ନୂଆଦିଲ୍ଲୀ, ୨।୧୦: ୨୦୨୬ରେ ଦିନିକିଆ କ୍ରିକେଟରେ ଭାରତୀୟ ବ୍ୟାଟର୍ସଙ୍କ ଦବଦବା ଜାରି ରହିଛି। ଚଳିତ ବର୍ଷ ସର୍ବାଧିକ ODI ରନ କରିଥିବା ଟପ-୫ ବ୍ୟାଟର୍ସଙ୍କ ତାଲିକାରେ ଭାରତର ୩ ଜଣ ଖେଳାଳି ସ୍ଥାନ ପାଇଛନ୍ତି। ଶୁଭମନ ଗିଲ ଏହି ତାଲିକାର ଶୀର୍ଷରେ ଥିବାବେଳେ ବିରାଟ କୋହଲି ତୃତୀୟ ଏବଂ ରୋହିତ ଶର୍ମା ପଞ୍ଚମ ସ୍ଥାନରେ ଅଛନ୍ତି।
ଚଳିତ ବର୍ଷ ଶୁଭମନ ଗିଲ୍ଙ୍କ ବ୍ୟାଟରୁ ରନର ବର୍ଷା ଜାରି ରହିଛି। ୨୦୨୬ରେ ଏପର୍ଯ୍ୟନ୍ତ ୧୧ଟି ମ୍ୟାଚରେ ୧୦ଟି ଇନିଂସରେ ସେ ୮୯୪ ରନ କରିଛନ୍ତି। ୱେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ODIରେ ଗିଲ ଅପରାଜିତ ୨୨୩ ରନର ଧୂଆଁଧାର ପାଳି ଖେଳିଥିଲେ। ଏହି ପାଳି ପରେ ତାଙ୍କ ମୋଟ ରନ ୮୯୪ରେ ପହଞ୍ଚିଛି।
ଭାରତୀୟ ଦଳର ଅଭିଜ୍ଞ ବ୍ୟାଟର୍ ବିରାଟ କୋହଲି ମଧ୍ୟ ଚଳିତ ବର୍ଷ ରନ ତାଲିକାର ଟପ-୩ରେ ରହିଛନ୍ତି। ୮ଟି ଇନିଂସରୁ କୋହଲି ୫୫୨ ରନ କରିଥିବାବେଳେ ତାଙ୍କ ବ୍ୟାଟିଂ ଆଭେରେଜ ୭୮.୮୬ ରହିଛି। ୱେଷ୍ଟଇଣ୍ଡିଜ ବିପକ୍ଷ ପ୍ରଥମ ODIରେ ସେ ଅପରାଜିତ ୧୩୯ ରନର ବଡ଼ ପାଳି ଖେଳିଥିଲେ। ଦ୍ୱିତୀୟ ODIରେ କୋହଲିଙ୍କ ବ୍ୟାଟରୁ ୨୯ ରନ ଆସିଥିଲା।
ରୋହିତ ଶର୍ମା ମଧ୍ୟ ଚଳିତ ବର୍ଷ ସର୍ବାଧିକ ODI ରନ କରିଥିବା ବ୍ୟାଟର୍ଙ୍କ ଟପ-୫ରେ ସାମିଲ ହୋଇଛନ୍ତି। ୧୧ଟି ଇନିଂସରେ ତାଙ୍କ ନାମରେ ୫୧୨ ରନ ରହିଛି। ୱେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ODIରେ ରୋହିତ ୧୦୧ ରନ୍ର ଶତକୀୟ ପାଳି ଖେଳିଥିଲେ। ମାତ୍ର ୭୫ଟି ବଲରେ ଶତକ ପୂରଣ କରିଥିବା ରୋହିତ, ଶୁଭମନ ଗିଲଙ୍କୁ ସହ ମିଶି ୨୫୫ ରନର ବଡ଼ ଭାଗୀଦାରି ଗଢ଼ିଥିଲେ।
୧. ଶୁଭମନ ଗିଲ (ଭାରତ) ୮୯୪ ରନ
୨. ଜୋ ରୁଟ (ଇଂଲଣ୍ଡ) ୫୭୩ ରନ
୩. ବିରାଟ କୋହଲି (ଭାରତ) ୫୫୨ ରନ
୪. ଦୀପେନ୍ଦ୍ର ସିଂହ ଐରୀ (ନେପାଳ) ୫୧୩ ରନ
୫. ରୋହିତ ଶର୍ମା (ଭାରତ) ୫୧୨ ରନ
ଏହି ତାଲିକାରୁ ସ୍ପଷ୍ଟ ଯେ ୨୦୨୬ରେ ଭାରତୀୟ ବ୍ୟାଟିଂରେ ଶୁଭମନ ଗିଲ, ବିରାଟ କୋହଲି ଓ ରୋହିତ ଶର୍ମାଙ୍କ ଯୋଗଦାନ ଉଲ୍ଲେଖନୀୟ ରହିଛି। ଟପ-୫ରେ ଏକାସାଙ୍ଗେ ୩ ଜଣ ଭାରତୀୟ ବ୍ୟାଟର୍ସଙ୍କ ଉପସ୍ଥିତି ଚଳିତ ବର୍ଷର ODI ରନ ତାଲିକାର ଏକ ଉଲ୍ଲେଖନୀୟ ତଥ୍ୟ।