ନୂଆଦିଲ୍ଲୀ,୧୫।୩(ପି.ଟି.): ଅଧିନାୟକ ତଥା ଓପନର ପୃଥ୍ବୀ ଶ ଓ ଉଇକେଟକିପର ବ୍ୟାଟ୍ସମ୍ୟାନ ଆଦିତ୍ୟ ତାରେଙ୍କ ଦମ୍ଦାର ବ୍ୟାଟିଂ ପ୍ରଦର୍ଶନ ବଳରେ ମୁମ୍ବାଇ ୫୧ଟି ବଲ ବାକିଥାଇ ୬ ଉଇକେଟରେ ଉତ୍ତର ପ୍ରଦେଶକୁ ପରାସ୍ତ କରି ବିଜୟ ହଜାରେ ଟ୍ରଫି ହାସଲ କରିଛି। ଦେଶର ସର୍ବବୃହତ୍ ଘରୋଇ ଦିନିକିଆ ଟୁର୍ନାମେଣ୍ଟ ତଥା ରଣଜୀ ଦିନିକିଆ ଭାବେ ଜଣାଥିବା ଏହି ଟୁର୍ନାମେଣ୍ଟର ଫାଇନାଲ ମ୍ୟାଚ୍ ସ୍ଥାନୀୟ ଅରୁଣ ଜେଟ୍ଲୀ ଷ୍ଟାଡିୟମରେ ଅନୁଷ୍ଠିତ ହୋଇଥିଲା। ଟସ୍ ଜିତି ଉତ୍ତର ପ୍ରଦେଶ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୫୦ ଓଭରରେ ୪ ଉଇକେଟ ହରାଇ ୩୧୨ ରନର ଚ୍ୟାଲେଞ୍ଜିଂ ସ୍କୋର ହାସଲ କରିଥିଲା। ଜବାବରେ ମୁମ୍ବାଇ ୪୧.୩ ଓଭରରେ ୪ଉଇକେଟ ହରାଇ ୩୧୫ ରନକରି ବିଜୟୀ ହୋଇଥିଲା। ଏଥିସହିତ ମୁମ୍ବାଇ ଚତୁର୍ଥ ଥର ପାଇଁ ଏହି ଟୁର୍ନାମେଣ୍ଟରେ ଚାମ୍ପିୟନ ହେବାର ଗୌରବ ଅର୍ଜନ କରିଛି। ୧୦୭ ବଲରୁ ୧୮ ଚୌକା ସହ ଅପରାଜିତ ୧୧୮ ରନର ଶତକୀୟ ପାଳି ଖେଳିଥିତ୍ବା ତାରେ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।
୩୧୩ ରନ ଟାର୍ଗେଟର ପିଛା କରି ମୁମ୍ବାଇ ଭଲ ଆରମ୍ଭ କରିଥିଲା। ପୃଥ୍ବୀ ୩୯ ବଲର ସମ୍ମୁଖୀନ ହୋଇ ୧୦ ଚୌକା ଓ ୪ ଛକା ସହ ୭୩ ରନର ଦ୍ରୁତ ଅର୍ଦ୍ଧଶତକୀୟ ପାଳି ଖେଳିଥିଲେ। ଟୁର୍ନାମେଣ୍ଟରେ ପୃଥ୍ବୀ ୮୨୭ ରନ ସଂଗ୍ରହ କରିଛନ୍ତି। ତେବେ ପ୍ରଥମେ ଯଶସ୍ବୀ ଜୟସ୍ବାଲ ୨୯ ରନକରି ଆଉଟ ହୋଇଥିଲେ। ଅନ୍ୟମାନଙ୍କ ମଧ୍ୟରେ ସାମ୍ସ ମୁଲାନି ୩୬, ଶିବମ୍ ଦୁବେ ୪୨ ରନକରି ଆଉଟ ହୋଇଥିବା ବେଳେ ସର୍ଫରାଜ ଖାଁ ୩ ରନକରି ଅପରାଜିତ ରହିଥିଲେ। ଶେଷ ପର୍ଯ୍ୟନ୍ତ ଅପରାଜିତ ରହି ଅଭିଜ୍ଞ ତାରେ ଦଳକୁ ବିଜୟୀ କରାଇଥିଲେ। ବୋଲିଂରେ ଉତ୍ତରପ୍ରଦେଶ ତରଫରୁ ୟସ ଦୟାଲ, ଶିବମ୍ ମାଭି, ଶିବମ୍ ଶର୍ମା, ସମୀର ଚୌଧୁରୀ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ଉତ୍ତରପ୍ରଦେଶ ତରଫରୁ ଓପନର ମାଧବ କୌଶିକ ୧୫୮ ରନ (୧୫୬ ବଲ, ୧୫ ଚୌକା, ୪ ଛକା)ର ଶତକୀୟ ପାଳି ଖେଳି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଅନ୍ୟମାନଙ୍କ ମଧ୍ୟରେ ସମର୍ଥ ସିଂ ୫୫, ଆକାଶଦୀପ ନାଥ ୫୫, ପ୍ରିୟମ ଗର୍ଗ ୨୧ରନ କରି ଆଉଟ ହୋଇଥିବା ବେଳେ ଅଧିନାୟକ କର୍ନ ଶର୍ମା ଖାତା ଖୋଲିପାରି ନ ଥିଲେ। ମୁମ୍ବାଇ ତରଫରୁ ବୋଲିଂରେ ତନୁଶ କୋଟିଆନ ୨, ପ୍ରଶାନ୍ତ ସୋଲାଙ୍କି ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଉତ୍ତରପ୍ରଦେଶ ୫୦ ଓଭରରେ ୩୧୨/୪
(କୌଶିକ- ୧୫୮*, ସମର୍ଥ- ୫୫, ଆକାଶଦୀପ- ୫୫, କୋଟିଆନ- ୨/୫୪, ସୋଲାଙ୍କି- ୧/ ୭୧)।
ମୁମ୍ବାଇ ୪୧.୩ ଓଭରରେ ୩୧୫/୪
(ତାରେ- ୧୧୮*, ପୃଥ୍ବୀ- ୭୩, ଜୟସ୍ବାଲ- ୨୯, ମୁଲାନି- ୩୬, ଶିବମ୍ ଦୁବେ- ୪୨, ସମୀର- ୧/ ୪୩, ଦୟାଲ- ୧/୭୧, ମାଭି- ୧/ ୬୩, ଶିବମ ଶର୍ମା- ୧/୭୧ । )
