ପ୍ରଶଂସିକାରୁ ଜୀବନସାଥୀ
– ଶ୍ରୀତମ ଦାସ (ଅଭିନେତା)
ପ୍ରଶଂସିକାରୁ ପ୍ରେମିକା ଏବଂ ପରେ ଜୀବନସାଥୀ। ବିବାହର ୬/୭ ବର୍ଷ ପୂର୍ବରୁ ଭୁବନେଶ୍ୱରରେ ମୋ ସହ ପୁନମ୍ଙ୍କର ଦେଖା ହୋଇଥିଲା। ପରେ ହଠାତ୍ ଦିନେ ପୁନମ୍ ମୋତେ ଫୋନ୍ କରିଥିଲେ। ଧୀରେ ଧୀରେ ଆମ ଭିତରେ ବନ୍ଧୁତା ସୃଷ୍ଟି ହେଲା। କଥା ହେବାର ୮ମାସ ପର୍ଯ୍ୟନ୍ତ ଆମେ କେହି କାହାକୁ ଦେଖି ନ ଥିଲୁ। ଏକ କାମରେ ରାୟଗଡ଼ା ଯାଇଥିବା ସମୟରେ ପୁନମ୍ ଓ ତାଙ୍କ ପରିବାର ସହ ଦେଖା ହୋଇଥିଲା। ସେତେବେଳେ ତାଙ୍କ ପରିବାର ଲୋକେ ମତେ ବହୁତ ସ୍ନେହ କରିଥିଲେ। କିଛିଦିନ ପରେ ମେଡିକାଲ କାମ ପାଇଁ ସେ ତାଙ୍କ ମା’ଙ୍କ ସହ କଟକ ଆସିଥିଲେ। ମୁଁ ଏ ସମ୍ପର୍କରେ ଜାଣିବା ପରେ ତାଙ୍କୁ ଆମ ଘରକୁ ଡାକିଥିଲି। ସେମାନେ ଆମ ଘରକୁ ଆସିବା ପରେ ମୋ ମା’ ତାଙ୍କ ମା’ଙ୍କୁ ବିବାହ ପାଇଁ ପ୍ରସ୍ତାବ ଦେଇଥିଲେ। ସେ ପର୍ଯ୍ୟନ୍ତ ଆମେ ଭଲ ବନ୍ଧୁ ଥିଲୁ। ଶେଷରେ ପରିବାର ସହମତିରେ ୨୦୧୧ ଡିସେମ୍ବର ୭ରେ ବିବାହ ହୋଇଥିଲା।
ବୁଝାମଣା ଏବେ ବି ଦୃଢ଼ ରହିଛି
– ସୂର୍ଯ୍ୟକାନ୍ତ (ଅଭିନେତା)
ପ୍ରଥମ ଦେଖାରେ ହିଁ ମୁଁ ମାମାଙ୍କୁ ଭଲ ପାଇବସିଥିଲି। ଯାହାହେଉ ଆମ ଭିତରେ ଏହି ପବିତ୍ର ସମ୍ପର୍କର ସୃଷ୍ଟି ସେହି ପ୍ରଥମ ଦେଖାରୁ ହିଁ ହୋଇଥିଲା। ତାଙ୍କର କୁଲ୍ ନେଚର ମୋତେ ବେଶି ପ୍ରଭାବିତ କରିଥିଲା। ସେତେବେଳେ ସେ ଚାକିରି କରୁଥାଆନ୍ତି। ଦେଖାସାକ୍ଷାତ ପରେ ମୁଁ ଯେତେବେଳେ ତାଙ୍କୁ ପ୍ରପୋଜ୍ କଲି ସେ ତାହାକୁ ଗ୍ରହଣ କରିଥିଲେ। ଖାସ୍ କଥା ହେଲା, ସେତେବେଳେ ଆମ ପ୍ରେମକୁ ପ୍ରଭାବିତ କରିବା ଭଳି କୌଣସି ପରିସ୍ଥିତି ସୃଷ୍ଟି ହୋଇ ନ ଥିଲା। ଆଉ ପରସ୍ପର ଭିତରେ ଉତ୍ତମ ବୁଝାମଣା ଯୋଗୁ ପରବର୍ତ୍ତୀ ସମୟରେ ଆମେ ବିବାହ ବନ୍ଧନରେ ଆବଦ୍ଧ ହୋଇଥିଲୁ। ବିବାହ ପୂର୍ବରୁ ଆମ ଭିତରେ ଥିବା ନିବିଡତା ଏବେ ଆହୁରି ଦୃଢ଼ ହୋଇଛି। ତାଙ୍କୁ ମୁଁ ମୋ ହୋମ୍ ପ୍ରଡକ୍ସନରେ ନିର୍ମିତ ‘ବାଳୀ’ରେ ନାୟିକା ସାଜିବାର ସୁଯୋଗ ଦେଇଛି।
ଜଗନ୍ନାଥ ଆମକୁ ଏକାଠି କରିଛନ୍ତି
– ପ୍ରଜ୍ଞା (ହାସ୍ୟାଭିନେତା)
ସେତେବେଳେ ମୁଁ ଭୁବନେଶ୍ୱରସ୍ଥିତ ଉତ୍କଳ ସଙ୍ଗୀତ ମହାବିଦ୍ୟାଳୟର ନାଟକ ବିଭାଗରେ ପଢ଼ୁଥାଏ। ଏମିତି ସୁନନ୍ଦା ପରିଡାଙ୍କ ସହ ଦେଖାସାକ୍ଷାତରୁ ଆମ ଭିତରେ ନିବିଡତା ସୃଷ୍ଟି ହୋଇଥିଲା। କଥାରେ ଅଛି, ଖୋଜିବାରୁ ହିଁ ଭଲ ପାଇବା ଆସେ। ସେହି ସମୟରେ ନାଟକ ବିଷୟରେ ଅଧିକ ଜ୍ଞାନ ଅର୍ଜନ କରିବାକୁ ମୁଁ ପରୀକ୍ଷାରେ ଫେଲ୍ ହୋଇ କିଛି ବର୍ଷ ପଢ଼ିଥିଲି। ଏପରି କି ଦୁହେଁ ପି.ଜି. ସମୟରେ ଏକାଠି ପରୀକ୍ଷା ଦେଇଥିଲୁ। ଏହା ଭିତରେ ଆମେ ଥିଏଟର ନାଟକରେ ଅଭିନୟ କରିସାରିଥିଲୁ। ଏପରି କି ଏକ ନାଟକରେ ସେ ମୋ ବୁଢ଼ୀମା’ ଭୂମିକାରେ ଅଭିନୟ କରିଥିଲେ। କେତୋଟି ଧାରାବାହିକରେ ମଧ୍ୟ ଆମେ ଏକାଠି ଆକ୍ଟିଂ କରିଛୁ। ଏହି ଅଭିନୟ ଜୀବନ ଭିତରେ ଆମର ପ୍ରେମ ସଫଳତାର ଶୀର୍ଷରେ ପହଞ୍ଚତ୍ ସାରିଥିଲା। ବିଶେଷ କରି ସୁନନ୍ଦାଙ୍କର ଶାନ୍ତ ସରଳ ନେଚର ଏବଂ ଅମାୟିକ ବ୍ୟବହାର ମୋତେ ଅଧିକ ପ୍ରଭାବିତ କରିଥିଲା। ଚଳିତ ବର୍ଷ ମୁଁ ତାଙ୍କୁ ଧର୍ମପତ୍ନୀ ଭାବରେ ଗ୍ରହଣ କରିଛି। ପ୍ରଭୁ ଜଗନ୍ନାଥ ଆମକୁ ଏକାଠି କରିଛନ୍ତି। ତାଙ୍କର ଆର୍ଶୀବାଦରୁ ଆମେ ଦୁହେଁ ଏବେ ଖୁସିରେ ଅଛୁ।
– ସାକ୍ଷାତ୍: ବନ୍ଦନା, ଶୁଭ୍ରପ୍ରକାଶ
