। ବ୍ୟାଟ୍ସମ୍ୟାନ୍ ଭାବେ ତାଙ୍କ ପୁରୁଣା ଉପଲବ୍ଧି ସେ ହାସଲ କରିପାରିବେ କି ନାହିଁ ବୋଲି ଦେଖିବା ବାକି ରହିଲା।
