ସେଞ୍ଚୁରିଆନ,୨୯।୧୨: ଭାରତୀୟ ଟେଷ୍ଟ ଅଧିନାୟକ ବିରାଟ କୋହଲି ବିନା କୌଣସି ଅନ୍ତର୍ଜାତୀୟ ଶତକରେ ୨୦୨୧ ବର୍ଷ ଶେଷ କରିଛନ୍ତି। କ୍ରମାଗତ ଦ୍ୱିତୀୟ ଥର ପାଇଁ ଗୋଟିଏ ବର୍ଷରେ ଥରେ ହେଲେ ତିନି ସଂଖ୍ୟା ବିଶିଷ୍ଟ ସ୍କୋର ଛୁଇଁପାରି ନାହାନ୍ତି କୋହଲି। ୨୦୨୦ରେ ମଧ୍ୟ ସେ ଅନ୍ତର୍ଜାତୀୟ କ୍ରିକେଟରେ ଶତକ ହାସଲ କରିପାରି ନ ଥିଲେ। ୨୦୧୯ରେ ବାଂଲାଦେଶ ବିପକ୍ଷ ଦିବାରାତ୍ର ଟେଷ୍ଟରେ କୋହଲି ହାସଲ କରିଥିଲେ ଅନ୍ତିମ ତଥା ୭୦ତମ ଶତକ।
ବର୍ଷର ଶେଷ ତଥା ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟର ଦ୍ୱିତୀୟ ଇନିଂସରେ କୋହଲି ୧୮ ରନ୍ କରି ଆଉଟ୍ ହୋଇଥିଲେ। ପ୍ରଥମ ପାଳି ଭଳି ଦ୍ୱିତୀୟ ଇନିଂସରେ ମଧ୍ୟ ଅଫ୍ ଷ୍ଟମ୍ପର ଖୁବ ବାହାର ବଲକୁ କଭର ଡ୍ରାଇଭ କରିବାକୁ ଯାଇ ଧରାପଡ଼ିଥିଲେ ଉଇକେଟ ପଛରେ। ଗତ ଦୁଇ ବର୍ଷ ହେଲା କୋହଲି କ୍ୟାରିୟରର ୭୧ତମ ଅନ୍ତର୍ଜାତୀୟ ଶତକ ଅପେକ୍ଷାରେ ଅଛନ୍ତି।
