ଭୁବନେଶ୍ୱର,୧୬।୯:ଦେଶର ପ୍ରମୁଖ ଘରୋଇ କମ୍ପାନୀ ଜିନ୍ଦଲ ଷ୍ଟିଲ୍ ଆଣ୍ଡ ପାୱାର (ଜେଏସ୍ପି)ର କର୍ପୋରେଟ ସାମାଜିକ ଦାୟିତ୍ୱବୋଧ (ସିଏସ୍ଆର୍) କାର୍ଯ୍ୟକ୍ରମ ଅଧୀନରେ ଜାରି ରହିଥିବା କାର୍ଯ୍ୟ ଓ ଯୋଜନାଗୁଡ଼ିକର ବାସ୍ତବ ସ୍ଥିତ ସମ୍ପର୍କରେ ଅବଗତ ନିମନ୍ତେ ଜେଏସ୍ପିର ପରିଚାଳନା ନିର୍ଦ୍ଦେଶକ ବିମଳେନ୍ଦ୍ର ଝା ନିକଟରେ ଏକ ସମୀକ୍ଷା ବୈଠକ ସହ କ୍ଷେତ୍ର ପରିଦର୍ଶନ କରିଥିଲେ। ବିଶେଷକରି ଝା ଜେଏସ୍ପି ଫାଉଣ୍ଡେଶନ ଦ୍ୱାରା ଅନୁଗୋଳ ଜିଲାରେ କାର୍ଯ୍ୟକାରୀ ହେଉଥିବା କମ୍ପାନୀର ବିଭିନ୍ନ ସିଏସ୍ଆର୍ କାର୍ଯ୍ୟ ପରିସର ଆଦି ବୁଲି ଦେଖିଥିଲେ। ସେହିଭଳି ଦିବ୍ୟାଙ୍ଗମାନଙ୍କ ନିମନ୍ତେ ଜେଏସ୍ପି ଫାଉଣ୍ଡେଶନ ଦ୍ୱାରା ପରିଚାଳିତ ଆଶା ଦି ହୋପ୍ କେନ୍ଦ୍ରକୁ ଝା ପ୍ରଥମେ ପରିଦର୍ଶନକରି କେନ୍ଦ୍ରର ୯୪ ଭିନ୍ନକ୍ଷମ ଶିଶୁ ଏବଂ ସେମାନଙ୍କ ପିତାମାତାଙ୍କ ସହ କଥାବାର୍ତ୍ତା କରିଥିଲେ। ଏହା ପରେ ଡିଏଭି ସାବିତ୍ରୀ ଜିନ୍ଦଲ ବିଦ୍ୟାଳୟ ପରିଦର୍ଶନ କରି ସ୍ଥାନୀୟ ଅଞ୍ଚଳର ଛାତ୍ରୀଛାତ୍ରମାନଙ୍କ ସହିତ କଥାବାର୍ତ୍ତା କରିବା ସହ ଲାବ୍ ଆଧାରିତ ଶ୍ରେଣୀଗୃହ ବ୍ୟବସ୍ଥା କରିବା ପାଇଁ ଝା ପରାମର୍ଶ ଦେଇଥିଲେ। ସେହିପରି ଜିନ୍ଦଲ ଜନଜୀବିକା କେନ୍ଦ୍ରରେ ମହିଳାମାନଙ୍କ ଦ୍ୱାରା କରାଯାଉଥିବା ବିଭିନ୍ନ ଔଦ୍ୟୋଗିକ କାର୍ଯ୍ୟଗୁଡିକୁ ମଧ୍ୟ ସେ ବୁଲି ଦେଖିଥିଲେ। ସ୍ବୟଂ ସହାୟକ ଗୋଷ୍ଠୀର ମହିଳାମାନେ ପ୍ରସ୍ତୁତ କରୁଥିବା ବିଭିନ୍ନ ସାମଗ୍ରୀର ବଜାର ସଂଯୋଗକୁ ଅଧିକ ଦୃଢ଼ କରିବା ପାଇଁ ସେ ପରାମର୍ଶ ଦେଇଥିଲେ। ଏହା ବ୍ୟତୀତ ବାସୁଦେବପୁର କମ୍ୟୁନିଟି ସେଣ୍ଟରରେ ସ୍ବସ୍ତି ଏକ୍ସପ୍ରେସ୍ କାର୍ଯ୍ୟକ୍ରମର ସ୍ବାସ୍ଥ୍ୟ ଶିବିରରେ ଡାକ୍ତରୀ ଦଳ ସହ କଥାବାର୍ତ୍ତା କରିଥିଲେ। ଜେଏସ୍ପି ଫାଉଣ୍ଡେଶନର କିଶୋରୀ ଏକ୍ସପ୍ରେସ୍ରେ ହିମୋଗ୍ଲୋବିନ ପରୀକ୍ଷା କରୁଥିବା କିଶୋରୀମାନଙ୍କ ସହ ମଧ୍ୟ ସେ କଥାବାର୍ତ୍ତା କରିଥିଲେ।
