ଭୁବନେଶ୍ୱର ୧୪।୬, ସତ୍ୟଜିତ୍ ରାଉତ: ଉତ୍କଳ ବିଶ୍ୱବିଦ୍ୟାଳୟରେ ଚାକିରି ଦେବା ଆଳରେ ୧.୩୭ ଲକ୍ଷ ଟଙ୍କା ଠକିବା ଅଭିଯୋଗରେ ସମ୍ପୃକ୍ତ ଅଭିଯୁକ୍ତଙ୍କୁ ଚନ୍ଦ୍ରଶେଖରପୁର ଥାନା ପୋଲିସ ବୁଧବାର ଗିରଫ କରିଛି। ସେ ହେଲେ ମଞ୍ଚେଶ୍ୱର ଥାନା ଅନ୍ତର୍ଗତ ଚକେଇସିଆଣିରେ ରହୁଥିବା ଗଞ୍ଜାମ ଜିଲା ଗୋଳନ୍ଥରା ଥାନା ଅଞ୍ଚଳର ଗୌରାଙ୍ଗ ସାହୁ (୩୦)। ଗୌରାଙ୍ଗଙ୍କୁ କୋର୍ଟଚାଲାଣ କରାଯିବା ପରେ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ଠକେଇର ଶିକାର ହୋଇଛନ୍ତି ଚନ୍ଦ୍ରଶେଖରପୁର ଥାନାଞ୍ଚଳରେ ରହୁଥିବା ବଡ଼ମ୍ବା ଅଞ୍ଚଳର ଶ୍ରୀକାନ୍ତ ସାହୁ। ସେ ଏକ ଘରୋଇ ସଂସ୍ଥାରେ ସିକ୍ୟୁରିଟି ଗାର୍ଡ ଭାବେ ଚାକିରି କରିବା ସହ ପାର୍ଟ ଟାଇମ୍ ଭାବରେ ରାପିଡୋ ବାଇକ୍ ଚଳାନ୍ତି। ଅଭିଯୁକ୍ତ ଗୌରାଙ୍ଗ ଗତ ଏପ୍ରିଲରେ ଚକେଇସିଆଣିରୁ ଶ୍ରୀକାନ୍ତଙ୍କୁ ରାପିଡୋରେ ନେଇ ଉତ୍କଳ ବିଶ୍ୱବିଦ୍ୟାଳୟରେ ଛାଡ଼ିଥିଲେ। ସେହି ସମୟରେ ଗୌରାଙ୍ଗ ନିଜକୁ ଉତ୍କଳ ବିଶ୍ୱବିଦ୍ୟାଳୟର ଅବସରପ୍ରାପ୍ତ ଲାଇବ୍ରେରିଆନ୍ ବୋଲି ପରିଚୟ ଦେଇଥିଲେ। ଏଥିସହ ବିଭିନ୍ନ କଥା କହି ବିଶ୍ୱାସ ଜନ୍ମାଇବା ପରେ ଶ୍ରୀକାନ୍ତଙ୍କୁ ଉତ୍କଳ ବିଶ୍ୱବିଦ୍ୟାଳୟରେ ଆସିଷ୍ଟାଣ୍ଟ ଲାଇବ୍ରେରିଆନ୍ ପୋଷ୍ଟରେ ଚାକିରି କରାଇଦେବାର ପ୍ରତିଶ୍ରୁତି ଦେଇଥିଲେ। ଏଥିପାଇଁ ଗୌରାଙ୍ଗ ଟଙ୍କା ମାଗିବାରୁ ଶ୍ରୀକାନ୍ତ ତାଙ୍କୁ ବିଭିନ୍ନ ପର୍ଯ୍ୟାୟରେ ମୋଟ ୧ ଲକ୍ଷ ୩୭ ହଜାର ଟଙ୍କା ଦେଇଥିଲେ। ସେହିଭଳି ରଞ୍ଜନ କୁମାର ଦାସ ନାମକ ଜଣେ ସାଙ୍ଗଙ୍କୁ ଶ୍ରୀକାନ୍ତ ପରିଚୟ କରାଇବା ପରେ ଗୌରାଙ୍ଗ ତାଙ୍କୁ ମଧ୍ୟ ସମାନ ଭାବେ ଠକି ୪୦ ହଜାର ନେଇଯାଇଥିଲେ। ତେବେ ଶ୍ରୀକାନ୍ତ ଠକେଇର ଶିକାର ହୋଇଥିବା ଜାଣିବା ପରେ ଥାନାରେ ଏତଲା ଦେଇଥିଲେ। ମଙ୍ଗଳବାର ପୋଲିସ ଏକ ମାମଲା (ନଂ.୨୮୫/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ତେବେ ଗୌରାଙ୍ଗ ଏଭଳି ଅନ୍ୟବ୍ୟକ୍ତିଙ୍କୁ ମଧ୍ୟ ଠକିଥିବା ପାଲିସ ସନ୍ଦେହ କରୁଛି। ତେଣୁ ଅଭିଯୋଗ ତାଲିକା ବଢ଼ିବା ନେଇ ପୋଲିସ ଆଶଙ୍କା କରି ଅଧିକ ତଦନ୍ତ ଜାରି ରଖିଛି।
