ମୁମ୍ବାଇ: କରୋନା ମହାମାରୀ ସମୟରେ ଖୁବ୍ ଚର୍ଚ୍ଚାକୁ ଆସିଛନ୍ତି ବଲିଉଡ୍ ଖଳନାୟକ ସୋନୁ ସୁଦ। ଫିଲ୍ମରେ ସେ ଯେତିକି ପରିଚିତ ଥିଲେ ଏବେ ତା’ଠାରୁ ଅଧିକ ପରିଚିତ ହୋଇଛନ୍ତି ତାଙ୍କ ବଦାନ୍ୟତା ପାଇଁ। କରୋନା ମହାମାରୀ ସମୟରେ ପ୍ରବାସୀଙ୍କୁ ଘରେ ପହଞ୍ଚାଇବା ହେଉ କି ଆବଶ୍ୟକଥିବା ଲୋକଙ୍କୁ ଯେମିତି ଭାବେ ସାହାଯ୍ୟ କରିବାକୁ ହେଉ ସବୁଥିରେ ସୋନୁ ସହଯୋଗର ହାତ ବଢାଇଛନ୍ତି। ତାଙ୍କର ଏହି ବଦାନତା ପାଇଁ ସେ ପାଲଟି ଯାଇଛନ୍ତି ରିୟଲ ଲାଇଫ୍ ହିରୋ। ଏହାସହ ତାଙ୍କ ପର୍ସନାଲ ଲାଇଫରେ ଫ୍ୟାନ୍ ଫଲୋଇଙ୍ଗ ସଂଖ୍ୟା ମଧ୍ୟ ବଢି ଯାଇଛି। ନିକଟରେ ତାଙ୍କର ଜଣେ ପ୍ରଶଂସକ ତାଙ୍କୁ ଏମିତି ଏକ ସରପ୍ରାଇଜ୍ ଦେଇଛନ୍ତି ଯାହାକୁ ଦେଖି ସେ ଆଶ୍ଚର୍ଯ୍ୟ ହୋଇଯାଇଛନ୍ତି। ଏବେ ସୋସିଆଲ ମିଡିଆରେ ସୋନୁଙ୍କର ଏକ ଭିଡିଓ ଭାଇରାଲ ହେବାରେ ଲାଗିଛି। ଭିଡିଓଟି ‘ଇଣ୍ଡିଆଜ୍ ବେଷ୍ଟ ଡ୍ୟାନ୍ସର’ ସେଟ୍ର। ଏହି ଭିଡିଓରେ ସୋନୁ କହିଛନ୍ତି, ମୁଁ ‘ଇଣ୍ଡିଆଜ୍ ବେଷ୍ଟ ଡ୍ୟାନ୍ସର’ ସେଟ୍ରେ ଅଛି। ଯେଉଁଠି ମୁଁ ମୋ ପ୍ରଶଂସକଙ୍କ ସହ ମିଶିଛି। ସେଠାରେ ସେ ଶୁଭମ ନାମକ ଜଣେ ପ୍ରଶଂସକଙ୍କୁ ଭେଟିଛନ୍ତି। ଆଉ ଶୁଭମ ତାଙ୍କ ହାତରେ ସୋନୁଙ୍କ ଟାଟୁ କରିଥିବା ଦେଖି ଅଭିନେତା ଆଶ୍ଚର୍ଯ୍ୟ ହୋଇଯାଇଛନ୍ତି। ଏହାସହ ସେ ଶୁଭମଙ୍କୁ ଏମିତି ନ କରିବାକୁ ଅନୁରୋଧ କରିଛନ୍ତି। କେବଳ ଶୁଭମ ନୁହେଁ କେହିବି ଏମିତି ନ କରନ୍ତୁ ବୋଲି ସୋନୁ ଅନୁରୋଧ କରିଛନ୍ତି।
