ନୂଆଦିଲ୍ଲୀ,୨୮।୩: ଦେଶର ସର୍ବବୃହତ ସରକାରୀ ବ୍ୟାଙ୍କ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ଏହାର ଗ୍ରାହକଙ୍କୁ ଦେଇଛି ବଡ଼ ଝଟ୍କା। ବ୍ୟାଙ୍କ ଡେବିଟ୍ କାର୍ଡ ଉପରେ ମେନ୍ଟେନାନ୍ସ ଚାର୍ଜ(ରକ୍ଷଣାବେକ୍ଷଣ ଦେୟ) ବଢ଼ାଇବାକୁ ଘୋଷଣା କରିଛି। କ୍ଲାସିକ୍, ସିଲ୍ଭର, ଗ୍ଲୋବାଲ, କଣ୍ଟାକ୍ଟଲେସ୍ ଏବଂ ଏସ୍ବିଆଇ ଡେବିଟ୍ କାର୍ଡର ଅନ୍ୟ କାଟାଗେରୀରେ ନୂଆ ବାର୍ଷିକ ମେନ୍ଟେନାନ୍ସ ଚାର୍ଜର ନୂଆ ଦର ଏପ୍ରିଲ ପହିଲାରୁ ଲାଗୁ ହେବ। ଏଣୁ ଏସ୍ବିଆଇ ଗ୍ରାହକଙ୍କୁ ଆଗାମୀ ମାସରୁ ଅଧିକ ଟଙ୍କା ଖର୍ଚ୍ଚ କରିବାକୁ ପଡ଼ିବ।
ବ୍ୟାଙ୍କ ଓ୍ବେବ୍ସାଇଟ୍ ଅନୁଯାୟୀ, ଯୁବା, ଗୋଲ୍ଡ, କମ୍ବୋ ଏବଂ ପ୍ଲାଟିନମ୍ ଡେବିଟ୍ କାର୍ଡ ଭଳି ବିଭିନ୍ନ କାଟାଗୋରୀରେ ଏସ୍ବିଆଇ ଡେବିଟ୍ କାର୍ଡ ଲାଗି ବାର୍ଷିକ ଚାର୍ଜକୁ ୭୫ ଟଙ୍କା ବଢ଼ାଯାଇଛି। ଏହା ଏପ୍ରିଲ ୧ରୁ ଲାଗୁ ହେବ। ଏହାଛଡ଼ା ଏସ୍ବିଆଇ ଡେବିଟ୍ କାର୍ଡ ଜାରି କରିବା ଏବଂ ପରିବର୍ତ୍ତନ କରିବା ସମ୍ବନ୍ଧୀୟ ଶୁଳ୍କରେ ମଧ୍ୟ ପରିବର୍ତ୍ତନ କରିବ।
ଷ୍ଟେଟ୍ ବ୍ୟାଙ୍କ କହିଛି ଯେ, ଏପ୍ରିଲ ୧ରୁ କିଛି କ୍ରେଡିଟ୍ କାର୍ଡ ଲାଗି ଅନେକ ପରିବର୍ତ୍ତନ ଲାଗୁ କରାଯାଇଛି। କିଛି କ୍ରେଡିଟ୍ କାର୍ଡ ଉପରେ ରିଓ୍ବାର୍ଡ ପଏଣ୍ଟ ଏପ୍ରିଲ ୧୫ରୁ ଶେଷ ହେବ। ବାର୍ଷିକ ମେଣ୍ଟେନାନ୍ସ ଦେୟ ବ୍ୟତିତ ଏସ୍ବିଆଇ ଡେବିଟ୍ କାର୍ଡଧାରୀଙ୍କ ପାଇଁ ଜାରି ଶୁଳ୍କ ଏବଂ ଅନ୍ୟ ସେବା ଶୁଳ୍କରେ ପରିବର୍ତ୍ତନ ଲାଗି ବିଜ୍ଞପ୍ତି ଦିଆଯାଇଛି।
