ନୂଆଦିଲ୍ଲୀ,୩।୧୧ : ରୁଷଠାରୁ ଭାରତର ତୈଳ କ୍ରୟକୁ ନେଇ ଆମେରିକା ଏବଂ ୟୁରୋପୀୟ ସଂଘ ଅନେକ ଥର ଆପତ୍ତି ଉଠାଇଛନ୍ତି। କିନ୍ତୁ ଏହା ଦୁଇ ଦେଶ ମଧ୍ୟରେ ବାଣିଜ୍ୟିକ ସମ୍ପର୍କକୁ ପ୍ରଭାବିତ କରିନାହିଁ। କେବଳ ଏତିକି ନୁହେଁ, ଅକ୍ଟୋବର ମାସରେ ରୁଷିଏ ଭାରତକୁ ତୈଳ ଯୋଗାଣ କ୍ଷେତ୍ରରେ ଶୀର୍ଷରେ ରହିଛି। ଭାରତକୁ ତୈଳ ରପ୍ତାନି କ୍ଷେତ୍ରରେ ରୁଷିଆ ଇରାକ ଏବଂ ସୌଦି ଆରବକୁ ଦ୍ୱିତୀୟ ଏବଂ ତୃତୀୟ ସ୍ଥାନକୁ ଠେଲି ଦେଇଛି। ଶିପିଂ ତଥ୍ୟ ଉପରେ ଆଧାର କରି ବଜାର ରିପୋର୍ଟରେ ଏହି ସୂଚନା ଦିଆଯାଇଛି। ଭାରତ ପ୍ରତିଦିନ ୫ ନିୟୁତ ବ୍ୟାରେଲ ତେଲ ଆମଦାନୀ କରିଥାଏ। ଏଥିରେ ଅକ୍ଟୋବର ମାସରେ ରୁଷିଆର ଅଂଶ ୨୨ ପ୍ରତିଶତ ଥିବାବେଳେ ୨୦୧୯ ରେ ଏହାର ଅଂଶ ମାତ୍ର ୧ ପ୍ରତିଶତ ଥିଲା।
ଚାଇନା ଏବଂ ଆମେରିକା ପରେ ଭାରତ ବିଶ୍ୱର ତୃତୀୟ ବୃହତ୍ତମ ତୈଳ ଆମଦାନୀକାରୀ ଦେଶ। ଏଥି ସହିତ ବହୁ ବର୍ଷ ଧରି ଭାରତ ପାଇଁ ସର୍ବୋଚ୍ଚ ତୈଳ ଆମଦାନୀ କରୁଥିବା ଇରାକ ୨୦ ପ୍ରତିଶତକୁ ଖସି ଆସିଥିବାବେଳେ ଭାରତ ଏହାର ୧୬ ପ୍ରତିଶତ ତୈଳ ସୌଦି ଆରବରୁ ଆମଦାନୀ କରୁଛି। ଚଳିତ ବର୍ଷ ଫେବୃଆରୀରୁ ରୁଷିଆରୁ ଭାରତର ତୈଳ କ୍ରୟ ବୃଦ୍ଧି ପାଇଛି। ଫେବୃଆରୀରେ ରୁଷିଆ ୟୁକ୍ରେନ ଆକ୍ରମଣ କରିଥିଲା। ଏହି କାରଣରୁ ଆମେରିକା, ବ୍ରିଟେନ, ଜର୍ମାନୀ ସମେତ ଅନେକ ପାଶ୍ଚାତ୍ୟ ଦେଶ ରୁଷିଆ ଉପରେ ପ୍ରତିବନ୍ଧକ ଲଗାଇଥିଲେ। ଏଭଳି ପରିସ୍ଥିତିରେ ରୁଷିଆରୁ ତେଲ ଶସ୍ତା ମୂଲ୍ୟରେ ତେଲ ବିକ୍ରି ହେଉଥିଲା ଏବଂ ଏହାର ସୁଯୋଗ ନେଇ ଭାରତ ରୁଷିଆରୁ ତୈଳ କିଣିଛି।
ବିଶ୍ୱବ୍ୟାପୀ ଅଶୋଧିତ ତୈଳ ମୂଲ୍ୟ ତୀବ୍ର ବୃଦ୍ଧି ପାଇ ବ୍ୟାରେଲ ପିଛା ୧୩୯ ଡଲାରରେ ପହଞ୍ଚିଛି। ଯାହା ଗତ ୧୪ ବର୍ଷର ସର୍ବାଧିକ। ଏଭଳି ପରିସ୍ଥିତିରେ ରୁଷିଆରୁ ତୈଳ କିଣିବା ଭାରତ ପାଇଁ ଏକ ଲାଭଦାୟକ ଚୁକ୍ତି ବୋଲି ପ୍ରମାଣିତ ହୋଇଛି। ଭାରତ ରୁଷିଆରୁ ତୈଳ କିଣିବାକୁ ଆମେରିକା ଏବଂ ୟୁରୋପ ଆପତ୍ତି କରିଥିଲେ। ଏହାର ଉତ୍ତର ଦେଇ ବହିର୍ବ୍ୟାପାର ମନ୍ତ୍ରୀ ଏସ. ଜୟଶଙ୍କର ସ୍ପଷ୍ଟ ଭାବରେ କହିଥିଲେ ଯେ ଆମେ କାହାର ଲାଭ କିମ୍ବା କ୍ଷତି ପାଇଁ ଏହି ପଦକ୍ଷେପ ନେଉନାହୁଁ। ତେଲ କିଣିବା ପାଇଁ ଆମର ନିଷ୍ପତ୍ତି ଦେଶର ହିତରେ ଅଛି ଯାହାଦ୍ୱାରା ଆମେ ଲୋକମାନଙ୍କୁ ସଠିକ ହାରରେ ତେଲ ଯୋଗାଇ ପାରିବୁ।
