ପୁରୀ ଅଫିସ, ୧୮ା୧: ଶ୍ରୀମନ୍ଦିର ପ୍ରଶାସନିକ କାର୍ଯ୍ୟାଳୟ ପରିସରରେ ମଙ୍ଗଳବାର ଲ୍ୟାଣ୍ଡ ସବ୍ କମିଟି ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବ ଅଧ୍ୟକ୍ଷତା କରିଥିଲେ। ଶ୍ରୀମନ୍ଦିର ପରିଚାଳନା କମିଟି ସଦସ୍ୟ, ଏଏସ୍ଆଇ ଅଧିକାରୀ, ଶ୍ରୀମନ୍ଦିର ପ୍ରଶାସନର ରାଜସ୍ବ ପ୍ରଶାସକଙ୍କ ସମେତ ବିଭିନ୍ନ ବିଭାଗର ଅଧିକାରୀ ଉପସ୍ଥିତ ଥିଲେ। ଦୀର୍ଘବର୍ଷ ଧରି ମହାପ୍ରଭୁଙ୍କ ଜମିଜମା ପ୍ରସଙ୍ଗ ସମାଧାନ ହୋଇପାରିନାହିଁ। ତେଣୁ ୟୁନିଫର୍ମ ପଲିସି ମାଧ୍ୟମରେ ପ୍ରଜା ତଥା ଜମି ଦାବିଦାରମାନେ କିପରି ମହାପ୍ରଭୁଙ୍କ ଜମିର ଏନ୍ଓସି ପାଇପାରିବେ ଓ ସମସ୍ୟାର ସମାଧାନ ହୋଇପାରିବ ସେ ନେଇ ବୈଠକରେ ଆଲୋଚନା ହୋଇଥିଲା। ରାଜ୍ୟ ସରକାରଙ୍କ ପକ୍ଷରୁ କ୍ୟାବିନେଟରେ ଶ୍ରୀମନ୍ଦିର ଲ୍ୟାଣ୍ଡ ମ୍ୟାନେଜମେଣ୍ଟ ରୁଲ୍ ଅନୁଯାୟୀ ୟୁନିଫର୍ମ ପଲିସିରେ ଥିବା ଜଟିଳତାକୁ ସରଳୀକରଣ କରିବା ପାଇଁ ନିର୍ଦ୍ଦେଶ ରହିଥିଲା। ତେଣୁ ବୈଠକରେ ୟୁନିଫର୍ମ ପଲିସିରେ ସରଳୀକରଣ କରାଯିବା ସହ ଏକ ଚିଠା ଅନୁମୋଦନ କରାଯାଇଛି। ମହାପ୍ରଭୁଙ୍କ ଜମିରେ ୩୦ବର୍ଷରୁ ଅଧିକ ସମୟ ଦଖଲରେ ଥିଲେ ଏକର ୬ଲକ୍ଷ ଟଙ୍କା ହିସାବରେ ୧୦ ପ୍ରତିଶତ ଅର୍ଥ ଦେବାକୁ ହେବ। ୨୦ରୁ ୩୦ ବର୍ଷ ମଧ୍ୟରେ ଦଖଲରେ ଥିଲେ ଏକର ପିଛା ୯ ଲକ୍ଷ ହିସାବରେ ୧୦ ପ୍ରତିଶତ ଏବଂ ୧୨ରୁ ୨୦ ବର୍ଷ ଭିତରେ ଥିଲେ ଏକରକୁ ୧୫ ଲକ୍ଷ ହିସାବରେ ୨୫ ପ୍ରତିଶତ ଅର୍ଥ ଦେବାକୁ ପଡ଼ିବ। ସେହିପରି ଦଖଲ ସମୟ ୧୨ ବର୍ଷରୁ କମ ହୋଇଥିଲେ ସରକାରୀ ଦରରେ ଅର୍ଥ ପୈଠ କରିବାକୁ ହେବ। ଆବେଦନର ୧ବର୍ଷ ମଧ୍ୟରେ ପଟ୍ଟା ମିଳିବ। ୯୦ ଦିନ ମଧ୍ୟରେ ଧାର୍ଯ୍ୟ ଅର୍ଥ ରାଶି ପୈଠ କରିବେ। ଆବେଦନର ଫଇସଲା ପାଇଁ ଜିଲାପାଳ, ପରିଚାଳନା କମିଟି ଓ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଦାୟିତ୍ୱ ଦିଆଯାଇଛି। ୫ ଏକରରୁ ଅଧିକ ହୋଇଥିଲେ ରାଜ୍ୟ ସରକାର ଆବେଦନର ଫଇସଲା କରିବେ ବୋଲି ବୈଠକରେ ନିଷ୍ପତ୍ତି ନିଆଯାଇଛି। ଖୁବ୍ଶୀଘ୍ର ପରିଚାଳନା କମିଟିରେ ଏ ନେଇ ଆଲୋଚନା କରାଯିବ। ଏହି ନିଷ୍ପତ୍ତିକୁ ଶ୍ରୀମନ୍ଦିର ପରିଚାଳନା କମିଟିକୁ ପଠାଯିବ। ସେଠାରେ ତାହା ପାରିତ ହେବା ପରେ ରାଜ୍ୟ ସରକାରଙ୍କ ନିକଟକୁ ପଠାଯିବ ବୋଲି ନିଷ୍ପତ୍ତି ନିଆଯାଇଛି। ରାଜ୍ୟ ସରକାରଙ୍କ ଅନୁମୋଦନ ପରେ ଦୀର୍ଘଦିନ ଧରି ଲାଗିରହିଥିବା ଜମିଜମା ସମସ୍ୟା ଦୂର ହୋଇପାରିବ ବୋଲି ଆଶା କରାଯାଉଛି।
