ନୂଆଦିଲ୍ଲୀ,୧୭।୨:ଲଦାଖକୁ ରାଜ୍ୟ ମାନ୍ୟତା ଏବଂ ଷଷ୍ଠ ଅନୁଚ୍ଛେଦ ଅନୁଯାୟୀ ସାମ୍ବିଧାନିକ ସୁରକ୍ଷା ଯୋଗାଇଦେବା ଦାବିରେ ଲଦାଖର ବିଭିନ୍ନ ସଂଗଠନ ଦିଲ୍ଲୀର ଯନ୍ତରମନ୍ତରରେ ବୁଧବାର ବିକ୍ଷୋଭ ପ୍ରଦର୍ଶନ କରିଥିଲେ। ସେମାନଙ୍କ ଦାବି ପୂରଣ ନ ହେଲେ ଆନ୍ଦୋଳନକୁ ଜୋର୍ଦାର କରାଯିବ ବୋଲି ଲଦାଖ ଗ୍ରୁପ୍ ପକ୍ଷରୁ ଗୁରୁବାର କୁହାଯାଇଛି। ଲଦାଖରେ ଗଣତନ୍ତ୍ର ପ୍ରତି ସାଲିସ କରାଯାଉଛି ଏବଂ ନିଷ୍ପତ୍ତି ନେବାରେ ସ୍ଥାନୀୟ ଲୋକଙ୍କୁ ସୁଯୋଗ ଦିଆଯାଉ ନାହିଁ ବୋଲି ଲଦାଖ ଆପେକ୍ସ ବଡି ଏବଂ କାର୍ଗିଲ ଡେମୋକ୍ରାଟିକ୍ ଆଲିଆନ୍ସ ତରଫରୁ ପରିବେଶ କର୍ମୀ ତଥା ଶିକ୍ଷାବିତ୍ ସୋନମ ଓ୍ବାଙ୍ଗ୍ଚୁକ୍ ଏକ ଖବରଦାତା ସମ୍ମିଳନୀରେ କହିଛନ୍ତି। ବିନା ବ୍ୟବସ୍ଥାପିକାରେ ଲଦାଖ କେନ୍ଦ୍ରଶାସିତ ଅଞ୍ଚଳ ହେବ ବୋଲି ଆମେ କେବେ କଳ୍ପନା କରି ନ ଥିଲୁ। ଜନସାଧାରଣଙ୍କ ଅଂଶଗ୍ରହଣ ବିନା ଲଦାଖ ପାଇଁ ବଜେଟ ମଞ୍ଜୁର ହେବ କିପରି ବୋଲି ଓ୍ବାଙ୍ଗ୍ଚୁକ୍ ପ୍ରଶ୍ନ କରିଛନ୍ତି।
ଉପରୋକ୍ତ ସଂଗଠନର ‘ଚଲୋ ଦିଲ୍ଲୀ’ ଡାକରାରେ ବହୁସଂଖ୍ୟାରେ ଲୋକ ବୁଧବାର ଯନ୍ତରମନ୍ତରରେ ଏକାଠି ହୋଇଥିଲେ। ପରିବେଶ ସୁରକ୍ଷା ଲାଗି ଲଦାଖ ପରିବେଶବିତ୍ ସୋନମ ଓ୍ବାଙ୍କଚୁକ୍ଙ୍କ ୫ ଦିନିଆ ଅନଶନ ଏହି ପ୍ରସଙ୍ଗକୁ ଜାତୀୟ ସ୍ତରରେ ଦୃଷ୍ଟି ଆକର୍ଷଣ କରାଇଥିଲା। ଇତିମଧ୍ୟରେ ଲଦାଖର ପ୍ରଥମ ଉପରାଜ୍ୟପାଳ ଆର୍.କେ. ମାଥୁରଙ୍କ ସ୍ଥାନରେ ଅରୁଣାଚଳପ୍ରଦେଶର ପୂର୍ବତନ ରାଜ୍ୟପାଳ ବ୍ରିଗେଡିୟର ବି.ଡି. ମିଶ୍ରା ଦାୟିତ୍ୱ ଗ୍ରହଣ କରିଛନ୍ତି। ଆନ୍ଦୋଳନକୁ ନିୟନ୍ତ୍ରଣ କରିବାରେ ବିଫଳ ହେବାରୁ ମାଥୁରଙ୍କୁ ବଦଳାଗଲା ବୋଲି ବିଶ୍ୱାସ କରାଯାଉଛି। ଲେହର ବୌଦ୍ଧଧର୍ମାବଲମ୍ବୀ ଏବଂ କାର୍ଗିିଲର ମୁସଲମାନମାନେ ୪ ଦାବି ପୂରଣ ଲାଗି ହାତ ମିଳାଇଛନ୍ତି। ସେଗୁଡ଼ିକ ହେଲା ରାଜ୍ୟ ମାନ୍ୟତା ପ୍ରଦାନ, ଷଷ୍ଠ ଅନୁଚ୍ଛେଦ ଅନୁଯାୟୀ ସାମ୍ବିଧାନିକ ସୁରକ୍ଷା, ଲେହ ଓ କାର୍ଗିଲ ପାଇଁ ଅଲଗା ଲୋକ ସଭା କ୍ଷେତ୍ର ଏବଂ ନିଯୁକ୍ତି କ୍ଷେତ୍ରରେ ସଂରକ୍ଷଣ ବ୍ୟବସ୍ଥା।
