ନୂଆଦିଲ୍ଲୀ,୨୭।୫: ଆଇପିଏଲ (IPL) ମଇଦାନରେ ପୁଣି ଥରେ ଇତିହାସ ରଚିଛନ୍ତି ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀ। ଏହି ବାମହାତୀ ବିସ୍ଫୋରକ ବ୍ୟାଟର ସନରାଇଜର୍ସ ହାଇଦ୍ରାବାଦ ବିପକ୍ଷରେ ମାତ୍ର ୧୬ ବଲେ୍ରେ ଅର୍ଦ୍ଧଶତକ ହାସଲ କରି ସମସ୍ତଙ୍କୁ ଚକିତ କରିଦେଇଛନ୍ତି। ଏଭଳି କାରନାମା ସହ ସେ ବିଶ୍ୱ କ୍ରିକେଟର ’ୟୁନିଭର୍ସ ବସ୍’ କ୍ରିସ ଗେଲ୍ଙ୍କ ଏକ ବଡ଼ ରେକର୍ଡକୁ ମଧ୍ୟ ଧୂଳିସାତ କରିଛନ୍ତି। ହାଇଦ୍ରାବାଦ ବିପକ୍ଷରେ ନିଜର ୭ମ ଛକା ମାରିବା ସହ ବୈଭବ ଆଇପିଏଲ୍ର ଗୋଟିଏ ସିଜନ୍ରେ ସବୁଠାରୁ ଅଧିକ ଛକା ମାରିଥିବା ଖେଳାଳି ହୋଇପାରିଛନ୍ତି। ଏହା ପୂର୍ବରୁ ଗେଲ ଗୋଟିଏ ସିଜିନ୍ରେ ୫୯ଟି ଛକା ମାରିଥିବାର ରେକର୍ଡ କରିଥିଲେ। ବୈଭବ ଏବେ ଏହି ଅଙ୍କକୁ ପାର୍ କରିଯାଇଛନ୍ତି।
ବୈଭବ ସୂର୍ଯ୍ୟବଂଶୀଙ୍କ ବ୍ୟାଟିଂର ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ତାଙ୍କର ଛକା ମାରିବାର ଶୈଳୀ। ସେ ପ୍ରତି ୪ଟି ବଲ୍ରେ ପ୍ରାୟ ଗୋଟିଏ ଛକା ମାରୁଛନ୍ତି। ଯଦି ଏହାର ତୁଳନା ଗେଲ୍ଙ୍କ ସହ କରାଯାଏ, ତେବେ ସେ ପ୍ରତି ୭.୭୨ ବଲ୍ରେ ଗୋଟିଏ ଛକା ମାରୁଥିଲେ। ମାତ୍ର ୧୫ ବର୍ଷ ବୟସରେ ବୈଭବ ଏଭଳି କାରନାମା କରି କ୍ରିକେଟ ଦୁନିଆରେ ହଲଚଲ ସୃଷ୍ଟି କରିଛନ୍ତି।
ଆଇପିଏଲ୍ ଇତିହାସରେ ପ୍ଲେ-ଅଫ (Playoffs) ମ୍ୟାଚ୍ରେ ସବୁଠାରୁ କମ ବୟସରେ ସବୁଠାରୁ ଦ୍ରୁତ ଅର୍ଦ୍ଧଶତକ ହାସଲ କରିବାର ଗୌରବ ଅର୍ଜନ କରିଛନ୍ତି ବୈଭବ। ସେ ମାତ୍ର ୧୬ ବଲ୍ରେ ନିଜର ଅର୍ଦ୍ଧଶତକ ପୂରଣ କରିଛନ୍ତି। ଏହି ମାମଲାରେ ସେ ଭାରତର ପୂର୍ବତନ ଷ୍ଟାର୍ ବ୍ୟାଟର ସୁରେଶ ରାଇନାଙ୍କୁ ପଛରେ ପକାଇ ଦେଇଛନ୍ତି, ଯିଏକି ୨୦୧୪ ମସିହାରେ କିଙ୍ଗସ ଏଲେଭେନ ପଞ୍ଜାବ ବିପକ୍ଷରେ ୧୬ ବଲ୍ରେ ଅର୍ଦ୍ଧଶତକ ମାରିଥିଲେ।
ସନରାଇଜର୍ସ ହାଇଦ୍ରାବାଦ ବିପକ୍ଷରେ ମଇଦାନକୁ ଓହ୍ଲାଇବା ସହ ବୈଭବ ସବୁଠାରୁ ପ୍ରଥମେ ହାଇଦ୍ରାବାଦର ଅଧିନାୟକ ତଥା ଷ୍ଟାର୍ ବୋଲର ପ୍ୟାଟ କମିନ୍ସଙ୍କୁ ଟାର୍ଗେଟ କରିଥିଲେ। ମ୍ୟାଚ୍ର ତୃତୀୟ ଓଭର ବୋଲିଂ କରିବାକୁ ଆସିଥିବା କମିନ୍ସଙ୍କୁ ବୈଭବ ୩ଟି ଚମତ୍କାର ଛକା ଏବଂ ଗୋଟିଏ ଚୌକା ମାରିଥିଲେ। ଓଭରର ଦ୍ୱିତୀୟ ବଲ୍ରେ ଚୌକା ମାରିବା ପରେ ତୃତୀୟ, ଚତୁର୍ଥ ଏବଂ ପଞ୍ଚମ ବଲ୍ରେ ସେ କ୍ରମାଗତ ୩ଟି ବିଶାଳ ଛକା ମାରିଥିଲେ।
ବୈଭବ ଆଇପିଏଲରେ ୫ମ ଥର ପାଇଁ ୨୦ରୁ କମ ବଲ୍ରେ ଅର୍ଦ୍ଧଶତକ ହାସଲ କରି ନିକୋଲାସ ପୁରନଙ୍କ ସମକକ୍ଷ ହୋଇଛନ୍ତି। ଏହି ତାଲିକାରେ ଅଭିଷେକ ଶର୍ମା (୬ ଥର) ସବୁଠାରୁ ଆଗରେ ଅଛନ୍ତି।
ଏହା ସହ ବୈଭବ ପାୱାରପ୍ଲେ (Powerplay) ଭିତରେ ହିଁ ନିଜର ଅର୍ଦ୍ଧଶତକ ପୂରଣ କରିଛନ୍ତି। ଆଇପିଏଲ୍ରେ ସେ ୫ମ ଥର ପାଇଁ ପାୱାରପ୍ଲେରେ ଅର୍ଦ୍ଧଶତକ ମାରିବାର କୀର୍ତ୍ତିମାନ ସ୍ଥାପନ କରିଛନ୍ତି।