ଭୁବନେଶ୍ୱର,୧୬ା୫(ବ୍ୟୁରୋ): ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାମକୁ ନେଇ ଭାଜପା ନେତାମାନଙ୍କ ମଧ୍ୟରେ ଏକ ପ୍ରକାର ଦ୍ୱନ୍ଦ୍ୱ ସୃଷ୍ଟି ହୋଇଥିବା ଦେଖିବାକୁ ମିଳିଛି। ତେବେ ପୁରୀ ବିଧାୟକ ଜୟନ୍ତ ଷଡ଼ଙ୍ଗୀଙ୍କ ବିଭିନ୍ନ ସମୟରେ ବଦଳୁଥିବା ମତ ନେଇ ମୁଖ୍ୟତଃ ଭାଜପା ନେତାଙ୍କ ମଧ୍ୟରେ ଦ୍ୱନ୍ଦ୍ୱ ବଢିଯାଇଛି। ତେବେ ଜୟନ୍ତଙ୍କ ହିସାବ ଭୁଲ୍ ବୋଲି ରବିବାର ପୂର୍ବତନ କେନ୍ଦ୍ରମନ୍ତ୍ରୀ ତଥା ଏମ୍ପି ଜୁଏଲ୍ ଓରାମ କହିଛନ୍ତି।
ଜୁଏଲ କହିଛନ୍ତି ଯେ, ସ୍ଥାନୀୟ ବିଧାୟକ(ଜୟନ୍ତ)ଙ୍କ ହିସାବ ଭୁଲ୍ ରହିଛି। ତାଙ୍କ ଉପରେ କିଛି ଚାପ ଥାଇପାରେ। କିଛି ଗୋଷ୍ଠୀ ତାଙ୍କ ଉପରେ ଚାପ ପକାଉଛନ୍ତି। ରାଜ୍ୟ ସଭାପତି ତାଙ୍କୁ ଡାକି ଏହି ପ୍ରସଙ୍ଗରେ ଆଲୋଚନା କରିବା କଥା। ଶ୍ରୀମନ୍ଦିରର ସୁରକ୍ଷା ପାଇଁ ଭାଜପା ଜୋରଦାର ଲଢେଇ କରିବ। ଶ୍ରୀମନ୍ଦିର ଚାରିପାଖରେ ଚାଲିଥିବା ନିର୍ମାଣ ବେଆଇନ ବୋଲି ସେ କହିଛନ୍ତି। ତେବେ ଜୟନ୍ତ ବିଭିନ୍ନ ସମୟରେ ଭିନ୍ନ ଭିନ୍ନ ମତ ଦେଇଛନ୍ତି। ଜୟନ୍ତ କହିଥିଲେ ଯେ, ବିକାଶ କାମକୁ ସମର୍ଥନ କରୁଛନ୍ତି। ହେଲେ ଯାହା କିଛି ହେଉଛି ଆଇନ ଭିତରେ ହେଉ। ଶ୍ରୀମନ୍ଦିର ଚାରିପାଖରେ ଚାଲିଥିବା କାମକୁ କେବେ ହେଲେ ବିରୋଧ କରିନାହାନ୍ତି ବୋଲି ସେ କହିଥିଲେ। ଅନ୍ୟପଟେ ପାର୍ଲାମେଣ୍ଟରେ ଏହି ପ୍ରସଙ୍ଗ ଉଠାଇଥିବା ଏମ୍ପି ଅପରାଜିତା ଷଡଙ୍ଗୀଙ୍କ ଆଭିମୁଖ୍ୟକୁ ଜୁଏଲ ସମର୍ଥନ କରିଛନ୍ତି। ସେପଟେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାମକୁ ନେଇ ଭାଜପାରୁ ଆସୁଥିବା ଭିନ୍ନ ପ୍ରତିକ୍ରିୟା ନେଇ ବିଜେଡି ରାଜ୍ୟ ସଭା ଏମ୍ପି ମୁନା ଖାଁ କହିଛନ୍ତି, ଶ୍ରୀମନ୍ଦିର ନିର୍ମାଣ କାମ ବାବଦ ପ୍ରସଙ୍ଗ ନେଇ ମାମଲା ହାଇକୋର୍ଟରେ ଅଛି। ଭାଜପା ପ୍ରଥମେ ନିଜ ଷ୍ଟାଣ୍ଡ ସ୍ପଷ୍ଟ କରୁ। ତାଙ୍କ ବିଧାୟକ ଗୋଟେ କଥା କହିଲା ବେଳେ ଏମ୍ପି ଆଉ ଏକ ପ୍ରକାର କଥା କହୁଛନ୍ତି। ତାଙ୍କ ଭିତରେ ବହୁତ ଦ୍ୱନ୍ଦ୍ୱ ରହିଯାଇଛି। ପ୍ରଥମେ ସେମାନେ ନିଜ ଭିତରେ ଥିବା ଦ୍ୱନ୍ଦ୍ୱ ଦୂର କରିବା ପରେ ଯାହା କହିବେ। ଲାଗୁଛି ସେମାନଙ୍କ ଦଳ ଭିତରେ ମତପାର୍ଥକ୍ୟ ଅଛି। ସେଥିଲାଗି ସମସ୍ତେ ଭିନ୍ନ ଭିନ୍ନ କଥା କହୁଛନ୍ତି ବୋଲି ମୁନା କହିଛନ୍ତି।
