ନୂଆଦିଲ୍ଲୀ,୧୫।୧୦: ଅକ୍ଟୋବର ୧୭ରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ୱକପ୍। ପାକିସ୍ତାନ ବିପକ୍ଷରେ ଭାରତ ନିଜର ପ୍ରଥମ ମ୍ୟାଚ୍ ଅକ୍ଟୋବର ୨୪ରେ ଖେଳିବ। ଏହା ପୂର୍ବରୁ ଅଧିନାୟକ ବିରାଟ କୋହଲି ଏବଂ ଯୁବ ଉଇକେଟକିପର ବ୍ୟାଟ୍ସମ୍ୟାନ୍ ଋଷଭ ପନ୍ତଙ୍କ ଏକ ଟିଜର ରିଲିଜ ହୋଇଛି, ଯାହାକି ବେଶ ଭାଇରାଲ ହେଉଛି।
ଟୁର୍ନାମେଣ୍ଟ ଆରମ୍ଭ ହେବା ପୂର୍ବରୁ ଷ୍ଟାର ସ୍ପୋଟ୍ସ ପକ୍ଷରୁ ଭାରତର ଅଭ୍ୟାସ ମ୍ୟାଚ୍କୁ ନେଇ ଏକ ପ୍ରମୋ ରିଲିଜ କରାଯାଇଛି। ପ୍ରମୋରେ କୋହଲି ଏବଂ ପନ୍ତ ଦଳ ଚୟନକୁ ନେଇ କଥାବାର୍ତ୍ତା କରୁଛନ୍ତି। ପନ୍ତ ଭାରତ ଏକାଦଶରେ ନିଜର ଚୟନକୁ ନେଇ କୋହଲିଙ୍କୁ ଅନୁରୋଧ କରୁଛନ୍ତି। ଏହାର ଜବାବରେ ତାଙ୍କ ପାଖରେ ବହୁତ ବିକଳ୍ପ ଅଛି ବୋଲି କହୁଛନ୍ତି ବିରାଟ।
ଭିଡିଓ ଆରମ୍ଭ ହେବା ମାତ୍ରେ କୋହଲି କହୁଛନ୍ତି, ଋଷଭ ଟି-୨୦ରେ କେବଳ ଛକା ହିଁ ମ୍ୟାଚ୍ ଜିତାଇପାରେ। ପନ୍ତ କୁହନ୍ତି, ଭାଇ ଚିନ୍ତା କରନ୍ତୁ ନାହିଁ, ମୁଁ ସବୁବେଳେ ଅଭ୍ୟାସ କରୁଛି। ମନେ ଅଛି ନା ଭାରତକୁ ଜଣେ ଉଇକେଟକିପର୍ ଛକା ମାରି ବିଶ୍ୱକପ୍ ବିଜେତା କରାଇଥିଲେ। ଏହାଶୁଣି କୋହଲି କୁହନ୍ତି, ହଁ, ମାହି ଭାଇଙ୍କ ପରେ ସେଭଳି ଉଇକେଟକିପର ଆଜିଯାଏ ମିଳିଲାନି। ଜବାବରେ ପନ୍ତ କୁହନ୍ତି, ଭାଇ, ମୁଁ ଅଛି ନା ଆପଣଙ୍କ କିପର୍। କୋହଲି କୁହନ୍ତି, କିପର୍ ତ ମୋ ପାଖରେ ବହୁତ ଅଛି, ଅଭ୍ୟାସ ମ୍ୟାଚ୍ରେ କିଏ ଖେଳିବ ସେ ବିଷୟରେ ଭାବିବା।
କହିରଖୁଛୁ, ବିଶ୍ୱକପ୍ରେ ନିଜ ଅଭିଯାନ ଆରମ୍ଭ କରିବା ପୂର୍ବରୁ ଦୁଇଟି ଅଭ୍ୟାସ ମ୍ୟାଚ୍ ଖେଳିବ ଭାରତ।
