କରୋନା ଭୂତାଣୁ ଯୋଗୁ ସାରା ବିଶ୍ୱରେ ଲକ୍ଷ ଲକ୍ଷ ଲୋକ ରୋଜଗାର ହରାଇଛନ୍ତି। ଅନେକ ଲୋକ ଦୀର୍ଘମାସ ଧରି ବେକାର ଅଛନ୍ତି ଏବଂ ନୂତନ ଚାକିରିର ସୁଯୋଗ ମଧ୍ୟ ହ୍ରାସ ପାଇଛି। ଏପରି ଜଣେ ବେକାର ବ୍ୟକ୍ତି ଟୁଇଟରରେ କିଛି ବାର୍ତ୍ତା ଲେଖିଛନ୍ତି, ଯାହା ପଢ଼ି ଅନେକ ଲୋକ ତାଙ୍କୁ ସହାୟତା କରିବାକୁ ଆଗେଇ ଆସିଛନ୍ତି। ସେ ଟୁଇଟର ପେଜ୍ରେ ଲେଖିଛନ୍ତି ‘ମୁଁ ଭଲ ନାହିଁ’। ତାଙ୍କର ବାର୍ତ୍ତା ଏତେମାତ୍ରାରେ ଭାଇରାଲ ହେଲା ଯେ, ପ୍ରାୟ ୧ ଲକ୍ଷ ଲୋକ ତାଙ୍କୁ ଉତ୍ସାହ ଏବଂ ସାହାଯ୍ୟର ବାର୍ତ୍ତା ପଠାଇଛନ୍ତି।
ସେ ଲେଖିଛନ୍ତି, ‘ମୁଁ ଭଲ ନାହିଁ, ବହୁତ ଖରାପ ଅନୁଭବ କରୁଛି। ଯଦି ଏହି ଟୁଇଟ୍ ଉପରେ ଆପଣଙ୍କ ନଜର ପଡ଼େ ତେବେ ଦୟାକରି କିଛି ସେକେଣ୍ଡ ବାହାର କରନ୍ତୁ ଏବଂ ହ୍ୟାଲୋ କୁହନ୍ତୁ। ଧନ୍ୟବାଦ।
ସୋସିଆଲ ମିଡିଆରେ ଏପରି ଖୋଲାଖୋଲି ନିଜର ଭାବନାକୁ ପ୍ରକାଶ କରିଛନ୍ତି ୫୧ ବର୍ଷୀୟ ଏଡମଣ୍ଡ୍ ଓଲୋରୀ। ସେ ବ୍ରିଟେନରେ ରୁହନ୍ତି। ତାଙ୍କର ଏହି ଟୁଇଟ୍ ଉପରେ ଦୁଇ ଦିନରେ ୧୮ ହଜାରରୁ ଅଧିକ ଲୋକ ରିଟୁଇଟ୍ କରିଛନ୍ତି। ଏଡମଣ୍ଡଙ୍କ ଟୁଇଟ୍ ଉପରେ ଜଣେ ୟୁଜର ଲେଖିଛନ୍ତି, ଆମେ ଦୁହେଁ ଦୁହିଁଙ୍କୁ କେହି ଜାଣିନେ। ମାତ୍ର ଏତିକି ଜାଣିଛି, ଅଧିକାଂଶ ଲୋକ ଆପଣଙ୍କ ପରି ମନେ କରୁଛନ୍ତି। ଚଳିତବର୍ଷ ସମସ୍ତଙ୍କ ପାଇଁ ବେଶ୍ ଭାରୀ ପଡ଼ିଛି। ସେହିପରି ଆଉ ଜଣେ ୟୁଜର ଲେଖିଛନ୍ତି, ଆପଣ ଏକା ନୁହନ୍ତି, ଭଲ ଦିନ ଆସୁଛି। ଆଉ ଜଣେ ୟୁଜର ଲେଖିଛନ୍ତି, ଆପଣ ଖୋଲା ଅନୁଭବ ବାଣ୍ଟି ଅନ୍ୟମାନଙ୍କୁ ଉତ୍ସାହିତ କଲେ।
ତେବେ ସ୍ତ୍ରୀଙ୍କଠାରୁ ଛାଡ଼ପତ୍ର ହୋଇଥିବା ଏଡମୁଣ୍ଡ ଦୀର୍ଘଦିନ ଧରି ମାନସିକ ସ୍ତରରେ ଆଘାତ ପାଇଆସୁଥିଲେ। ସେ କହିଛନ୍ତି, ସାଧାରଣ ଦିନରେ ଡିପ୍ରେସନର ଶିକାର ହେବା ଅଲଗା କଥା। କିନ୍ତୁ ମହାମାରୀ ସମୟରେ ଡିପ୍ରେସନର ମୁକାବିଲା କରିବା ବହୁତ କଷ୍ଟ।
ଗତ ୧୮ ମାସ ଧରି ଏଡମୁଣ୍ଡ ବେକାର ଅଛନ୍ତି। ଏହାପୂର୍ବରୁ ସେ ମାନସିକ ସ୍ବାସ୍ଥ୍ୟ ପରାମର୍ଶଦାତା ଭାବରେ କାର୍ଯ୍ୟ କରୁଥିଲେ। ସେ କହିଛନ୍ତି, କରୋନା ମହାମାରୀ ସହିତ ଚଳିତବର୍ଷ ସେମାନଙ୍କର ମାନସିକ ସ୍ବାସ୍ଥ୍ୟ ଉପରେ ବହୁତ ଖରାପ ପ୍ରଭାବ ପକାଇଛି।
