ସୋନପୁର,୧୨।୧୦(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ସହରର ସବୁଠୁ ଉଚ୍ଚ ଓ କାରୁକାର୍ଯ୍ୟପୂର୍ଣ୍ଣ ମନ୍ଦିର ହେଉଛି ଗୁଣ୍ଡିଚା ମନ୍ଦିର। ଏହି ମନ୍ଦିର ଉପରେ ଏବେ ବର ଓ ଅଶ୍ୱତଥ ଗଛ ଭର୍ତ୍ତି ହୋଇଗଲାଣି। ଗଛଗୁଡିକ ବଢି କ୍ରମେ ୪ରୁ ୫ଫୁଟ ହେଲାଣି। ଗଛର ଚେର ମନ୍ଦିର ଭିତରେ ପ୍ରବେଶ କରି ଫାଟ ସୃଷ୍ଟି କରୁଛି। ବର୍ଷା ହେଲେ ଗଛର ଚେର ବାଟେ ପାଣି ଝରୁଛି। ଏହା ମନ୍ଦିରର ସୁରକ୍ଷା ପ୍ରତି ବିପଦ ସୃଷ୍ଟି କରିଛି। ମନ୍ଦିରର ମରାମତି ଓ ଗଛ ସଫା ପାଇଁ ଜିଲା ପ୍ରଶାସନ ଓ ଦେବୋତ୍ତର ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନି । ରଥଯାତ୍ରା ସମୟରେ ତିନି ଠାକୁର ଏହି ମନ୍ଦିରରେ ବିଜେ ହୁଅନ୍ତି। ଏହି ସମୟରେ ମନ୍ଦିରରେ ପ୍ରବଳ ଗହଳି ଲାଗେ। ମାତ୍ର ଗତ ରଥଯାତ୍ରା ସମୟରେ ମନ୍ଦିର ଚୁଳରେ ଥିବା ଗଛ ସଫା ହେଲାନି କି ରଙ୍ଗ ଦିଆଗଲାନି। ସହରବାସୀ ଏ ନେଇ ଅସନ୍ତୋଷ ପ୍ରକାଶ କରିଛନ୍ତି। ସୂଚନା ଅନୁଯାୟୀ, ମନ୍ଦିରର ମରାମତି ପାଇଁ ଅନୁଦାନ ଯୋଗାଇ ଦେବାକୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ୫-ଟି ସଚିବ ଭି.କେ ପାଣ୍ଡିଆନଙ୍କୁ ସୁବର୍ଣ୍ଣପୁର ଗସ୍ତ ସମୟରେ ଅଞ୍ଚଳବାସୀ ଲିଖିତ ଭାବେ ଅନୁରୋଧ କରିଥିଲେ। ତେବେ ଏହି ଅଭିଯୋଗ ଉପରେ ସରକାରଙ୍କ ପକ୍ଷରୁ ଏଯାଏ କୌଣସି ପଦକ୍ଷେପ ନିଆଯାଇନି। ମନ୍ଦିରମାଳିନୀ ସୁବର୍ଣ୍ଣପୁର ସହରରେ ୧୦୮ଟି ଦେବାଦେବୀଙ୍କ ମନ୍ଦିର ରହିଛି। ଏହି ସହରକୁ ଦେଶର ଦ୍ୱିତୀୟ ବାରଣାସୀ ବୋଲି କୁହାଯାଏ। ଏଠାରେ ବହୁ ପ୍ରାଚୀନ ତଥା ଐତିହାସିକ ପୀଠ ରହିଛି। ତେବେ ଏହି ପୁରାତନ ମନ୍ଦିରଗୁଡିକର ଠିକ୍ ଭାବେ ରକ୍ଷଣାବେକ୍ଷଣ କରାଯାଉନି। ଗୁଣ୍ଡିଚା ମନ୍ଦିର ଓ ଚତୁଃପାର୍ଶ୍ୱ କାନ୍ଥରେ ବହୁ ଗଛ ଉଠିଲାଣି। ଦେଢବର୍ଷରୁ ଊର୍ଦ୍ଧ୍ୱ ହେବ ସେଗୁଡିକୁ ସଫା କରାଯାଉନି। ସହରର ବଡବଜାରଠାରେ ଥିବା ଏହି ମନ୍ଦିରକୁ ରାଣୀ ଗୁଣ୍ଡିଚା ଦେବୀ ୧୮୩୭ ମସିହାରେ ନିର୍ମାଣ କରିଥିଲେ। ମନ୍ଦିରରେ ନୃସିଂହ ଭଗବାନ ପୂଜା ପାଆନ୍ତି। ମନ୍ଦିରର ନାଟ ମଣ୍ଡପରେ କଲିକତାରୁ ଅଣାଯାଇଥିବା ଲୁହା ପିଲାର ଲାଗିଛି। ମନ୍ଦିରଟି ଖୁବ୍ ଉନ୍ନତମାନର ଓ କାରୂକାର୍ଯ୍ୟ ପୂର୍ଣ୍ଣ ଭାବେ ନିର୍ମିତ ହୋଇଛି । ସମସ୍ତ ପୂଜା ପାର୍ବଣରେ ଏହି ମନ୍ଦିର ପ୍ରମୁଖ ଭୂମିକା ନିଭାଇ ଥାଏ। କିନ୍ତୁ ପ୍ରଶାସନ ପକ୍ଷରୁ ମନ୍ଦିରକୁ ଅଣଦେଖା କରାଯାଉଥିବା ସହରବାସୀ ଅଭିଯୋଗ କରିଛନ୍ତି।
