ସମ୍ବଲପୁର,୨୩।୬(ପ୍ରମୋଦ ବହିଦାର): ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ସମ୍ବଲପୁର କମାଣ୍ଡ ଏରିଆ ଡେଭେଲପମେଣ୍ଟ ଅଥରିଟି (ସିଏଡିଏ) ଡିଭିଜନର ନିର୍ବାହୀ ଯନ୍ତ୍ରୀ ଇଂ. ପଦ୍ମଲୋଚନ ନାୟକଙ୍କ ବିରୋଧରେ ଭିଜିଲାନ୍ସ ପକ୍ଷରୁ ବଡ଼ଧରଣର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ନିଜର ବୈଧ ବା କ୍ଷମତା ଆୟ ବର୍ହିଭୂତ ସମ୍ପତ୍ତି ରଖିଥିବା ଅଭିଯୋଗରେ ମଙ୍ଗଳବାର ସମ୍ବଲପୁର ସ୍ବତନ୍ତ୍ର ଭିଜିଲାନ୍ସ କୋର୍ଟଙ୍କ ସର୍ଚ୍ଚ ୱାରେଣ୍ଟ ବଳରେ ଓଡ଼ିଶା ଭିଜିଲାନ୍ସ ପକ୍ଷରୁ ଏକକାଳୀନ ୭ଟି ସ୍ଥାନରେ ଚଢାଉ ଜାରି ରହିଛି। ଏହି ଚଢାଉରେ ୪ ଜଣ ଡିଏସପି, ୧୩ ଜଣ ଇନ୍ସପେକ୍ଟର ଏବଂ ୭ ଜଣ ଏଏସଆଇଙ୍କ ସମେତ ବହୁ ସଂଖ୍ୟକ ଭିଜିଲାନ୍ସ କର୍ମଚାରୀ ସାମିଲ ଅଛନ୍ତି। ଭିଜିଲାନ୍ସ ଟିମ ସମ୍ବଲପୁର, କଟକ, ବାଲେଶ୍ୱର ଏବଂ ମାଲକାନଗିରି ଜିଲରେ ଥିବା ଇଂ. ନାୟକଙ୍କ ବିଭିନ୍ନ ଠିକଣାରେ ଖାନତଲାସ କରୁଛି।
ଏହି କ୍ରମରେ ସମ୍ବଲପୁରର ଧନୁପାଲିସ୍ଥିତ ତାଙ୍କ ଭଡ଼ା ଘର ଏବଂ ସେହି ଅଞ୍ଚଳରେ ଥିବା ସରକାରୀ କାର୍ଯ୍ୟାଳୟ ପ୍ରକୋଷ୍ଠରେ ଯାଞ୍ଚ ଚାଲିଛି। ଏହା ସହିତ କଟକ ବିଦ୍ୟାଧରପୁରରେ ଥିବା ତାଙ୍କର ଏକ ତିନି ମହଲା ଆବାସିକ ଗୃହ ଏବଂ ବାଲେଶ୍ୱର ଜିଲା ବସ୍ତା ଥାନା ଅନ୍ତର୍ଗତ ମୁଖାଲିସ ଗ୍ରାମରେ ଥିବା ଦୁଇ ମହଲା କୋଠା ଉପରେ ମଧ୍ୟ ଚଢାଉ କରାଯାଇଛି। କେବଳ ସେତିକି ନୁହେଁ, ଇଂ. ନାୟକଙ୍କ ସହଯୋଗୀମାନଙ୍କୁ ମଧ୍ୟ ଭିଜିଲାନ୍ସ ଜାଲରେ ଛନ୍ଦି ହୋଇଛନ୍ତି। କଟକ ସହରରେ ଥିବା ତାଙ୍କର ଦୁଇଜଣ ସହଯୋଗୀଙ୍କ ବାସଭବନ ଏବଂ ମାଲକାନଗିରି ଜିଲାର କାଲିମେଳାସ୍ଥିତ ଆଉ ଜଣେ ସହଯୋଗୀଙ୍କ ବାସଭବନରେ ମଧ୍ୟ ଏକକାଳୀନ ସର୍ଚ୍ଚ ଅପରେଶନ କରାଯାଉଛି। ବର୍ତ୍ତମାନ ସୁଦ୍ଧା ଭିଜିଲାନ୍ସ ପକ୍ଷରୁ ଚଉ ପ୍ରକ୍ରିୟା ଜାରି ରହିଥିବା ବେଳେ ଏନେଇ ସବିଶେଷ ତଥ୍ୟକୁ ଅପେକ୍ଷା କରାଯାଇଛି।