ନୂଆଦିଲ୍ଲୀ, ୨୭।୯ : ଆର୍ଥିକ ସ୍ଥିତିକୁ ଆଧାର କରି ଉଚ୍ଚଶିକ୍ଷା ତଥା ନିଯୁକ୍ତି ପ୍ରସଙ୍ଗରେ ଅଥନୈତିକ ଦୁର୍ବଳ ବର୍ଗ(ଇଡବ୍ଲୁଏସ୍)ଙ୍କ ପାଇଁ ସଂରକ୍ଷଣର ସାମ୍ବିଧାନିକ ବୈଧତା ସମ୍ବନ୍ଧୀୟ ଏକ ମାମଲାରେ ସୁପ୍ରିମକୋର୍ଟ ରାୟ ସଂରକ୍ଷିତ ରଖିଛନ୍ତି। ସୁପ୍ରିମକୋର୍ଟର ସାମ୍ବିଧାନିକ ବେଞ୍ଚ ଇଡବ୍ଲୁଏସ୍ କୋଟାରେ ୧୦ ପ୍ରତିଶତ ସଂରକ୍ଷଣର ସାମ୍ବିଧାନିକତା ଶୁଣାଣି କରି ଏହା କରିଛନ୍ତି।
୧୦୩ ତମ ସାମ୍ବିଧାନିକ ସଂଶୋଧନ ଅନ୍ତର୍ଗତ ଜାନୁଆରୀ ୨୦୧୯ ରେ ଇଡବ୍ଲୁଏସ୍ କୋଟା ଲାଗୁ କରାଯାଇଥିଲା। ଏହି ଆଇନକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ପାଞ୍ଚ ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରୁଛନ୍ତି।ନ୍ ଆବେଦନରେ କୁହାଯାଇଛି ଯେ ଏସସି, ଏସଟି ଏବଂ ଓବିସିରେ ମଧ୍ୟ ଗରିବ ଲୋକ ଅଛନ୍ତି, ତେବେ କାହିଁକି ଏହି ସଂରକ୍ଷଣ କେବଳ ସାଧାରଣ ବର୍ଗର ଲୋକଙ୍କୁ ଦିଆଯାଉଛି? ଏହା ୫୦ ପ୍ରତିଶତ ସଂରକ୍ଷଣ ନିୟମକୁ ଉଲ୍ଲଂଘନ କରୁଛି। ଓବିସି ପାଇଁ ୨୭ ପ୍ରତିଶତ କୋଟା, ଏସସି ପାଇଁ ୧୫ ପ୍ରତିଶତ ଏବଂ ଏସଟି ପାଇଁ ୭.୫ ପ୍ରତିଶତ କୋଟା ସ୍ଥିର କରାଯାଇଛି। ଏହି ପରିପ୍ରେକ୍ଷୀରେ, ୧୦ ପ୍ରତିଶତ ଇଡବ୍ଲୁଏସ୍ କୋଟା ୫୦ ପ୍ରତିଶତ ନିୟମକୁ ଉଲ୍ଲଂଘନ କରୁଛି।
ଗତ ଶୁଣାଣି ସମୟରେ ସରକାର ସୁପ୍ରିମକୋର୍ଟରେ କହିଥିଲେ ଯେ ସାଧାରଣ ବର୍ଗଙ୍କର ଇଡବ୍ଲୁଏସ୍ କୋଟା ଉପରେ ଅଧିକାର ଅଛି। କାରଣ ଏସସି-ଏସଟିର ଲୋକମାନେ ପୂର୍ବରୁ ସଂରକ୍ଷଣର ଅନେକ ଲାଭ ପାଇଛନ୍ତି । ପ୍ରଧାନ ବିଚାରପତି ୟୁୟୁ ଲଲିତ, ଜଷ୍ଟିସ ଦୀନେଶ ମାହେଶ୍ୱରୀ, ଜଷ୍ଟିସ ଏସ ରବିନ୍ଦ୍ର ଭଟ୍ଟ, ଜଷ୍ଟିସ ବେଲା ଏମ ତ୍ରିବେଦୀ ଏବଂ ଜଷ୍ଟିସ ଜେ.ବି ପାରଦିୱାଲାଙ୍କୁ ନେଇ ଗଠିତ ଏକ ସମ୍ବିଧାନ ବେଞ୍ଚ ପୂର୍ବରୁ ଆଟର୍ନି ଜେନେରାଲ କେ.କେ ଭେନୁଗୋପାଲ କହିଛନ୍ତି ଯେ ପଛୁଆ ଜାତି, ଅନୁସୂଚିତ ଜାତି ଏବଂ ଅନୁସୂଚିତ ଜନଜାତିର ଲୋକମାନେ ପୂର୍ବରୁ ଏହାର ସୁଯୋଗ ଲାଭ କରି ସାରିଛନ୍ତି। ଏବେ ସାଧାରଣ ବର୍ଗର ଗରିବ ଲୋକମାନେ ଏହି ନିୟମ ଅନୁଯାୟୀ ଲାଭ ପାଇବେ ଯାହା ବୈପ୍ଳବିକ ବୋଲି ପ୍ରମାଣିତ ହେବ ।
ଭେନୁଗୋପାଲ କହିଥିଲେ ଯେ ଏହି ନିୟମ ଧାରା ୧୫ (୬) ଏବଂ ୧୬ (୬) ଅନୁଯାୟୀ କାର୍ଯ୍ୟକାରୀ ହେଉଛି। ଏହା ପଛୁଆ ଏବଂ ବଞ୍ଚିତ ଲାକଙ୍କୁ ଆଡମିଶନ ଏବଂ ଚାକିରିରେ ସଂରକ୍ଷଣ ପ୍ରଦାନ କରେ ଏବଂ ୫୦ ପ୍ରତିଶତ ସୀମା ଅତିକ୍ରମ କରେ ନାହିଁ। ସେ କହିଛନ୍ତି ଯେ ସମ୍ବିଧାନରେ ଏସସି ଏବଂ ଏସଟି ପାଇଁ ସଂରକ୍ଷଣ ପୃଥକ ଭାବରେ ଉଲ୍ଲେଖ କରାଯାଇଛି। ଏହି ଅନୁଯାୟୀ, ସେମାନଙ୍କୁ ସଂସଦରେ, ପଞ୍ଚାୟତରେ ଏବଂ ସ୍ଥାନୀୟ ସଂସ୍ଥାରେ ଏବଂ ପଦୋନ୍ନତିରେ ସଂରକ୍ଷଣ ପ୍ରଦାନ କରାଯାଇଛି। ଯଦି ସେମାନଙ୍କର ପଛୁଆ ସ୍ଥିତିକୁ ଧ୍ୟାନରେ ରଖି ସେମାନଙ୍କୁ ସମସ୍ତ ପ୍ରକାରର ଲାଭ ଦିଆଯାଉଛି, ତେବେ ସେମାନେ ଇଡବ୍ଲୁଏସ୍କୋଟା ପାଇବା ପାଇଁ ଏହି ସମସ୍ତ ସୁବିଧା ଛାଡିବାକୁ ପ୍ରସ୍ତୁତ ରହିବେ।
