ନୂଆଦିଲ୍ଲୀ,୧୨।୯: : ଖୁବ କମ୍ ବୟସରେ କ୍ରିକେଟ ଜଗତରେ ନିଜର ଅଲଗା ପରିଚୟ ସୃଷ୍ଟି କରିଥିବା ବୈଭବ ସୂର୍ଯ୍ୟବଂଶୀଙ୍କୁ ନେଇ ଏବେ ତାଙ୍କ ବ୍ୟାଟିଂ ସହ କ୍ୟାପ୍ଟେନ୍ସି ଦକ୍ଷତାର ମଧ୍ୟ ଚର୍ଚ୍ଚା ଆରମ୍ଭ ହୋଇଛି। ବିସିସିଆଇ ଡୋମେଷ୍ଟିକ ପକ୍ଷରୁ ଜାରି ଏକ ଭିଡିଓରେ ଇଷ୍ଟ ଜୋନର ଅଧିନାୟକ ଇଶାନ କିଶନ ବୈଭବଙ୍କୁ ‘ଫ୍ୟୁଚର କ୍ୟାପ୍ଟେନ’ ବୋଲି କହିଛନ୍ତି। ଇଶାନଙ୍କ ଏହି ମନ୍ତବ୍ୟ ପରେ ଭବିଷ୍ୟତରେ ବୈଭବଙ୍କ କ୍ୟାପ୍ଟେନ୍ସିକୁ ନେଇ ଚର୍ଚ୍ଚା ଆହୁରି ଜୋର ଧରିଛି।
ଦୁଲୀପ ଟ୍ରଫି ୨୦୨୬ରେ ବୈଭବ ସୂର୍ଯ୍ୟବଂଶୀଙ୍କୁ ଇଷ୍ଟ ଜୋନର ଉପଅଧିନାୟକ ଦାୟିତ୍ୱ ଦିଆଯାଇଥିଲା। ଦଳର ନେତୃତ୍ୱ ନେଉଥିଲେ ଇଶାନ କିଶନ। କିନ୍ତୁ ସେମିଫାଇନାଲ ମ୍ୟାଚରେ ଇଶାନ ଆହତ ହେବା ପରେ ବୈଭବଙ୍କୁ ମ୍ୟାଚ ମଝିରେ ଦଳର କ୍ୟାପ୍ଟେନ୍ସି ସମ୍ଭାଳିବାର ସୁଯୋଗ ମିଳିଥିଲା।
ମାତ୍ର ୧୫ ବର୍ଷ ବୟସରେ ସିନିୟର ଘରୋଇ କ୍ରିକେଟରେ ଅଧିନାୟକ ହେବା ବୈଭବଙ୍କ ପାଇଁ ଏକ ବଡ଼ ଉପଲବ୍ଧି। କେବଳ ଅଧିନାୟକ ଦାୟିତ୍ୱ ସମ୍ଭାଳିବା ନୁହେଁ, ମଇଦାନରେ ନିଜର କ୍ରିକେଟ ବୁଦ୍ଧି ଓ ନିଷ୍ପତ୍ତି ନେବାର କ୍ଷମତାର ମଧ୍ୟ ପରିଚୟ ଦେଇଥିଲେ ସେ।
ଦୁଲୀପ ଟ୍ରଫି ଫାଇନାଲରେ ସାଉଥ ଜୋନ ବିପକ୍ଷରେ ବୈଭବଙ୍କ କ୍ରିକେଟ ବୁଦ୍ଧିର ଆଉ ଏକ ଉଦାହରଣ ଦେଖିବାକୁ ମିଳିଥିଲା। ମ୍ୟାଚରେ ଇଶାନ କିଶନଙ୍କୁ ଡିଆରଏସ ନେବାକୁ ବୈଭବ ପରାମର୍ଶ ଦେଇଥିଲେ। ଇଶାନ ତାଙ୍କ କଥା ମାନି ରିଭ୍ୟୁ ନେଇଥିଲେ ଏବଂ ରିଭ୍ୟୁ ପରେ ରିକି ଭୁଇ ଆଉଟ ହୋଇଥିଲେ। ଏହି ନିଷ୍ପତ୍ତି ପରେ ବୈଭବଙ୍କ ମଇଦାନୀ ବୁଦ୍ଧି ଓ ତୁରନ୍ତ ନିଷ୍ପତ୍ତି ନେବାର କ୍ଷମତାକୁ ନେଇ ପ୍ରଶଂସା ହୋଇଥିଲା। ଏହାରି ମଧ୍ୟରେ ବିସିସିଆଇ ଡୋମେଷ୍ଟିକ୍ର ଏକ ଭିଡିଓରେ ଈଶାନ କିଶନଙ୍କ ମୁହଁରୁ ବୈଭବଙ୍କ ପାଇଁ ‘ଫ୍ୟୁଚର କ୍ୟାପ୍ଟେନ’ ଶବ୍ଦ ବ୍ୟବହାର ହେବା ସବୁଠାରୁ ଅଧିକ ଚର୍ଚ୍ଚାରେ ରହିଛି।
ଇଶାନ ନିଜେ ବୈଭବଙ୍କ କ୍ୟାପ୍ଟେନ ରହିସାରିଛନ୍ତି ଏବଂ ତାଙ୍କ ସହ ମଇଦାନରେ ଅନେକ ସମୟ ବିତାଇଛନ୍ତି। ତେଣୁ ବୈଭବଙ୍କୁ ନେଇ ଇଶାନଙ୍କ ଏଭଳି ମନ୍ତବ୍ୟ ଯୁବ କ୍ରିକେଟରଙ୍କ ନେତୃତ୍ୱ ଦକ୍ଷତା ଉପରେ ତାଙ୍କର ଭରସାକୁ ଦର୍ଶାଉଛି। ତେବେ ଏହାର ଅର୍ଥ ନୁହେଁ ଯେ ବୈଭବଙ୍କ ଭବିଷ୍ୟତ କ୍ୟାପ୍ଟେନ୍ସି ଏବେଠାରୁ ନିର୍ଦ୍ଧାରିତ ହୋଇଗଲା। ସେ ଏବେ ନିଜ କ୍ୟାରିୟରର ପ୍ରାରମ୍ଭିକ ପର୍ଯ୍ୟାୟରେ ଅଛନ୍ତି। ଆଗକୁ ନିୟମିତ ଭାବେ ଭଲ ପ୍ରଦର୍ଶନ କରି ତାଙ୍କୁ ନିଜକୁ ପ୍ରମାଣିତ କରିବାକୁ ପଡ଼ିବ।
କିନ୍ତୁ ଏତେ କମ୍ ବୟସରେ ଉପଅଧିନାୟକ ହେବା, ମ୍ୟାଚରେ କ୍ୟାପ୍ଟେନ୍ସି ସମ୍ଭାଳିବା ଏବଂ ମଇଦାନରେ ସଠିକ ନିଷ୍ପତ୍ତି ନେବାଏସବୁ ବୈଭବଙ୍କ ଭିତରେ ଜଣେ ଭବିଷ୍ୟତର ଲିଡର୍ର ଝଲକ ନିଶ୍ଚିତ ଭାବେ ଦେଖାଉଛି।
