ଦାରିଙ୍ଗବାଡ଼ି,୨୦ା୯(ଅରୁଣ ସାହୁ): ସରକାରଙ୍କ ପକ୍ଷରୁ ଶ୍ମଶାନ ଗୃହ ନିର୍ମାଣ ପାଇଁ ଲକ୍ଷଲକ୍ଷ ଟଙ୍କା ଅନୁଦାନ ଖର୍ଚ୍ଚ କରାଯାଇ ସ୍ବଚ୍ଛତା ଓ ସୌନ୍ଦର୍ଯ୍ୟ ପାଇଁ ପଦକ୍ଷେପ ନିଆଯାଉଛି। କିନ୍ତୁ କନ୍ଧମାଳ ଜିଲା ଦାରିଙ୍ଗବାଡ଼ି ପଞ୍ଚାୟତ ଡବେରୀ ଗ୍ରାମର ଶ୍ମଶାନ ଲଟାବୁଦାରେ ଭର୍ତ୍ତି ହୋଇ ଦୂଷିତ ପରିବେଶ ମଧ୍ୟରେ ରହିଛି। ଏହାର ସଫେଇ କାର୍ଯ୍ୟ ପାଇଁ ଅଣ୍ଟା ଭିଡ଼ିଥିବା କହିଛନ୍ତି ଡବେରୀ ଗ୍ରାମର ବିର୍ସାମୁଣ୍ଡା ଯୁବକ ସଂଘର ସଭାପତି ଦୀପକ ପ୍ରଧାନ।
ଦୀପକଙ୍କ ନେତୃତ୍ୱରେ ଗାଁର ଶତାଧିକ ଯୁବକ ଡବେରୀ ଶ୍ମଶାନରେ ଏକାଠି ହୋଇଥିଲେ। ତାଙ୍କୁ ଗାଁର ଛୋଟ ପିଲାଙ୍କଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସହାୟତା କରିଥିଲେ। ସମସ୍ତେ ମିଶି ଗାଁ ଶ୍ମଶାନରେ ହୋଇଥିବା ଅନାବନା ଗଛ, ଲଟାବୁଦାକୁ କାଟି ସଫା କରିଥିଲେ। ସେମାନଙ୍କ ଗୋଟିଏ ଦାବି ତାଙ୍କ ଶ୍ମଶାନରେ ହୋଇଥିବା ଅଧାପନ୍ତରିଆ ଗୃହକୁ ସମ୍ପୂର୍ଣ୍ଣ କରିବା। ଏହି ଅଧାପନ୍ତରିଆ ଶ୍ମଶାନ ଗୃହ ମଧ୍ୟ ଭାଙ୍ଗି ନଷ୍ଟ ହୋଇଗଲାଣି। ତେଣୁ ସ୍ଥାନୀୟ ପ୍ରଶାସନ ଓ ଜିଲାପ୍ରଶାସନ ଏହାକୁ ଦୃଷ୍ଟିରେ ରଖି ନୂତନ ଶ୍ମଶାନ ଗୃହ ନିର୍ମାଣ ପାଇଁ ଅନୁଦାନ ଦେଇ ସେଠାରେ ମୌଳିକ ଆବଶ୍ୟକ ସୁବିଧା ଯୋଗାଇ ଦେବାକୁ ଯୁବକ ସଂଘ ଦାବି ଜଣାଇଛି।
ଗାଁ କମିଟିର ସଭାପତି ସଭାପତି ରାଜୁ ପ୍ରଧାନ, ପୂର୍ବତନ ସଭାପତି କୃଷ୍ଣଚନ୍ଦ୍ର ପ୍ରଧାନ, ପୂର୍ବତନ ସମ୍ପାଦକ ସୁଶାନ୍ତ ମଲିକ, ଓ୍ବାର୍ଡସଭ୍ୟା ଅର୍ପା ପ୍ରଧାନ, ମହିଳା ସ୍ବୟଂ ସହାୟକ ଗୋଷ୍ଠୀ ପକ୍ଷରୁ ଦାବି କରାଯାଇଛି। ଶେଷରେ ବୃକ୍ଷରୋପଣ କରାଯାଇଥିଲା।
