ବାଲିଚନ୍ଦ୍ରପୁର,୧୭ା୯(ଗିରିଜା ପ୍ରସାଦ ସାହୁ) ପୂର୍ବତଟ ରେଳ ଡ଼ିଭିଜନର ହରିଦାସପୁର-ପାରାଦୀପ ଫାଟକ ବିହିନ ରେଳପଥରେ ଥିବା ୩ନଂ. ଷ୍ଟେଶନର ନାମ ରତ୍ନଗିରି ରୋଡ଼ ଦିଆଯାଇଥିଲା। ଏହାକୁ ଆପତ୍ତି ଉଠାଇ ଉଦୟଗିରି ବୁଦ୍ଧ ମହୋସତ୍ବ ସମିତି ପକ୍ଷରୁ ନାମ ସଂଶୋଧନ କରିବା ପାଇଁ ସମିତିର ଉପଦେଷ୍ଠା ତଥା ପ୍ରାକ୍ତନ ବ୍ଲକ ଅଧ୍ୟକ୍ଷ ସ୍ବର୍ଗତ ହରିଶ୍ଚନ୍ଦ୍ର ପ୍ରଧାନଙ୍କ ପ୍ରସ୍ତାବ କ୍ରମେ ଆବାହକ ମହେଶ୍ୱର ବଳ ଉଦ୍ୟମ ଆରମ୍ଭ କରିଥିଲେ। ଏଥିରେ ମହୋସତ୍ବ ସମିତି ପ୍ରମୁଖ ଭୂମିକା ଗ୍ରହଣ କରିଥିଲା। ଏପରି କି ଆନ୍ଦୋଳାମତ୍କ ପନ୍ଥା ଜରିଆରେ ସ୍ଥାନୀୟ ଜନସାଧାରଣ, ପଞ୍ଚାୟତ ସମିତି ବଡ଼ଚଣା, ବିଧାୟକ ବଡ଼ଚଣା, ଜିଲାପାଳ ଯାଜପୁର ଓ ରେଳ ବିଭାଗର ଅଧିକାରୀମାନଙ୍କ ସହଯୋଗରେ ଉଭୟ କେନ୍ଦ୍ର ଓ ରାଜ୍ୟ ସରକାର ଷ୍ଟେଶନର ନାମ ପରିବର୍ତ୍ତନ କରିଛନ୍ତି। ଏବେ ଏହି ଷ୍ଟେଶନର ନାମ ଉଦୟଗିରି-ରତ୍ନଗିରି ରୋଡ଼ରେ ନାମିତ ହେବା ସହ ରେଲୱେ ବିଭାଗର ସପ୍ଟୱୟାର ଓ ଗୁଗୁଲ୍ ମ୍ୟାପ୍ରେ ତାହା ସ୍ଥାନ ପାଇଛି। ଏବେ ଏହି ଷ୍ଟେଶନରେ ନୂଆ ଫଳକ ଉଦୟଗିରି-ରତ୍ନଗିରି ରୋଡ଼ ନାମରେ ଲାଗିବା ପ୍ରକ୍ରିୟା ଶେଷ ହୋଇଥିବାରୁ ଅଞ୍ଚଳବାସୀଙ୍କ ମଧ୍ୟରେ ଖୁସିର ଲହରି ଖେଳିଯାଇଛି। ଉଦୟଗିରି ବୁଦ୍ଧ ମହୋସତ୍ବ ସମିତି ପକ୍ଷରୁ ଅଞ୍ଚଳବାସୀଙ୍କୁ ନେଇ ଉକ୍ତ ରେଳ ପ୍ଲାଟଫର୍ମ ଉପରେ ବିଜୟ ଉସତ୍ବ ପାଳନ କରାଯାଇଛି। ଉପସ୍ଥିତ ଜନସାଧାରଣଙ୍କ ପକ୍ଷରୁ ଆତସବାଜି ଫୁଟାଇବା ସହ ପରସ୍ପର ମଧ୍ୟରେ ମିଠା ବଣ୍ଟନ କରାଯାଇଥିଲା। ଏହି ଅବସରରେ ଶିକ୍ଷାବିତ୍ ଉମାକାନ୍ତ ବଳଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ଆବାହକ ଆରମ୍ଭରୁ ଶେଷ ପର୍ଯ୍ୟନ୍ତ ସମସ୍ତ ବିବରଣୀ ପ୍ରଦାନ କରି ରାଜ୍ୟ ସରକାରଙ୍କ ପ୍ରସ୍ତାବ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କ ସୁପାରିସ, କେନ୍ଦ୍ର ଗୃହମନ୍ତ୍ରଣାଳୟର ବିଜ୍ଞପ୍ତି ଓ ଓଡ଼ିଶା ସରକାରଙ୍କ ଗେଜେଟ ପର୍ଯ୍ୟନ୍ତ ସମସ୍ତ ନଥିପତ୍ର ଏକ ପୁସ୍ତିକାରେ ଉପସ୍ଥାପିତ କରିଥିଲେ। ଯାହାକୁ ରେଳ ବିଭାଗର ଇଣ୍ଟେଲିଜେନ୍ସ ଅଧିକାରୀ ପ୍ରଶାନ୍ତ କୁମାର ପରିଡ଼ା ମୁଖ୍ୟ ଅତିଥି ଭାବେ ଯୋଗଦେଇ ଉନ୍ମୋଚନ କରିଥିଲେ। ଉକ୍ତ ପୁସ୍ତିକାକୁ ଚଣ୍ଡିଖୋଲ ବାବା ଭୈରବାନନ୍ଦ ସ୍ବୟଂ ଶାସିତ ମହାବିଦ୍ୟାଳୟ ପାଠାଗାରାରେ ରଖାଯିବ ବୋଲି ବଳ ପ୍ରକାଶ କରିଥିଲେ। ଏହି ରେଳପଥରେ ଆଗକୁ ଯେଉଁ ଯାତ୍ରୀବାହୀ ଟ୍ରେନ ଚାଲିବ ତାହାର ନାମ ଉଦୟଗିରି ଏକ୍ସପ୍ରେସ ରଖିବା ପାଇଁ ମହୋସତ୍ବ ସମିତି ଦାବି କରିବ ବୋଲି ଘୋଷଣା କରାଯାଇଥିଲା। ଶିକ୍ଷାବିିତ୍ କିଶୋର ଚନ୍ଦ୍ର ଦାସ ସ୍ବାଗତ ଭାଷଣ ଦେଇଥିବା ବେଳେ ଶିକ୍ଷକ ଶୈଳେନ୍ଦ୍ର ନାରାୟଣ ରାୟ ଧନ୍ୟବାଦ ଦେଇଥିଲେ।
