ଯାଜପୁର ଅଫିସ,୧୮ା୪: ଯାଜପୁର ଜିଲା ଧର୍ମଶାଳା ବ୍ଲକର ବିଛାଖଣ୍ଡି ପାହାଡ଼ରେ ଚାଲିଥିବା ବେଆଇନ କଳାପଥର ଖନନର ତଦନ୍ତ ପାଇଁ ଭିଜିଲାନ୍ସକୁ ଲୋକାୟୁକ୍ତ ନିର୍ଦ୍ଦେଶ ଜାରି କରିଛନ୍ତି। ଲୋକାୟୁକ୍ତ ୧୨/୨୦୨୧ ନମ୍ବର ମାମଲା ଉପରେ ଗତ ୧୨ ତାରିଖରେ ଶୁଣାଣି କରି ଲୋକାୟୁକ୍ତ ଅଧ୍ୟକ୍ଷ ଓ ସଭ୍ୟ ଦର୍ଶାଇଛନ୍ତି ଯେ, ବିଛାଖଣ୍ଡି ପାହାଡ଼ ଏବଂ ଜଙ୍ଗଲ ଜମି ଅଞ୍ଚଳର ଅନେକ ସ୍ଥାନରେ ଅବାଧ ଖଣି କାର୍ଯ୍ୟକଳାପ ଚାଲିଛି, ଯାହାକୁ ତୁରନ୍ତ ଧ୍ୟାନ ଦିଆଯିବା ଆବଶ୍ୟକ। ବର୍ତ୍ତମାନ କୌଣସି ସରକାରୀ କର୍ମଚାରୀଙ୍କ ବିରୋଧରେ ପ୍ରତିକୂଳ ମନ୍ତବ୍ୟ ଦେଉନାହୁଁ। ପୂର୍ବରୁ ଯାଜପୁର ଜିଲାପାଳଙ୍କ ଉତ୍ତର ନିଶ୍ଚିତ କରିଛି ଯେ ସଂରକ୍ଷିତ ଜଙ୍ଗଲ ଅଞ୍ଚଳରୁ କଳାପଥର ଚୋରି, ଚୋରାଚାଲାଣ, ବେଆଇନ ଉତ୍ତୋଳନ ଏବଂ ପରିବହନ କରାଯାଇଛି। ବେଆଇନ କାର୍ଯ୍ୟକଳାପକୁ ରୋକିବା ପାଇଁ ପ୍ରଭାବଶାଳୀ ପଦକ୍ଷେପ ନିଆଯାଉଛି ଏବଂ ଏଥିରେ କୌଣସି ଦୁର୍ନୀତି ନାହିଁ। ଏହି ଉତ୍ତରକୁ ଦୃଷ୍ଟିରେ ରଖି ଲେକାୟୁକ୍ତ ଭିଜିଲାନ୍ସ ନିର୍ଦ୍ଦେଶକଙ୍କୁ ପ୍ରାଥମିକ ଅନୁସନ୍ଧାନ କରିବାକୁ ନିର୍ଦ୍ଦେଶ ଦେବା ଉଚିତ ବୋଲି ବିବେଚନା କରୁଛୁ। ଏହି ମାମଲାରେ ଆଗକୁ ବଢ଼ିବା ପାଇଁ କୌଣସି ସରକାରୀ କର୍ମଚାରୀ କିମ୍ବା ବ୍ୟକ୍ତିଙ୍କ ବିରୋଧରେ ମାମଲା ଅଛି କି ନାହିଁ ତାହା ଭିଜିଲାନ୍ସ ନିର୍ଦ୍ଦେଶକ ନିଶ୍ଚିତ କରିବେ ଏବଂ ପ୍ରାଥମିକ ଅନୁସନ୍ଧାନର ରିପୋର୍ଟ ୨ ମାସ ମଧ୍ୟରେ ଦାଖଲ କରିବେ ବୋଲି ନିର୍ଦ୍ଦେଶ ଦିଆଯାଇଛି।
ଗତ ଫେବୃୟାରୀ ୯ରେ ଲୋକାୟୁକ୍ତରେ ସୂଚନା ଅଧିକାର କର୍ମୀ ସର୍ବେଶ୍ୱର ବେହୁରା ଅଭିଯୋଗ କରିଥିଲେ ଯେ, ବିଛାଖଣ୍ଡି ପାହାଡ଼ରେ ପ୍ରଶାସନ ସହାୟତାରେ ଖଣି ମାଫିଆମାନେ ବିନା ଲିଜ୍ରେ ବିପୁଳ ପରିମାଣର ଖଣିଜ ପଥର ଲୁଟ୍ କରି ଚାଲିଛନ୍ତି। ଖଣିଜ ପଥର ଲୁଟ୍ ଯୋଗୁ ଆଖପାଖ ଅଞ୍ଚଳର ପରିବେଶ ନଷ୍ଟ ସହ ଲୋକଙ୍କ ଜୀବନ ଯାଉଛି। ଏହାଦ୍ୱାରା ସରକାର ବିପୁଳ ପରିମାଣର ରାଜସ୍ବ ହରାଉଛନ୍ତି। ଏଣୁ ବେଆଇନ ଖଣି ଉତ୍ତୋଳନ ବନ୍ଦ କରିବା ସହିତ ଏହି ଖଣି ଚୋରିରେ ସମ୍ପୃକ୍ତ ଅଧିକାରୀ ଓ ଖଣି ମାଫିଆଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଲୋକାଯୁକ୍ତଙ୍କ ନିକଟରେ ଦାବି କରିଥିଲେ। ସୂଚନାଯୋଗ୍ୟ, ଏହି ବେଆଇନ ଖଣି ଉତ୍ତୋଳନ ବିରୋଧରେ ଅଭିଯୋଗ ଯୋଗୁ ତାଙ୍କ ଜୀବନ ପ୍ରତି ବିପଦ ଥିବାର ଅଭିଯୋଗରେ ସେ କହିଥିଲେ। ପରବର୍ତ୍ତୀ ପର୍ଯ୍ୟାୟରେ ତାଙ୍କୁ ବୋମାମାଡ଼ କରି ହତ୍ୟା କରିବାକୁ ଷଡଯନ୍ତ୍ର ହୋଇଥିଲା।
କଟକ ବନଖଣ୍ଡ ଅନ୍ତର୍ଗତ ଡାଲିଯୋଡ଼ା ରେଞ୍ଜ ଅନ୍ତର୍ଗତ ୪୫ ଏକର ବିଶିଷ୍ଟ ବିଛାଖଣ୍ଡି ଜଙ୍ଗଲ ଜମିକୁ ୧୯୮୪ରୁ ୨୦୦୭ ପର୍ଯ୍ୟନ୍ତ ଅଞ୍ଚଳବାସୀ ସୁରକ୍ଷା ଦେଇ ଆସୁଥିଲେ। ବିଛାଖଣ୍ଡି ପାଇକରାପୁର, ପାଟପୁର, କଲାଣ୍ଡ, ଏଣ୍ଡଲବା, ରଖିଦେଇପୁର, ମାଳ, ରାଇଛନ୍ଦା, କଣ୍ଟାପାଟଣା ପ୍ରଭୃତି ଗ୍ରାମକୁ ନେଇ ବନସୁରକ୍ଷା ସମିତି ଗଠନ କରାଯାଇଥିଲା। ତେବେ ପ୍ରାକୃତିକ ଶୋଭାରେ ଭରପୂର ଏହି ଜଙ୍ଗଲ କିସମ ଜମି ଏବେ ପଥର ମାଫିଆଙ୍କ ଚରାଭୂମି ପାଲଟିଛି। କେତେଜଣ ପ୍ରଭାବଶାଳୀଙ୍କ ପ୍ରୋତ୍ସାହନରେ ଗତ ପ୍ରାୟ ୧୦ ବର୍ଷ ହେବ ବେଆଇନ ଖନନ ଆରମ୍ଭ ହୋଇଛି। ଏନେଇ ସାମାଜିକ କର୍ମୀ ସର୍ବେଶ୍ୱର ବେହୁରା ପୂର୍ବରୁ କଟକ ଡିଏଫ୍ଓ, ଯାଜପୁର ଜିଲାପାଳ, ଧର୍ମଶାଳା ତହସିଲଦାର, ଜେନାପୁର ଥାନା ପୋଲିସର ଦ୍ୱାରସ୍ଥ ମଧ୍ୟ ହୋଇଥିଲେ।
