ଦିଗପହଣ୍ଡି,୧।୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡିସ୍ଥିତ ବ୍ରହ୍ମାକୁମାରୀ ପ୍ରଭୁ ମିଳନ ଭବନ ପକ୍ଷରୁ ସ୍ଥାନୀୟ ପୁଞ୍ଜିକୟାଁ ଛକ ନନ୍ଦିଘୋଷ କଲ୍ୟାଣ ମଣ୍ଡପଠାରେ ଶାନ୍ତି ଶିବିର ପ୍ରବଚନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ରାଜସ୍ଥାନ ଆବୁରାଜରୁ ଆସିଥିବା ଅନ୍ତଃରାଷ୍ଟ୍ରୀୟ ପ୍ରେରଣାଦାୟକ ପ୍ରବକ୍ତା ତଥା ମନ ପ୍ରଶିକ୍ଷକ ରାଜଯୋଗୀ ବ୍ରହ୍ମ କୁମାର ଡ଼. ଶକ୍ତିରାଜ ଏହି ଶିବିରରେ ମୁଖ୍ୟ ଅତିଥି ଭାବେ ଯୋଗ ଦେଇ କାର୍ଯ୍ୟକ୍ରମକୁ ଉଦଘାଟନ କରିଥିଲେ। ନିଜର ଓଜସ୍ବୀନି ବକ୍ତବ୍ୟରେ ସେ ମନକୁ ନିୟନ୍ତ୍ରଣରେ ରଖିବା ଉପରେ ଅଧିକ ଗୁରୁତ୍ୱ ଦେବାକୁ ପରାମର୍ଶ ଦେବା ସହିତ ମନର ବିଜୟରେ ଜଗତ ବିଜୟ ସମ୍ଭବ ବୋଲି କହିଥିଲେ। ଡାକ୍ତର, ଇଞ୍ଜିନିୟର, ଶିକ୍ଷକ, ଅଧିବକ୍ତା ଆଦି ହେବାପାଇଁ ଭିନ୍ନ ଭିନ୍ନ ମହାବିଦ୍ୟାଳୟ ରହିଥିଲେ ମଧ୍ୟ ସାଧାରଣ ମାନବକୁ ଦେବତୁଲ୍ୟ ଗଢିବା ପାଇଁ ବ୍ରହ୍ମକୁମାରୀ ବିଶ୍ୱବିଦ୍ୟାଳୟ ଏକମାତ୍ର ସଂସ୍ଥା ବୋଲି ସେ ମତ ପ୍ରକାଶ କରିଥିଲେ।
ସେହିଭଳି ଦିଗପହଣ୍ଡି ଥାନା ଆଇଆଇସି କିଶୋର କୁମାର ସାମଲ ଏବଂ ଦିଗପହଣ୍ଡି ପ୍ରଭୁ ମିଳନ ଭବନର ସଞ୍ଚାଳିକା ରାଜଯୋଗିନୀ ବ୍ରହ୍ମକୁମାରୀ ଅରୁନ୍ଧତୀ ସମ୍ମାନିତ ଅତିଥିଭାବେ ଯୋଗ ଦେଇଥିଲେ। ନକରାତ୍ମକ ତତ୍ତ୍ୱକୁ ବିଦାୟ ଏବଂ ସକରାତ୍ମକ ତତ୍ତ୍ୱକୁ ସ୍ବାଗତ କରିବା ଦ୍ୱାରା ଶାନ୍ତିର ପ୍ରସାର ହୋଇଥାଏ ବୋଲି ଅତିଥି ଦ୍ବୟ ସେମାନଙ୍କ ଉଦବୋଧନରେ ମତପ୍ରକାଶ କରିଥିଲେ। କାର୍ଯ୍ୟକ୍ରମକୁ ଦିଗପହଣ୍ଡିସ୍ଥିତ ବ୍ରହ୍ମା କୁମାରୀଜ ପ୍ରଭୁ ମିଳନ ଭବନ ସେବାକେନ୍ଦ୍ରର ବ୍ରହ୍ମାକୁମାରୀ ଭଉଣୀ ଓ ବ୍ରହ୍ମାକୁମାର ଭାଇ ବୃନ୍ଦ ସମସ୍ତ କାର୍ଯ୍ୟକ୍ରମ ପରିଚାଳନାରେ ସହାୟତା କରିଥିଲେ।