ଭବାନୀପାଟଣା,୪।୯(ଉତ୍ତମ କୁମାର ଦାଶ):ଦୀର୍ଘ ବର୍ଷର ଦାବି ଓ ୨ଟି ସାଧାରଣ ନିର୍ବାଚନ ପରେ ଶେଷରେ ଗ୍ରାମର ନାଳରେ ପୋଲ ନିର୍ମାଣ କରିବା ପାଇଁ ପ୍ରଶାସନର ଚେତାପଶିଥିଲା। ହେଲେ ଏହି ପୋଲ କାମ ଏବେ ଅଧାପନ୍ତରିଆ ଅବସ୍ଥାରେ ଥିବାରୁ ପୂର୍ବ ବର୍ଷଭଳି ବର୍ଷା ଦିନେ ଏଥର ମଧ୍ୟ ଜଳବନ୍ଦିର ଜୀବନ କଟାଉଛନ୍ତି ଗ୍ରାମବାସୀ। ଏପରି ଚିତ୍ର ଦେଖିବାକୁ ମିଳିଛି କଳାହାଣ୍ଡି ଜିଲା ଜୟପାଟଣା ବ୍ଲକ ନାଗୁପଡା ଗ୍ରାମରେ। ଏହି ଗ୍ରାମରେ ଭୋଟର ସଂଖ୍ୟା ପାଖାପାଖି ୫ଶହ ଥିବା ବେଳେ ହଜାରେ ଲୋକ ବାସ କରନ୍ତି। ଗାଁକୁ ଯିବାକୁ ହେଲେ ଛଞ୍ଚାଣ ନାଳ ପାରି ହୋଇଯିବାକୁ ପଡିଥାଏ। ଗାଁର ଗୋଟେ ପଟେ ନଇଁ ଓ ଆର ପଟେ କେନାଲ ରହିଥିବା ବେଳେ ଛଞ୍ଚାଣ ନାଳ ହିଁ ଲୋକଙ୍କ ପାଇଁ ଯାତାୟାତର ଏକ ମାତ୍ର ମାଧ୍ୟମ ହୋଇଛି। ବର୍ଷା ଦିନେ ନାଳରେ ବଢ଼ି ପାଣି ଆସିଲେ ଗ୍ରାମବାସୀ ବାହ୍ୟ ଜଗତରୁ ବିଚ୍ଛିନ୍ନ ହେବା ସହ ଜଳବନ୍ଦି ଅବସ୍ଥାରେ ରହିବାକୁ ପଡିଥାଏ। ଗ୍ରାମବାସୀ ଦୀର୍ଘ ବର୍ଷ ଧରି ଏଠାରେ ପୋଲ ନିର୍ମାଣ ଦାବି କରିବା ସହ ଦୁଇ ସାଧାରଣ ନିର୍ବାଚନରେ ଭୋଟ ବର୍ଜନ ପରେ ପ୍ରଶାସନର ଚେତା ପଶିଥିଲା। ପରେ ୬ କୋଟି ଟଙ୍କା ବ୍ୟୟରେ ଏଠାରେ ବିଜୁ ସେତୁ ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ହେଲେ ଠିକାଦାର ବର୍ଷାଦିନ ପୂର୍ବରୁ କାମ ସାରି ନ ଥିବାରୁ ଲୋକଙ୍କୁ କିଛି ସୁଫଳ ମିଳିପାରି ନାହିଁ। ପିଲାଙ୍କୁ ଶିକ୍ଷାଦାନ ପାଇଁ ଗାଁରେ ସ୍କୁଲ ଓ ଅଙ୍ଗନୱାଡି କେନ୍ଦ୍ର ରହିଛି। ହେଲେ ବର୍ଷା ଦିନ ଆସିଲେ ନାଳ ପାରି ହୋଇ ଶିକ୍ଷକ, ଶିକ୍ଷୟିତ୍ରୀ ତଥା ଛାତ୍ରୀଛାତ୍ର ସ୍କୁଲ ଯିବା ଅସମ୍ଭବ ହୋଇପଡିଥାଏ। ମାସକୁ ଥରେ ଦୁଇଥର ନାଳପାଣି ପାରି ହୋଇ ସ୍ବାସ୍ଥ୍ୟକର୍ମୀ ଗାଁକୁ ଆସି ପିଲାଙ୍କ ଟିକାକରଣ ଓ ଗର୍ଭବତୀଙ୍କ ପରୀକ୍ଷା କରୁଥିବା ବେଳେ କୌଣସି ଜରୁରୀ କାମ ଏମିତିକି ହାଟ, ବଜାର, ମେଡିକାଲ ଯିବାକୁ ହେଲେ ଉଛୁଳା ପାଣିରେ ବିପଦସଙ୍କୁଳ ଅବସ୍ଥାରେ ଯିବାକୁ ବାଧ୍ୟ ହୋଇଥାନ୍ତି ଗ୍ରାମବାସୀ। ଗର୍ଭବତୀ ମହିଳା ଆଉ ଗୁରୁତର ରୋଗୀଙ୍କୁ ଭାରରେ ବୋହି ନାଳ ପାରିହୋଇ ଆରପଟକୁ ନେବା ପରେ ଆମ୍ବୁଲାନ୍ସ ଯୋଗେ ପାଖ ହସ୍ପିଟାଲକୁ ଚିକିତ୍ସା ପାଇଁ ନେଉଥିବା ଲୋକେ ପ୍ରକାଶ କରିଛନ୍ତି। ଜିଲାପାଳ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
